ދޮގު މަޢުލޫމާތު ފެތުރުމާއި މުޖުތަމަޢުގައި ފިތުނައަށް މަގުފަހިވާ ކަންކަމުން ބްރޯޑްކާސްޓަރުން ދުރުހެލިވުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން މިއަދު ގޮވާލައިފިއެވެ.

އެކޮމިޝަނުން މިކަމަށް ގޮވާލެއްވީ މިއަދު ފާހަގަ ކުރަމުންދާ ބްރޯޑްކާސްޓިން ދުވަހުގެ މުނާސަބަތުގައި ނެރުނު ބަޔާނެއްގައި އެވެ.

Advertisement

ބަޔާނުގައި އެ ކޮމިޝަނުން ބްރޯޑްކާސްޓަރުންނަށް އިލްތިމާސްކޮށްފައި ވަނީ ޤައުމީ މަސްލަޙަތު އިސްކޮށް ޒިންމާދާރުކަމާ އެކު ޚަބަރާއި މަޢުލޫމާތު ފެތުރުމަށެވެ. އެމްއެމްބީސީން ބުނީ ބްރޯޑްކާސްޓިންގެ ޚިދުމަތަކީ ޤައުމެއްގެ އިޖުތިމާޢީ ސިޔާސީ އަދި އިޤުތިޞާދީ ހޭލުންތެރިކަން ކުރިއެރުވުމާއި ރައްޔިތުންނަށް ތެދު މަޢުލޫމާތު ފޯރުކޮށްދިނުމުގައި އެންމެ މުހިންމު އެއް ވަސީލަތް ކަމަށެވެ.

ޚާއްޞަކޮށް އިސްލާމީ ރިވެތި އަޚުލާޤާއި ދިވެހި ޤައުމިއްޔަތާއި ސަޤާފަތް ދެމެހެއްޓުމުގެ އިތުރުން ޞައްޙަ މަޢުލޫމާތު ރައްޔިތުންނާ ހަމައަށް ފޯރުކޮށްދިނުމަކީ 1962 ވަނަ އަހަރުގެ ޑިސެމްބަރު 29 ގައި "މާލެ ރޭޑިއޯ"ގެ ނަމުން ފެށިގެން ބްރޯޑްކާސްޓަރުން އަދާކުރަމުން އަންނަ އަގުހުރި ޤައުމީ ޚިދުމަތެއް ކަމަށް ވެސް އެ ކޮމިޝަނުން ފާހަގަކޮށްފައިވެއެވެ.

ޓެކްނޮލޮޖީއާއި މީޑިއާގެ ދާއިރާއަށް އަންނަ ބަދަލުތަކާ އެއްހަމައެއްގައި ޒަމާނީ ވަސީލަތްތައް ބޭނުންކޮށްގެން ފެންވަރު ރަނގަޅު ޚިދުމަތްތައް ފޯރުކޮށްދިނުމަށާއި ދާއިރާގެ މަސައްކަތްތެރިންގެ ފަންނީ ޤާބިލުކަން އިތުރުކުރުމަށް މަސައްކަތް ކުރާނެ ކަމުގެ ޔަޤީންކަން ވެސް އެމްއެމްބީސީން ދީފައިވެއެވެ.

ޤާނޫނާއި ގަވާއިދުގެ އިމުގެ ތެރެއިން މިނިވަން އަދި ޒިންމާދާރު ނޫސްވެރިކަމެއް ޤާއިމުކުރުމަށް ބާރު އެޅުމަކީ އެ ކޮމިޝަނުގެ މައިގަނޑު އެއް އަމާޒު ކަމަށް ވެސް އެ ބަޔާނުގައި ބުނެފައިވެއެވެ.