އިނގިރޭސިވިލާތުގެ ބައެއްގެ ގޮތުގައި އޮންނަ ބާމިޔުޑާއިން ބޮސްޓަނަށް އެޓްލާންޓިކް ކަނޑު މަތިން ދަތުރުކުރަނިކޮށް ގެއްލުނު މެޑިކަލް އެވެކުއޭޝަން ޖެޓުގެ ބައިތައް އެ ކަނޑުގެ ނެންޓަކެޓް ސަރަހައްދުން ފެނިއްޖެ އެވެ.

ރިޕޯޓުތައް ބުނާގޮތުގައި ބޯޓު ގެއްލުނީ ކަރަންޓުގެ މައްސަލައެއް ދިމާވެ ރޭޑާއާއި ރޭޑިއޯ ސިގްނަލް ގެއްލުނު ފަހުންނެވެ. ބޯޓު ގެއްލިގެން ހޯދުމުގެ މަސައްކަތް ފެށީ އިއްޔެ އެވެ.

Advertisement

އެ ދަތުރުގައި ބޯޓުގައި ހަ މީހުން ތިއްބެވެ. އޭގެން އެއްވެސް މީހެއްގެ ހަށިގަނޑު ފެނުން ކަމެއް އަދި ނޭނގެ އެވެ.

ރިޕޯޓުތައް ބުނާ ގޮތުގައި ލެޓިޓިއުޑް އެއާ އެމްބިއުލެންސް ކުންފުނީގެ ކެނެޑާގައި ރަޖިސްޓަރީކޮށްފައިވާ ގަލްފްސްޓްރީމް ޖީ100 މަރުކާގެ ޖެޓު ބާމިޔުޑާގެ އެލް.އެފް ވޭޑް އިންޓަނެޝަނަލް އެއާޕޯޓުން ފުރީ އިއްޔެރޭ ދަންވަރު 12:41 ހާއިރުއެވެ. ބޯޓުގެ މިސްރާބު ހުރީ ބޮސްޓަން ލޯގަން އިންޓަނެޝަނަލް އެއާޕޯޓަށެވެ.

ބޮސްޓަން ގްލޯބުން ރިޕޯޓުކޮށްފައިވާ ގޮތުގައި ބޯޓާ ގުޅުން ކެނޑުމުގެ ކުޑައިރުކޮޅެއް ކުރިން ކަރަންޓުގެ މައްސަލައެއް ޖެހިފައިވެއެވެ. ލައިވް އޭޓީސީ ވެބްސައިޓުގައި ޝާއިޢުކުރި އެއާ ޓްރެފިކް ކޮންޓްރޯލް ރެކޯޑިންގައި ކޮންޓްރޯލަރު ޕައިލެޓާ އޭނާ ދެއްކި ވާހަކަތަކަކާއި ގުޅޭގޮތުން ސުވާޅު ކުރާ އަޑު އިވޭކަމަށް ބުނެފައިވެ އެވެ.

އެގޮތުން ކުރިމަތިން އެއްވެސް އެއްޗެއް ނުފެންނަ ކަމަށް ބުނިތޯ ކޮންޓްރޯލަރު ޕައިލެޓާއި ސުވާލު ކުރި ކަމަށާއި އެމަޖެންސީ އިއުލާނުކޮށްދޭންވީތޯވެސް ސުވާލު ކުރިކަމަށް ބުނެފައިވެ އެވެ. ނަމަވެސް އޭގެން އެއްވެސް ސުވާލަކަށް ޕައިލެޓު ދިން ޖަވާބު ސާފު ނުވާކަމަށް ބުނެފައިވެ އެވެ.

ރޮއިޓާސް ބުނި ގޮތުގައި ބޯޓު 24000 ފޫޓު މަތީގައި ދަތުރުކުރުމަށް ފަހު ގާތްގަނޑަކަށް ދެ މިނެޓު ތެރޭގައި 13000 ފޫޓު ތިރިވެފައިވެ އެވެ.