ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް ހެލްތު ސައެންސަސް (އެފްއެޗްއެސް) އިން ހެލްތު މިނިސްޓްރީއާއި ހެލްތު ޕްރޮޓެކްޝަން އެޖެންސީ (އެޗްޕީއޭ) އާ ގުޅިގެން، އެ ފެކަލްޓީގެ އެކެޑެމިކް މުވައްޒަފުންނަށް ރާއްޖޭގެ ޞިއްޙީ ނިޒާމާ ބެހޭ މަޢުލޫމާތު ފޯރުކޮށްދިނުމަށް ޚާއްޞަ އޮރިއެންޓޭޝަން ޕްރޮގްރާމެއް މިއަދު ފަށައިފިއެވެ.

މި ޕްރޮގްރާމުގެ ބޭނުމަކީ ޞިއްޙީ ދާއިރާގެ ތަޢުލީމު ދެއްވާ ލެކްޗަރާއިންނަށް ރާއްޖޭގެ ޞިއްޙީ ނިޒާމުގެ ޢަމަލީ ތަޖުރިބާއާއި ފަހުގެ މަޢުލޫމާތު ލިބޭނެ ފުރުޞަތެއް ހޯދައިދިނުމެވެ. އެފްއެޗްއެސްގެ ޑީނާއި އެކެޑެމިކް މުވައްޒަފުން ބައިވެރިވާ މި ޕްރޮގްރާމުގައި ހެލްތު މިނިސްޓްރީއާއި އެޗްޕީއޭ އަދި ޞިއްޙީ ދާއިރާގެ އެހެނިހެން އިދާރާތަކުގެ އޮފިޝަލުން ޢިލްމާއި ތަޖުރިބާ ޙިއްޞާކުރައްވައެވެ.

Advertisement

ޞިއްޙީ ދާއިރާގެ ސިޔާސަތުތަކާއި ޚިދުމަތްތަކާއި ޢާންމު ޞިއްޙަތުގެ އެންމެ އިސް ކަންކަމާ ގުޅޭ ގޮތުން ސީދާ އެ ދާއިރާގެ ތަޖުރިބާކާރުންގެ ފަރާތުން މަޢުލޫމާތު ލިބިގެންދެއެވެ.

ޕަބްލިކް ހެލްތުގެ ޑިރެކްޓާ ޖެނެރަލް އިބްރާހީމް ނިޝާން އަޙްމަދު މި ޕްރޮގްރާމް އިފުތިތާޙުކޮށްދެއްވައި ވާހަކަދައްކަވަމުން ވިދާޅުވީ، ޞިއްޙީ ދާއިރާގެ ތަޢުލީމާއި ޞިއްޙީ ނިޒާމުގެ ޙަޤީޤީ ބޭނުންތަކާ ދެމެދު ގާތް ގުޅުމެއް އޮތުން ވަރަށް މުހިންމު ކަމަށެވެ.

މިފަދަ ޕްރޮގްރާމްތައް މެދުވެރިކޮށް ލެކްޗަރާއިންނަށް ޞައްޙަ އަދި ގުޅުން ހުރި މަޢުލޫމާތު ދަރިވަރުންނަށް ފޯރުކޮށްދެވި، ޤާބިލު ޞިއްޙީ ޚާދިމުން ބިނާކުރެވޭނެ ކަމަށް ވެސް ނިޝާން ވިދާޅުވިއެވެ. އެ މަނިކުފާނު އިތުރަށް ފާހަގަކުރެއްވީ، ޞިއްޙީ ތަޢުލީމު ރަނގަޅު ވުމުން އެންމެ ބޮޑު ފައިދާއެއް ލިބޭނީ ބަލިމީހުންނާއި މުޖުތަމަޢަށް ކަމަށެވެ.

އެފްއެޗްއެސް އިން ދެކޭ ގޮތުގައި މި ޕްރޮގްރާމުގެ ސަބަބުން ކްލާސް ރޫމުގައި ކިޔަވައިދޭ ފިލާވަޅާއި ޞިއްޙީ ދާއިރާގައި ޢަމަލީ ގޮތުން ކުރެވޭ މަސައްކަތާ ދެމެދު އޮންނަ ގުޅުން ވަރުގަދަވެ، ދަސްވެނިވާ ދަރިވަރުންނަކީ ރާއްޖޭގެ ޞިއްޙީ ބޭނުންތަކަށް ޢަމަލީ ގޮތުން ޖަވާބުދެވޭ ފެންވަރުގެ ބަޔަކަށް ވެގެންދާނެއެވެ. މިފަދަ ގުޅިގެން ހިންގާ ހަރަކާތްތައް ކުރިއަށް އޮތް ތަނުގައި ވެސް ކުރިއަށް ގެންދިޔުމަށް އެފްއެޗްއެސް އިން ރާވާފައިވެއެވެ.