މަގުމަތީގައި ނުރައްކާތެރިކޮށް އުޅަނދު ދުއްވައި އާންމުންގެ ހިތްތަކުގައި ބިރުވެރިކަން އުފައްދާ ފަރާތްތައް ދެނެގަނެ އެ ފަރާތްތަކާ މެދު ހަރުކަށި ފިޔަވަޅު އެޅުމުގެ ހާއްސަ މަސައްކަތްތަކެއް ދިވެހި ފުލުހުންގެ ހިދުމަތުން ފަށައިފިއެވެ.

ފުލުހުން މިއަދު ނެރުނު ނޫސް ބަޔާނުގައިވާ ގޮތުން މި މަސައްކަތުގެ ތެރެއިން ނުރައްކާތެރިކޮށް ދުއްވާ ފަރާތްތައް ޕްރޮފައިލްކުރުމުގެ މަސައްކަތް މިހާރު ކުރިއަށް އެބަ ގެންދެއެވެ. އެ ބަޔާނުގައި ބުނެފައިވާ ގޮތުގައި ފުރަތަމަ ފިޔަވަޅެއްގެ ގޮތުން އެ ފަރާތްތައް ފުލުހަށް ހާޒިރުކޮށް ނަސޭހަތްތެރިވާނެއެވެ. ނަމަވެސް އެ އަމަލުތައް ތަކުރާރުކޮށްފި ނަމަ ޓްރެފިކް ގާނޫނުގެ ދަށުން ޖޫރިމަނާ ކުރުމުގެ އިތުރުން އިތުރު އިންޒާރަކާ ނުލައި ޖިނާއީ ތަހުގީގު ހިންގާނެ ކަމަށެވެ.

Advertisement

ފުލުހުން ހާއްސަ ސަމާލުކަމެއް ދީގެން ފިޔަވަޅު އެޅުމަށް ކަނޑައަޅާފައިވާ ކަންކަމުގެ ތެރޭގައި ޒިގްޒެގްކޮށް ދުއްވުމާއި ސައިލެންސަރު އަޑުގަދަވާ ގޮތަށް އުޅަނދަށް ބަދަލު ގެނެސްގެން ދުއްވުމާއި ހަރު ބިންމަތީގައި ގާނަމުން ދުއްވުމާއި ދުވެލިމަތައަށް މަޑުނުކޮށް ބާރު ސްޕީޑުގައި ދުއްވުމާއި ހުއްދަ ނެތި ރޭސް ޖެހުމާއި ހުނަރު ދެއްކުމާއި ނުރައްކާތެރިކޮށް އޯވަޓޭކް ކުރުމާއި މަސްތުގެ ހާލަތުގައި ދުއްވުމާއި ފުލުހުން ހުއްޓުވުމުން ފިލުން ހިމެނެއެވެ.

ފުލުހުންގެ ބަޔާނުގައި އިތުރަށް ބުނެފައިވާ ގޮތުގައި ނުރައްކާތެރިކޮށް ދުއްވި އުޅަނދު ދުއްވި ފަރާތުގެ އިތުރުން އެ އުޅަނދުގެ ވެރިފަރާތާ މެދުވެސް ފިޔަވަޅު އެޅޭނެއެވެ. އެގޮތުން އެ ފަދަ އުޅަނދުތައް 30 ދުވަހަށް ފުލުހުންގެ ބެލުމުގެ ދަށަށް ގެންދާނެ ކަމަށާއި ކަނޑައެޅިފައިވާ މުއްދަތުގައި ވެރިފަރާތުން ހަވާލު ނުވެއްޖެ ނަމަ އޮންނަ އުސޫލުގެ ދަށުން އެ އުޅަނދުތައް ނައްތައިލާނެ ކަމަށް އެ ބަޔާނުގައިވެއެވެ. ހަމައެއާ އެކު ސަރުކާރުގެ މުއައްސަސާތަކާއި ކުންފުނިތަކުގެ ބައެއް މުވައްޒަފުން މި ފަދަ އަމަލުތަކުގައި ބައިވެރިވާކަން ފާހަގަކުރެވިފައިވާތީ އެ ފަރާތްތަކާ މެދު އިދާރީ ފިޔަވަޅު އެޅުމަށް ކަމާ ގުޅޭ މުއައްސަސާތަކާ މައުލޫމާތު ހިއްސާކުރަމުން ގެންދާ ކަމަށެވެ.

މީގެ އިތުރުން މި އަމަލުތައް ތަކުރާރުކުރާ ފަރާތްތަކުގެ ވަނަވަރު އާންމުކުރަމުން ގެންދާނެ ކަމަށާއި އާންމުން ހިއްސާކުރާ ފޮޓޯ އާއި ވީޑިއޯ ފަދަ ހެކީގެ ސައްހަކަން ކަށަވަރުކުރުމަށް ފަހު ގާނޫނީ ފިޔަވަޅު އެޅުމަށް ބޭނުންކުރާނެ ކަމަށް ވެސް ފުލުހުން ބުނެފައިވެއެވެ. މި ކަންކަމުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް ފުލުހުން ވަނީ ޝުކުރު އަދާކޮށްފައެވެ.