ހިންގުންތެރިކަމުގެ ދާއިރާއިން ބައިނަލްއަޤުވާމީ އެވޯޑެއް ކުރީގެ ނައިބު ރައީސް އަދީބަށް

ރާއްޖޭގެ ކުރީގެ ނައިބު ރައީސް އަހުމަދު އަދީބު އަބްދުލްގަފޫރަށް ހިންގުންތެރިކަމުގެ ދާއިރާއިން 2026 ވަނަ އަހަރުގެ ގްލޯބަލް ރެކޮގްނިޝަން އެވޯޑް ލިބިއްޖެއެވެ.

ދައުލަތުގެ އިސް މަގާމުތަކާއި ވިޔަފާރީގެ ދާއިރާގައި އަދީބު އަދާކޮށްފައިވާ ދައުރުތައް ބެލުމަށް ފަހު ދީފައިވާ މި އެވޯޑަކީ ބައިނަލްއަޤުވާމީ ފެންވަރުގައި ހުށަހެޅުނު ނޮމިނޭޝަނެއްގެ މައްޗަށް ބިނާކޮށް ދީފައިވާ އެވޯޑެކެވެ. އެވޯޑު ދިނުމުގެ ކުރިން ތަޖުރިބާކާރުންގެ ޕެނަލަކުން ނޮމިނޭޝަންތައް ސްކްރީންކޮށް، އީޖާދީ ވިސްނުން، ލީޑަޝިޕް، ޚިދުމަތް، ދެމެހެއްޓެނިވި ތަރައްޤީ، އަދި އިޖުތިމާޢީ ޒިންމާގެ މިންގަނޑުތަކުން ވަޒަންކޮށްފައިވެއެވެ. ޝޯޓްލިސްޓްވާ ފަރާތްތައް އެކެއް (އެންމެ ދަށް) އިން ފެށިގެން ފަހެއް (ދުނިޔޭގެ ފެންވަރު) އާ ދެމެދުގެ ސްކޭލަކުން ގްރޭޑުކުރެއެވެ. އަދީބަށް ވަނީ ތަސައްވުރާއި ސްޓްރެޓެޖީ ތަންފީޒުކުރުން، އެހެން މީހުންނަށް ހިތްވަރު ދިނުން، ނަޒާހަތްތެރިކަން، އަދި އީޖާދީ ވިސްނުން ކުރިއެރުވުން ފަދަ ބައިތަކުން އެންމެ މަތީ ދަރަޖަ ކަމުގައިވާ ފަހެއް ދީފައެވެ.

އަދީބު 2012 ވަނަ އަހަރުން 2015 ވަނަ އަހަރުގެ ޖުލައިގެ ނިޔަލަށް ޓޫރިޒަމް މިނިސްޓަރުކަން ކުރައްވާފައިވެއެވެ. 2015 ވަނަ އަހަރުގެ ޖުލައިން ނޮވެމްބަރާ ދެމެދު ނައިބު ރައީސްކަން ކުރެއްވިއެވެ. އޭގެ އިތުރުން ކެބިނެޓުގެ އިޤްތިޞާދީ އަދި ޒުވާނުންގެ ކައުންސިލުގެ ކޯ ޗެއާ އަދި ސްޕެޝަލް އިކޮނޮމިކް ޒޯންސް ބޯޑުގެ ޗެއާގެ މަގާމު ވެސް އަދާކުރައްވާފައިވެއެވެ. ސަރުކާރަށް ވަޑައިގަތުމުގެ ކުރިން 2010 އިން 2012 އަށް މޯލްޑިވްސް ނޭޝަނަލް ޗެމްބަރ އޮފް ކޮމާސް އެންޑް އިންޑަސްޓްރީޒްގެ ރައީސްކަން ކުރެއްވިއެވެ. 2008 އިން 2010 އަށް މިލީނިއަމް ކެޕިޓަލް މެނޭޖްމަންޓްގެ ޗީފް އޮޕަރޭޓިން އޮފިސަރުކަން ކުރެއްވިއެވެ. ތައުލީމީ ގޮތުން ބަލާއިރު، 2007 ވަނަ އަހަރު ޔުނިވަރސިޓީ އޮފް ސްޓެފަޑްޝަޔާއިން ބެޗެލަރސް ޑިގްރީ ހާސިލްކުރައްވައި، 2010 ވަނަ އަހަރު އީޑިތު ކޯވަން ޔުނިވަރސިޓީއިން އެމްބީއޭ ނިންމަވާފައިވެއެވެ.

ނަމަވެސް، ނައިބު ރައީސްގެ މަގާމުގައި ހުންނަވަނިކޮށް، 2015 ވަނަ އަހަރުގެ އޮކްޓޫބަރު 24 ގައި، ރިޔާސީ ސްޕީޑްބޯޓު ފިނިފެންމާގައި ހިނގި ގޮވުމާ ގުޅިގެން އަދީބު ހައްޔަރުކުރެވުނެވެ. 2016 ވަނަ އަހަރު އޭނާއަށް ޖުމްލަ 33 އަހަރުގެ ޖަލު ހުކުމެއް ލިބުނެވެ. އެއީ އެ ހާދިސާއާ ގުޅިގެން 15 އަހަރު، ޕިސްޓަލެއް ގެންގުޅުނު ދައުވާއިން 10 އަހަރު، އަދި ލ. މާބިންހުރާ ދޫކުރުމުން ދައުލަތަށް ލިބެންޖެހޭ ފައިސާ އޮޅުވާލި މައްސަލައިން އަށް އަހަރެވެ. ނަމަވެސް، 2019 ވަނަ އަހަރުގެ މެއި މަހު ހައިކޯޓާއި ސުޕްރީމް ކޯޓުން އެ ހުކުމްތައް ބާތިލުކޮށްލިއެވެ.

އޭގެ ފަހުން، އެމްއެމްޕީއާރުސީގެ ކޮރަޕްޝަން މައްސަލާގައި ހުށަހެޅުނު ހަތް ދައުވާއަކަށް އަދީބު އިޢުތިރާފުވުމާ ގުޅިގެން، 2020 ވަނަ އަހަރުގެ އޮކްޓޫބަރު 5 ގައި، ކްރިމިނަލް ކޯޓުން 20 އަހަރުގެ ޖަލު ހުކުމަކާއި 2 މިލިއަން ރުފިޔާގެ ޖޫރިމަނާއެއް ކަނޑައެޅިއެވެ. އެ ހުކުމް ކަނޑައެޅުނީ ދައުލަތާ އެކު ވެވުނު އެއްބަސްވުމެއްގެ ދަށުންނެވެ. 2023 ވަނަ އަހަރުގެ ނޮވެމްބަރު މަހު، ވެރިކަމުގެ ދައުރު ނިމެން ހަތަރު ދުވަސް އޮއްވާ، ކުރީގެ ރައީސް އިބްރާހީމް މުޙައްމަދު ޞާލިޙު އަދީބުގެ ހުކުމުގެ ބާކީ ބައި ހަތަރު ދުވަހަށް ލުއިކޮށްދެއްވުމުން އޭނާ މިނިވަންވިއެވެ. އެ ނިންމުމަށް ފުޅާކޮށް ފާޑުކިޔުނެވެ. ޖޫރިމަނާގެ ބާކީ ހުރި އެއް މިލިއަން ރުފިޔާ މި އަހަރުގެ އޮގަސްޓު 13 ގައި ދައްކާ ނިމުނު ކަމަށް ސިވިލް ކޯޓުން ވަނީ ހާމަކޮށްފައެވެ.

ގްލޯބަލް ރެކޮގްނިޝަން އެވޯޑްސްގެ ތަރުޖަމާނު އެލެކްސް ސްޓާލިން ބުނީ، "އަހުމަދު އަދީބުގެ ސީނިއަރ ޕަބްލިކް ރޯލްތަކާއި، އިންފްރާސްޓްރަކްޗަރ އަދި ޓޫރިޒަމާ ގުޅޭ ސަރުކާރުތަކުގެ ދެމެދުގެ އެއްބަސްވުންތަކާއި، ތަފާތު ދާއިރާތަކުގައި މެނޭޖްމަންޓް ތަޖުރިބާ ވެސް ހިމެނޭ ރެކޯޑަކީ 2026 ގެ ގްލޯބަލް ރެކޮގްނިޝަން އެވޯޑު ހޯދައިދިން ލީޑަޝިޕެވެ" ކަމަށެވެ.

މި އެވޯޑު ބިނާވެފައި ވަނީ ނޮމިނޭޝަން ލިޔެކިޔުންތަކުގައި ހުރި ރެކޯޑުގެ މައްޗަށް ކަމަށް ގްލޯބަލް ރެކޮގްނިޝަން އެވޯޑްސްއިން ބުނެފައިވެއެވެ. އަދި އެ ލިޔެކިޔުންތަކުން ސާބިތުނުވާ ނަތީޖާތައް އެވޯޑުގެ ތެރޭގައި ނުހިމެނޭ ކަމަށް ވެސް އެ ޖަމްޢިއްޔާއިން ބުނެއެވެ.