17 އަތޮޅަކުން ބައިވެރިވި ޒުވާނުންގެ ތެރެއިން 73 ދަރިވަރަކު ދިވެހި ވަތަނީ ހިދުމަތުގެ ފަންނީ ތަމްރީނު ޕްރޮގްރާމުގެ ދެވަނަ ބެޗު ފުރިހަމަކޮށް މިއަދު ދަސްވެނިވެއްޖެއެވެ.

މި ބެޗުގެ ކިޔެވުން ކުރިއަށް ގެންގޮސްފައިވަނީ މި އަހަރުގެ ޖޫން ތިނެއްގައި ފެށި 16 ހަފުތާގެ މުއްދަތަކަށެވެ. ޖުމްލަ 75 ދަރިވަރުން ބައިވެރިވި މި ބުރު ފުރިހަމަކުރި 73 ދަރިވަރުންގެ ތެރޭގައި ހިމެނެނީ 60 ފިރިހެން ކުދިންނާއި 13 އަންހެން ކުދިންނެވެ. މި ޕްރޮގްރާމަކީ ނޭޝަނަލް ސަރވިސް އިނީޝިއަލް ޓްރެއިނިން ނިންމާ ދަރިވަރުންނަށް ހާއްސަކޮށްގެން ހިންގާ ތަމްރީނެކެވެ.

Advertisement

ތަމްރީނުގައި އުނގަންނައިދީފައިވާ ދާއިރާތަކުގެ ތެރޭގައި އޮޓޯ މޯބައިލް އިންޖިނިއަރިން މެރިން އިންޖިނިއަރިން އިލެކްޓްރީޝަން ރެފްރިޖެރޭޝަން އެންޑް އެއާ ކޮންޑިޝަން ވެލްޑިން މެޓަލް ފެބްރިކޭޝަން އަދި އޮފީސް މެނޭޖުމަންޓު ހިމެނެއެވެ. ކިޔަވައިދީފައިވަނީ ތަފާތު ފަންނީ ދާއިރާތަކުގެ ތަޖުރިބާ ލިބިފައިވާ ސިފައިންގެ އިންސްޓްރަކްޓަރުންނެވެ. މި ޕްރޮގްރާމް ނިންމާ ދަރިވަރުންނަށް މޯލްޑިވްސް ކޮލިފިކޭޝަން އޮތޯރިޓީން ގަބޫލުކުރާ ލެވެލް ތިނެއްގެ ސެޓިފިކެޓެއް ލިބެއެވެ.

ފަންނީ ތަމްރީނުގެ ފުރަތަމަ ދެ ބެޗުން ނުވަ މަސް ދުވަހުގެ ތެރޭގައި ޖުމްލަ 136 ޒުވާނަކު ދަސްވެނިވެފައިވާ އިރު ތިންވަނަ ބެޗުގެ ތަމްރީނުތައް މި މަހުގެ 12 ވަނަ ދުވަހު ފެށުމަށް ވަނީ ހަމަޖެހިފައެވެ.

ވަތަނީ ހިދުމަތުގެ ޕްރޮގްރާމަށް ފަންނީ އައު ދާއިރާތައް ތައާރަފުކޮށް ނޭޝަނަލް ސަރވިސްގެ އިންޓަރންޝިޕް ޕްރޮގްރާމުތައްވެސް ތައާރަފުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވިދާޅުވެފައެވެ.

ދިވެހި ވަތަނީ ހިދުމަތަކީ ޒުވާނުންގެ ކިބައިގައި ގައުމީ ރޫހާއި އިސްލާމީ އަހްލާގު އާލާކޮށް ގައުމަށް ހިދުމަތް ކުރުމުގެ ޖޯޝު ހުރި ޖީލެއް ބިނާކުރުމަށް ރައީސް ޑރ. މުއިއްޒު ފެއްޓެވި ޕްރޮގްރާމެކެވެ. މި ޕްރޮގްރާމުގެ ދަށުން މިހާތަނަށް ތިން ބެޗެއްގެ ތަމްރީނުތައް 1000 އަށް ވުރެ ގިނަ ދަރިވަރުން ފުރިހަމަކޮށްފައިވެއެވެ.