ޔޫކްރެއިންގެ ވެރިރަށް ކީވާއި އެހެން ސިޓީތަކަށް ރައްދު ހަމަލާތައް ކުރިއަށް ގެންދާނެ ކަމަށް ބުނެ ބޭރު ޤައުމުތަކުގެ ރައްޔިތުންނާއި ޑިޕްލޮމެޓިކް މިޝަންތަކުގެ މުވައްޒަފުން ޔޫކްރެއިނުން ފޭބުމަށް ރަޝިޔާގެ ފޮރިން މިނިސްޓްރީން ގޮވާލައިފިއެވެ.

ރަޝިއާގެ ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ ޔޫކްރެއިންގެ ސިފައިން ރަޝިޔާގެ ޢާންމު ރައްޔިތުންނާއި ޢާންމު ވަސީލަތްތަކަށް ދެމުން ގެންދާ "ޓެރަރިސްޓް" ހަމަލާތަކުގެ ރައްދެއްގެ ގޮތުން ކީވާއި ޔޫކްރެއިންގެ އެހެން ސިޓީތަކުގެ އަސްކަރީ ތަންތަނަށް ރޭވިގެން ހަމަލާތައް ދިނުން ކުރިއަށް ގެންދާނެ ކަމަށެވެ. އެ ބަޔާނުގައި އިތުރަށް ބުނެފައިވަނީ މި އިންޒާރަށް ފަރުވާލެއް ނުބަހައްޓައި ޔޫކްރެއިންގައި ތިބޭ ނުވަތަ އެ ޤައުމަށް ދަތުރުކުރާ ބޭރު މީހުންނަށް ދިމާވާ ކޮންމެ ނުރައްކަލެއްގެ ޒިންމާ އެ ފަރާތްތައް އަމިއްލައަށް އުފުލަން ޖެހޭނެ ކަމަށެވެ.

Advertisement

މި އިންޒާރާ ގުޅިގެން ޔޫކްރެއިންގެ ރައީސް ވޮލޮޑިމިރް ޒެލެންސްކި ބުނީ ރަޝިޔާއިން ޢާންމު ރައްޔިތުންނަށް އަމާޒުކޮށް ގެންގުޅޭ އައު ސިޔާސަތުގެ ރައްދެއްގެ ގޮތުން ރަޝިޔާގެ ތެޔޮ ސާފުކުރާ ކާރުޚާނާތަކަށް ހަމަލާ ދިނުން ދެ ގުނައަށް އިތުރުކުރާނެ ކަމަށާއި ނަމަވެސް ޢާންމު ރައްޔިތުންނަށް އަމާޒެއް ނުކުރާނެ ކަމަށެވެ. ޒެލެންސްކީ ބުނި ގޮތުގައި ޔޫކްރެއިންގެ ޖާސޫސީ އިދާރާއަށް ލިބިފައިވާ ލިޔެކިޔުންތަކުން ދައްކާ ގޮތުން ރަޝިޔާގެ ރައީސް ވްލަޑިމިރް ޕޫޓިން ވަނީ މި ފެށޭ ފިނި މޫސުމުގެ ކުރިން ޢާންމު ތަންތަނުގެ މާ ފުޅާ ދާއިރާއަކަށް ހަމަލާ ދިނުމުގެ "އައު ޑޮކްޓްރިން"އެއް ނެރެފައެވެ.

ހޮނިހިރު ދުވަހު ދިން ވައިގެ ހަމަލާއެއްގައި ދެނިޕްރޯ ކޯރު ހުރަސްކޮށް އޮތް ބުރިޖަކަށް ހަމަލާ ދިން ކަމަށް ރިޕޯޓުތައް ބުނެއެވެ. ކީވްގައި ދިރިއުޅޭ ތިން މިލިއަން ރައްޔިތުންގެ ދިރިއުޅުމަށް ބޮޑެތި ބުރޫ އެރުންތަކެއް ކުރިމަތިވެފައިވާ ދަނޑިވަޅެއްގައި ޕޫޓިން ބުނީ ރަޝިޔާއަށް ދޭ ހަމަލާތަކުގެ ބަދަލު ޔޫކްރެއިން ދައްކަން ޖެހޭ ކަމަށެވެ.

މި ހަނގުރާމައިގެ މަޝްރަހު ހޫނުވެފައިވާ މި ދަނޑިވަޅުގައި ހަމަލާ ބަދަލުކުރުން ހުއްޓައިލުމަށް ހުށަހެޅިފައިވާ ހުށަހެޅުންތަކާ ބެހޭ ގޮތުން ޔޫކްރެއިންގެ ފޮރިން މިނިސްޓަރު ބުނީ ޖުމުލަ ހަތަރު ހުށަހެޅުމެއް ލިބިފައިވާ ކަމަށާއި އޭގެ ތެރެއިން "އެންމެ ފުޅާ" ހުށަހެޅުމަކީ އިންޑިއާގެ ހުށަހެޅުން ކަމަށެވެ. 

އެއީ ހަކަތައިގެ ވަސީލަތްތަކާއި ކަޅު ކަނޑަށް ހަމަލާތައް ދިނުން ހުއްޓައިލުމުގެ އެއްބަސްވުމެއް ކަމަށާއި އެކަމަށް ޔޫކްރެއިނުން ތާއީދު ކަމަށެވެ. އެކަން ހުށަހެޅީ އިންޑިއާ ތުރުކީ އަދި މިސްރާއި އެމެރިކާ ބައިވެރިވެގެންނެވެ.