އެމެރިކާގެ ޖައްވީ އޮޕަރޭޝަންތަކަށް ގޮންޖެހުމުގެ ޤާބިލުކަން އީރާނުގައި ހުރުމަކީ އެންމެ ބޮޑު ބިރު: އިންޓެލިޖެންސް ރިޕޯޓު

އެމެރިކާގެ އަސްކަރީ ޖައްވީ ހަރަކާތްތަކަށް ގޮންޖެހޭ ފެންވަރުގެ ޖައްވީ ބާރެއްގެ ގޮތުގައި އީރާނު ކުރިއަރަމުން އަންނަ ކަމަށް ޕެންޓަގަންގެ އިންޓެލިޖެންސް ރިޕޯޓަކުން ހާމަކޮށްފިއެވެ.

ޑިފެންސް އިންޓެލިޖެންސް އެޖެންސީ (ޑީއައިއޭ) ގެ އެ ރިޕޯޓުގައި ބުނެފައިވާ ގޮތުގައި، އެޕިކް ފިއުރީ އޮޕަރޭޝަނުގެ ތެރޭގައި އީރާނުން ވަނީ އެމެރިކާގެ ޖައްވީ ޤާބިލުކަމަށް ހަމަލާދީފައެވެ. އެ ގޮތުން ސެޓެލައިޓް ޖީޕީއެސް ސިގްނަލް ޖޭމް ކުރެވޭ އެއްގަމު ނިޒާމުތައް ބޭނުންކޮށްފައިވާ ކަމަށް ރިޕޯޓުގައި ފާހަގަކޮށްފައިވެއެވެ.

ތެހެރާނުން އަސްކަރީ ޤާބިލުކަން ވަރުގަދަކުރުމާއި އިޤުތިޞާދީ ތަރައްޤީއާއި ޤައުމީ ޢިއްޒަތް ހޯދުމުގެ ބޭނުމުގައި، މަދަނީ އަދި އަސްކަރީ ޖައްވީ ޕްރޮގްރާމްތައް ފުޅާކުރަމުން އަންނަ ކަމަށް ވެސް ޑީއައިއޭއިން ބުނެފައިވެއެވެ.

އެމެރިކާގެ އެންޓަޕްރައިޒް އިންސްޓިޓިއުޓުގެ ޖައްވީ ޑޭޓާއިން ދައްކާ ގޮތުގައި އީރާނުގައި ގާތްގަނޑަކަށް 12 ވަރަކަށް ސެޓެލައިޓް އެބައޮތެވެ. އެމެރިކާ އޮޕަރޭޓު ކުރަނީ އެއަށްވުރެ 1،000 ގުނަ އިތުރު ސެޓެލައިޓެވެ. މީގެ އިތުރުން، ޗައިނާ އާއި ރަޝިއާގެ ސެޓެލައިޓް އެހީތެރިކަން އީރާނަށް ލިބި، ޖާސޫސީ މަޢުލޫމާތު ހޯދުމާއި އަމާޒު ކުރުމުގެ ޤާބިލުކަން އިތުރުކޮށްފައިވާ ކަމަށް ރިޕޯޓުތައް ބުނެއެވެ.

އީރާނާ ދެކޮޅަށް "ޖައްވީ އިސްތިއުރާ" ހާސިލުކޮށްފައިވާ ކަމަށް އެމެރިކާ ބުނި ނަމަވެސް، ބައެއް އެމެރިކާގެ ދިފާޢީ ތަޖުރިބާކާރުން ވަނީ އެ ވާހަކައާ މެދު ސުވާލު އުފައްދައިފައެވެ. އެމެރިކާގެ އެންޓަޕްރައިޒް އިންސްޓިޓިއުޓުގެ އެއެރޯސްޕޭސް ތަޖުރިބާކާރެއް ކަމަށްވާ ޓޮޑް ހެރިސަން، އެކްސިއޮސް ނޫހަށް ބުނީ "އީރާނަށް އެމެރިކާގެ ޖައްވީ ޤާބިލުކަން ބަލިކަށިކުރެވޭ ނަމަ، އެ ޤައުމާ ދެކޮޅަށް އަހަރެމެންނަށް އިސްތިއުރާއެއް ނެތް" ކަމަށެވެ.

ޑީއައިއޭގެ ރިޕޯޓުގައި އިތުރަށް ބުނެފައިވާ ގޮތުގައި، އީރާނުން ދަނީ އެ ޤައުމުގެ ގައިޑެންސް އަދި ނެވިގޭޝަން ނިޒާމުތައް އިލެކްޓްރޯނިކް ހަމަލާތަކުން ދިފާޢުކުރެވޭ ވަރަށް ވަރުގަދަކުރުމުގެ މަސައްކަތް ވެސް ކުރަމުންނެވެ.