ޔޫއޭއީގެ ދޯހާގައި 2027 ވަނަ އަހަރު ބާއްވާ އުރީދޫ މެރަތަންގައި ދުވުމުގެ ފުރުސަތު 10 މީހަކަށް ހިލޭ ލިބޭ ގިވްއަވޭއެއް އުރީދޫން މިއަދު ފަށައިފިއެވެ.

މި ގިވްއަވޭގެ ދަށުން ހޮވާ ކޮންމެ ނަސީބުވެރިއަކަށް ވެސް ދޯހާ މެރަތަންގައި ބައިވެރިވުމުގެ ރެޖިސްޓްރީ ހިލޭ ލިބޭނެއެވެ. ނަމަވެސް ދަތުރުފަތުރާއި ހުރުމާއި އެނޫން ވެސް ޚަރަދުތައް ހަމަޖައްސަން ޖެހޭނީ ހޮވޭ ފަރާތުން އަމިއްލައަށެވެ.

Advertisement

ގިވްއަވޭގައި ބައިވެރިވުމަށް އުރީދޫ ވެބްސައިޓް މެދުވެރިކޮށް މާދަމާގެ ނިޔަލަށް ރެޖިސްޓްރީ ކުރެވޭނެއެވެ.

ގަތަރުގެ ވެރިރަށް ދޯހާގައި ބާއްވާ މި ދުވުމަކީ އުރީދޫ ގްރޫޕުން އިންތިޒާމުކޮށް، ސަރަޙައްދީ ފެންވަރުގައި ގިނަ ދުވުންތެރިންތަކެއް ބައިވެރިވާ ބޮޑު ބައިނަލްއަޤުވާމީ ރޭހެކެވެ. ބައިވެރިންނަށް ފަސް ކިލޯމީޓަރާއި 10 ކިލޯމީޓަރުގެ ކެޓަގަރީތަކުގެ ތެރެއިން ކެޓަގަރީއެއް ޚިޔާރު ކުރެވޭނެއެވެ.

އުރީދޫން ބުނީ ދިވެހި ދުވުންތެރިންނަށް ބައިނަލްއަޤުވާމީ މައިދާނުގައި ވާދަކުރުމުގެ މަގު ފަހިކޮށްދިނުމަކީ މި ގިވްއަވޭގެ މައިގަނޑު މަޤުޞަދު ކަމަށެވެ.

ދުޅަހެޔޮ ދިރިއުޅުމަކަށް ބާރު އެޅުމާއި ކުޅިވަރުގެ ރޫޙު އާލާ ކުރުމުގެ ގޮތުން އުރީދޫ ގްރޫޕުން ބާއްވާ މި ދުވުމަކީ ތަފާތު ފެންވަރުގެ ދުވުންތެރިންނަށް ހުޅުވައިލާފައިވާ ރޭހެކެވެ.