މެންޗެސްޓަރ ޔުނައިޓެޑުން ވޯލްވަރހެމްޕްޓަން ވޯންޑަރާރސް ގެ ބްރެޒިލްގެ ސްޓްރައިކަރ، މެތިއުސް ކުންޔާ 62.5 މިލިއަން ޕައުންޑަށް ސޮއިކުރުވައިފިއެވެ. މިއީ މި ހޫނުމޫސުމުގެ ބާޒާރުގައި އެ ކުލަބުން ސޮއިކުރުވި ފުރަތަމަ ކުޅުންތެރިޔާއެވެ.
26 އަހަރުގެ ކުންޔާ ޔުނައިޓެޑުގައި ލާނީ މަޝްހޫރު 10 ނަންބަރު ޖާޒީއެވެ. އެ ޓީމުގައި މި ނަންބަރު އެންމެ ފަހުން ލައިފައިވަނީ މާކަސް ރަޝްފޯޑެވެ. ކުންޔާ ވަނީ ޔުނައިޓެޑާއެކު ފަސް އަހަރުގެ އެއްބަސްވުމެއްގައި ސޮއިކޮށްފައެވެ. މި އެއްބަސްވުން އިތުރު އެއް އަހަރަށް ދަންމާލުމުގެ ފުރުސަތުވެސް އޮވެއެވެ. ކުންޔާގެ ބްރެޒިލްގެ ގައުމީ ޓީމުގެ ޒިންމާތައް ނިމި، ވިސާ އާއި ރަޖިސްޓްރޭޝަން ހަމަޖެހުމުން މި ބަދަލުވުން ރަސްމީވާނެއެވެ.
ޔުނައިޓެޑުން ނެރުނު ބަޔާނެއްގައި ބުނެފައިވަނީ ކުންޔާ ވަނީ ޔޫރަޕުގެ އެންމެ މަތީ ލީގުތަކުގައި ކުޅެފައި ކަމަށެވެ. އޭގެ ތެރޭގައި އިނގިރޭސިވިލާތް، ސްޕެއިން، ޖަރުމަނުވިލާތް އަދި ސުވިޒަލޭންޑު ހިމެނެއެވެ. އޭނާ ވަނީ 270 މެޗުގައި 72 ލަނޑު ޖަހާފައެވެ. އަދި ބްރެޒިލްގެ ގައުމީ ޓީމަށް 13 ފަހަރު ކުޅެފައިވެއެވެ.
ކުންޔާ ވޯލްވްސްއާ ގުޅުނީ ފުރަތަމަ ލޯނު އުސޫލުން ކުޅުމަށްފަހުގައެވެ. އޭނާ ވަނީ އެޓީމަށް 92 މެޗު ކުޅެ 33 ލަނޑު ޖަހައިދީފައެވެ. އޭގެ ތެރެއިން 17 ލަނޑު ޖެހީ މިދިޔަ ސީޒަނުގައެވެ. އޭނާއަށް ސްޓްރައިކަރެއްގެ ގޮތުގައި އަދި އެޓޭކިންގ މިޑްފީލްޑަރެއްގެ ގޮތުގައިވެސް ކުޅެވެއެވެ. ޔުނައިޓެޑުން އުންމީދުކުރަނީ އޭނާގެ ސަބަބުން އެ ޓީމުގެ އެޓޭކިންއަށް ބާރުލިބޭނެ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް