އީރާނާ ދެކޮޅު ހަނގުރާމައިގެ ކުރިން އެމެރިކާ ސިފައިން ޕޯޗުގަލްގެ ލާޖެސް ވައިގެ މަރުކަޒު ބޭނުންކުރުމަކީ ޤާނޫނާ ޚިލާފު ކަމެއްތޯ ބެލުމަށް އެ ޤައުމުގެ ޕަބްލިކް ޕްރޮސެކިއުޓަރުގެ އޮފީހުން ތަޙުޤީޤެއް ފަށައިފި އެވެ.

މި ތަޙުޤީޤު ފެށީ އެ ގައުމުގެ ވައަތުފިޔައިގެ ބްލޮކް ޕާޓީން އެޕްރީލް މަހު ހުށަހެޅި ރަސްމީ ޝަކުވާއަކާ ގުޅިގެން ކަމަށް ޕޯޗުގަލްގެ ބްރޯޑްކާސްޓަރު އާރްޓީޕީން ރިޕޯޓުކޮށްފައިވެއެވެ. އެ ޕާޓީން ވަނީ ލާޖެސް މަރުކަޒު ބޭނުންކުރުމަކީ ޤައުމީ ޤާނޫނާއި ބައިނަލްއަޤުވާމީ ޤާނޫނާ ޚިލާފު ކަމެއް ކަމަށް ބުނެ އެޓާނީ ޖެނެރަލްގެ އޮފީހުން އެ މައްސަލަ ބަލައިދިނުމަށް އެދިފައެވެ. އެ ޕާޓީން ސިފަކުރި ގޮތުގައި އެއީ ބައިނަލްއަޤުވާމީ ޤާނޫނާ އެކި ގޮތްގޮތުން ޚިލާފުވުމެކެވެ.

Advertisement

ލެފްޓް ބްލޮކް ޕާޓީގެ ކޯޑިނޭޓަރު ޖޮސް މެނުއެލް ޕުރޭޒާ ބުނީ އެގައުމުގެ ސަރުކާރު ބައިނަލްއަޤުވާމީ ޤާނޫނާއި ޕޯޗުގީޒް ޤާނޫނާ ހިލާފު ކަންކަމާއި އެއްބަސްވެފައި ހުރި ކަމަށެވެ. ނޫނީ ޣައިރު ޤާނޫނީ ކަންކަމުން ބޭރުވުމަށް ނޫނެކޭ ބުނުމުގެ ހިތްވަރު ސަރުކާރުގައި ނެތީ ކަމަށެވެ.

ޕޯޗުގަލްގެ ފޮރިން މިނިސްޓަރު ޕައޮލޯ ރާންޖެލް ބުނެފައި ވާގޮތުގައި ލާޖެސް ބޭނުންކުރުމުގައި ޕޯޗުގަލާއި އެމެރިކާއާ ދެމެދު އޮތް އެއްބަސްވުމާ ވެސް އަދި ބައިނަލްއަޤުވާމީ ޤާނޫނާ ވެސް ޚިލާފުވެފައި ނުވާ ކަމަށެވެ.

ޕުރޭޒާ ވަނީ މިނިސްޓަރުގެ މި ވާހަކަތަކާ މެދު ސީދާ ސުވާލު އުފައްދައިފައެވެ. އޭނާ ބުނީ "ވަޒީރު ޕައޮލޯ ރާންޖެލް އަމިއްލައަށް ވެސް ދައްކާ ވާހަކަ ޤަބޫލުނުކުރާ ކަމަށް ހީކުރެވޭ ކަމަށެވެ.

އޭނާ ބުނީ ލާޖެސް ވައިގެ މަރުކަޒު ޢުދުވާނީ ބޭނުންތަކަށް ބޭނުންނުކުރެއޭ މިނިސްޓަރު ބުނުމަކީ ހަޤީޤަތާ ޚިލާފު ވާހަކައެއް ކަމަށެވެ. ލާޖެސް ވައިގެ މަރުކަޒާ ބެހޭ އެއްބަސްވުމަށް ޢަމަލުކުރެއޭ ބުނުމަކީ ވެސް ހަޤީޤަތާ ޚިލާފު ވާހަކައެއް ކަމަށް ޕުރޭޒާ ބުންޏެވެ.

ތަޙުޤީޤުގެ ނިންމުންތަކާ މެދު ވެސް ޕުރޭޒާ ބުނީ ނަތީޖާ ނުކުންނަންދެން މަޑުކުރަން ޖެހޭ ކަމަށާއި ނަމަވެސް ޕަބްލިކް ޕްރޮސެކިއުޓަރުގެ އޮފީހުން މި ފިޔަވަޅު އެޅުމަކީ ހުށަހެޅި ޝަކުވާގައި "ބުރަދަނެއް" އޮތް ކަން ޤަބޫލުކުރެވޭ ކަމުގެ ނިޝާނެއް ކަމަށެވެ. މި ތަޙުޤީޤުގެ ނަތީޖާ ނެރޭނެ ވަކި ތާރީޚެއް އަދި ހާމަކޮށްފައެއް ނުވެއެވެ.

ޕޯޗުގަލްގެ އިތުރުން އެހެން ގައުމުތަކުގެ ވައިގެ ބަނދަރުތައް އިރާނަށް ހަމަލާދޭން އެމެރިކާއިން ބޭނުން ކުރާކަން އެނގުމުން އެގައުމުތަކުން އެކަން ހުއްޓުވާފައިވެ އެވެ. އެގޮތުން ފަރާންސާއި އިޓަލީން ވަނީ އެ ގައުމުތަކުގެ އަސްކަރީ މަރުކަޒުތަކުން އިރާނަށް ހަމަލާދީގެން ނުވާނެ ކަމަށާއި އެ ހަނގުރާމައިގަ އެ ގައުމުތައް ބައިވެރިވެ އެމެރިކާއަށް އެއްބާރުލުން ދޭން ބޭނުން ނުވާކަން ރަސްމީކޮށް ހާމަކޮށްފައި އެވެ.