ޑޮނަލްޑް ޓްރަމްޕްގެ ރައީސްކަމުގައި ދެ ޤައުމުގެ ގުޅުން ބަދަލުވަމުންދާ ދަނޑިވަޅެއްގައި އެމެރިކާއިން ކެނެޑާއަށް އަރައިގެންފާނެ ހާލަތަކަށް ރައްކާތެރިވުމުގެ ގޮތުން ކެނެޑާގެ ބޮޑުވަޒީރު މާކް ކާނީ ތައްޔާރީތައް ވަމުންދާ ކަމަށް ވިދާޅުވެއްޖެއެވެ.

ނިއު ޔޯކް ޓައިމްސް ނޫހަށް ދެއްވި ބަސްދީގަތުމެއްގައި ކާނީ ވިދާޅުވީ އެފަދަ ކަމެއް ހިނގުމުގެ ފުރުސަތު ވަރަށް ކުޑަ ނަމަވެސް ހުރިހާ ނުރައްކަލަކަށް ވިސްނުމަކީ އޭނާގެ ޒިންމާއެއް ކަމަށެވެ. "ރިސްކް މެނޭޖްމެންޓް ކުރުމަކީ ހަމަ އެއީ" ކަމަށް ކާނީ ވިދާޅުވިއެވެ.

ކެނެޑާ 51 ވަނަ ސްޓޭޓަށް ހެދުމަށް ޓްރަމްޕް ތަކުރާރުކޮށް ދައްކާ ވާހަކައާއި ދުނިޔޭގެ ފެންވަރުގައި ނެގި ޓެރިފްތަކާ ގުޅިގެން އެމެރިކާގެ ހަމަލާއެއް އަތުވެއްޖެނަމަ ދޭނެ ރައްދެއް ކެނެޑާއިން ވަނީ ވޯ ގޭމް ކޮށްފައެވެ. ޓްރަމްޕް ބުނީ ކެނެޑާ ދެކޮޅަށް ބާރުގެ ބޭނުންކުރުމަކީ ވަރަށް ނާދިރު ކަމެއް ކަމަށާއި ސިޔާސީ ލަނޑުދަނޑިތައް ހާސިލުކުރާނީ އިޤްތިޞާދީ ޕްރެޝަރު ބޭނުންކޮށްގެން ކަމަށެވެ.

ވައިޓް ހައުސްއިން ބީބީސީއަށް ބުނީ ކެނެޑާގެ ރައްޔިތުން ހިމާޔަތްކުރުމަށް އެހެން ފަރާތްތަކަށް ވުރެ ބޮޑަށް ޓްރަމްޕް މަސައްކަތް ކޮށްފައިވާ ކަމަށެވެ. ހަނގުރާމައިގެ ފުރުސަތު ވަރަށް ކުޑަ ކަމަށް ބީބީސީއާ ވާހަކަ ދެއްކި އަސްކަރީ ތަޖުރިބާކާރުން ވެސް ދެކޭ ކަމަށް ރިޕޯޓުކޮށްފައިވެ އެވެ.

ނަމަވެސް ކެނެޑާގެ ޢާންމުންގެ ކަންބޮޑުވުން ޓްރަމްޕުގެ އަމަލުތަކާއި ބަސްތަކުން ބޮޑެވެ. އެއީ މިދިޔަ ޖެނުއަރީ މަހު އެމެރިކާއިން ވެނެޒުއެލާގެ ރައީސް ނިކޮލަސް މަދޫރޯ ހައްޔަރުކުރުމާ ގުޅިގެން ކެނެޑާ ރައްޔިތުންގެ 30 އިންސައްތައަށް ވުރެ ގިނަ މީހުން ޤަބޫލުކުރީ އެމެރިކާގެ ހަމަލާއެއް އެ ގައުމަށް ދިއުން ދުރުނޫން ކަމަށެވެ.

ގްލޯބް އެންޑް މެއިލް ނޫހުން ރިޕޯޓުކުރި ގޮތުގައި ކެނެޑާ އަސްކަރިއްޔާ ބޭނުންކުރާ މޮޑެލް ދައްކާ ގޮތުން އެމެރިކާ ހަމަލާ ދީފިނަމަ ހަފުތާއެއްގެ ތެރޭ ކެނެޑާގެ މައި އަސްކަރީ މަރުކަޒުތައް ފުނޑުފުނޑުވެ ޢަދަދުގެ ގޮތުން ބަލިވާ ކެނެޑާ ސިފައިންނަށް ޖެހޭނީ ގެރިއްލާ ހަނގުރާމައެއް ކުރާށެވެ.

ކެނެޑާގެ ސިފައިންގެ އަދަދު މަދު ކަމުން މި ފަހުން އެ ގައުމުގެ ޑީފެންސް މިނިސްޓަރު ވަނީ ލުއި ތަމްރީން ލިބިފައިވާ ތިން ލައްކަ ސިފައިން އިތުރު ކުރަން ޖެހޭ ކަމަށް ބުނެފައި އެވެ.

ޔުނިވާސިޓީ އޮފް ނިއު ހެވެންގެ ނެޝަނަލް ސެކިއުރިޓީ ދާއިރާގެ އެސޯސިއޭޓް ޕްރޮފެސާ މެތިއު ޝްމިޓް ބުނީ ކެނެޑާ މި ފެންވަރަށް ތައްޔާރުވުމަކީ ބައިނަލްއަޤުވާމީ ނިޒާމު ކިހާ ވަރަކަށް ބަދަލުވެފައިވާކަން ދައްކައިދޭ ކަމެއް ކަމަށެވެ. ޝްމިޓް ބުނީ ޓްރަމްޕް ދައްކާ 51 ވަނަ ސްޓޭޓުގެ ވާހަކަ އެމެރިކާ ރައްޔިތުން ސީރިއަސްކޮށް ނުނެގި ނަމަވެސް ކެނެޑާ ރައްޔިތުން އެ ކަން ސީރިއަސްކޮށް ނަގާ ކަމަށެވެ.

ހަމައެއާ އެކު ކެނެޑާ އެރުމުގެ އަމުރެއް ލިބިއްޖެނަމަ އެމެރިކާ ސިފައިންގެ ގިނަ އޮފިސަރުން މަގާމު ދޫކޮށްލާނެ ކަމަށް ޤަބޫލުކުރެވޭ ކަމަށާއި "އެއީ ޣައިރު ޤާނޫނީ އަދި އަޚުލާޤީ ގޮތުން ގޯސް އަމުރެއް ކަމުގައި ދެކޭނެ" ކަމަށް ޝްމިޓް ބުންޏެވެ. އެހެންނަމަވެސް ހާލަތު އެހިސާބަށް ހިނގައްޖެނަމަ ކެނެޑާގެ ތެލާއި މައުދަނީ ވަސީލަތްތައް ހޯދުމާއި ސިޔާސީ ލީޑަޝިޕް ނެތިކޮށްލުމަށް އެމެރިކާ ހަރަކާތް ހިންގާނެ ކަމަށާއި ވެނެޒުއެލާގައި ހިންގި ފަދަ އޮޕަރޭޝަނެއް ފެނިދާނެ ކަމަށް ޝްމިޓް ދެކެއެވެ.

ތާރީޚީ ގޮތުން ބަލާއިރު ކެނެޑާ ވުޖޫދުވީ 18 އަދި 19 ވަނަ ޤަރުނުގައި އެމެރިކާގެ ބާރު ފެތުރުމާ ދެކޮޅަށް ދެއްކި ހިތްވަރުގެ ތެރެއިންނެވެ. ކެނެޑިއަން ވޯ މިއުޒިއަމްގެ ދިރާސާވެރިޔާ ޓިމް ފޮރާން ބުނީ "އެމެރިކާ ދެކެ ބިރުގަތުމަކީ ކެނެޑާ އެކުލެވިގެންވާ ސިޔާސީ ޕްރޮޖެކްޓުގެ ބިންގާ" ކަމަށެވެ.

1775 ގައި އެމެރިކާ ސިފައިން މޮންޓްރީލް ހިފައި ކުއެބެކް ސިޓީ ވެސް ހިފަން ކައިރިވިއެވެ. 1812 ގެ ހަނގުރާމައިގައި ވެސް އެމެރިކާ ތަކުރާރުކޮށް ހަމަލާ ދިނެވެ. އެ ހަނގުރާމައިގައި ބްރިޓިޝް ސިފައިން ވައިޓް ހައުސް ރޯކޮށްލީ ރައްދުގެ ގޮތުގައެވެ.

މިހާރު ހިނގަމުންދާ ބައިނަލްއަޤުވާމީ ބަދަލުތަކާ އެކު ދެ ޤައުމުގެ ޒަމާންވީ ބައިވެރިކަމުގެ ގުޅުމަށް ކުރިމަތިވެފައިވާ ގޮންޖެހުމުގެ ބޮޑުމިން ކެނެޑާ ރައްޔިތުން ސީރިއަސް ގޮތެއްގައި ވަޒަންކުރަމުންދާ ކަން ޕޯލްތަކާއި ސަރުކާރުގެ ފިޔަވަޅުތަކުން ހާމަވެއެވެ.