ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ މެންބަރުކަމުގެ މަޤާމަށް ހ. މީނާޒް ޝަމްޢޫން ޙަމީދު ޢައްޔަންކުރެއްވުމުގެ ރަސްމިއްޔާތު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ރައީސް އޮފީހުގައި ބާއްވަވައިފިއެވެ.

ޤާނޫނުއަސާސީގެ 190 ވަނަ މާއްދާގެ (ށ) އާއި ހިއުމަން ރައިޓްސް ކޮމިޝަނުގެ ޤާނޫނު (ޤާނޫނު ނަންބަރު 6/2006) ގެ ފަސް ވަނަ މާއްދާގެ (ހ) ގެ ދަށުން ރައީސުލްޖުމްހޫރިއްޔާ މި ޢައްޔަންކުރެއްވުން ހަމަޖެއްސެވީ ހެނދުނު ބޭއްވެވި ޚާއްޞަ ރަސްމިއްޔާތެއްގައެވެ. އެ ރަސްމިއްޔާތުގައި ޝަމްޢޫން ޙަމީދަށް މެންބަރުކަމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު އޮނަރަބަލް ޑޮކްޓަރު މުޙައްމަދު އިބްރާހީމެވެ. ހުވައިކުރެއްވުމަށްފަހު މަޤާމަށް ޢައްޔަންކުރެއްވި ކަމުގެ ލިޔުން ރައީސުލްޖުމްހޫރިއްޔާ ވަނީ ޝަމްޢޫން ޙަމީދާ ހަވާލުކުރައްވައިފައެވެ.

Advertisement

ޝަމްޢޫން ޙަމީދަކީ އެޗްއާރުސީއެމްގައި ކުރިންވެސް ގިނަ ދުވަސްތަކެއް ވަންދެން ޚިދުމަތްކުރައްވާފައިވާ ބޭފުޅެކެވެ. އެ ގޮތުން 2010 އިން 2012 އަށް އެ ކޮމިޝަނުގެ އިންވެސްޓިގޭޝަން ޑިޕާޓްމަންޓުގެ ޑިރެކްޓަރުގެ މަޤާމު އަދާކުރެއްވުމަށްފަހު 2012 އިން 2016 އަށް ސެކްރެޓަރީ ޖެނެރަލްގެ ހައިސިއްޔަތުން ޚިދުމަތްކުރައްވައިފައިވެއެވެ. އޭގެ އިތުރުން ޔުނިވާސަލް ޕީރިއަޑިކް ރިވިއު (ޔޫޕީއާރް) ގެ ރިޕޯޓިން ފޯކަލް ޕޮއިންޓެއްގެ ގޮތުގައިވެސް މަސައްކަތްކުރައްވައިފައިވެއެވެ.

ނުކުޅެދުންތެރިކަން ހުންނަ ކުދިންނަށް ތަޢުލީމީ ފުރުޞަތުތައް ފަހިކުރުމާއި ކުޑަކުދިންގެ ޙައްޤުތައް ޙިމާޔަތްކުރުމާ ގުޅޭ ޤައުމީ ފެންވަރުގެ ދިރާސާތަކުގައިވެސް ޝަމްޢޫން ޙަމީދު މުހިންމު ދައުރެއް އަދާކުރައްވައިފައިވެއެވެ. އެޗްއާރުސީއެމްގެ މެންބަރުކަމަށް ޢައްޔަންކުރެއްވުމާ ހަމައަށް ޝަމްޢޫން ޙަމީދު ހުންނެވީ ދިވެހި ލެންގުއޭޖް ކަލްޗަރ އެންޑް ހެރިޓޭޖް ވުޒާރާގެ ޕާމަނެންޓް ސެކްރެޓަރީގެ މަޤާމުގައެވެ.