ބުރިޖު ހައިވޭގައި ހެލްމެޓު ނާޅާ ސައިކަލު މަތީގައި އޮށޯވެ ނުރައްކާތެރި ގޮތަކަށް ދުއްވައި ފުލުހުން ހުއްޓުވަން އެންގުމުން މަޑުނުކޮށް ފުލުހުންގެ ވެހިކަލެއްގައި ޖެއްސި ކަމަށް ތުހުމަތުކޮށް ކ. މާފުށީ ޒުވާނަކު ހައްޔަރުކޮށް ބަންދުގައި ބެހެއްޓުމަށް ހަތް ދުވަހުގެ މުއްދަތެއް ކޯޓުން ދީފިއެވެ.

މި މައްސަލައިގައި ހައްޔަރުކޮށްފައިވަނީ ކ. މާފުށި ސްނޯސްކައި އުމުރުން 26 އަހަރުގެ އަހްމަދު ފާރިޒެވެ. އޭނާގެ މައްޗަށް ކޮށްފައިވަނީ ފުލުހުންގެ ދައުރު އަދާކުރުމަށް ހުރަސް އެޅުމާއި މުދަލަށް ގެއްލުން ދިނުމުގެ ތުހުމަތެވެ. ކޯޓުން އޭނާ ބަންދުގައި ބެހެއްޓުމަށް އަމުރުކޮށްފައިވަނީ ކަސްޓޯޑިއަލް ޖަލުގައެވެ.

Advertisement

މައްސަލައިގެ ތަހުގީގީ އޮފިސަރު (އައިއޯ) ފާހަގަކޮށްފައިވާ ގޮތުގައި ފާރިޒް ބުރިޖު ހައިވޭގައި ހެލްމެޓު ނާޅާ ސައިކަލު މަތީގައި އޮށޯވެ ނުރައްކާތެރި ގޮތަކަށް ދުއްވަމުން ދަނިކޮށް މަޑުކުރަން އެންގުމުން އެ އެންގުމަށް ތަބާނުވެ ދުއްވައިގެންފައިވެއެވެ. އަދި އެ ދަތުރުމަތީގައި ފުލުހުންގެ ވެހިކަލެއްގައި ޖައްސާފައިވާ ކަމަށް ވެސް އައިއޯ ބުނެފައިވެއެވެ.

ނަމަވެސް ފާރިޒް ވަނީ މި ތުހުމަތުތައް ދޮގުކޮށްފައެވެ. އޭނާ ބުނެފައިވާ ގޮތުގައި ފުލުހުންގެ ވެހިކަލުގައި އޭނާ ޖައްސާފައެއް ނުވެއެވެ. އޭގެ ބަދަލުގައި ފުލުހުންގެ ވެހިކަލުން އޭނާގެ ސައިކަލުގައި ޖައްސައި ވައްޓައިލީ ކަމަށާއި އެއަށް ފަހު ފުލުހުން އޭނާއަށް އެކި ވަރުގެ އަނިޔާކޮށްފައިވާ ކަމަށް ވެސް ފާރިޒް ބުނެފައިވެއެވެ.

ފާރިޒްގެ ބަންދާ މެދު ގޮތެއް ނިންމައި ކޯޓުން ދީފައިވަނީ ހަތް ދުވަހުގެ މުއްދަތެކެވެ.