ޔަމަނުގެ ޙޫޘީ ޖަމާޢަތުން އިސްލާމް ދީނުގެ މުޤައްދަސް ބިން ކަމުގައިވާ ސައުދީ އަރަބިއްޔާގެ މަދީނާގައި ހުންނަ ކަރަންޓު ފޯރުކޮށްދޭ ސްޓޭޝަނަކަށް ޑްރޯން ހަމަލާއެއް ދީފައިވާ ކަމަށް ސައޫދީ ކޯލިޝަނުން ބުނެފިއެވެ.

ކޯލިޝަނުގެ ތަރުޖަމާނު ބްރިގޭޑިއާ ޖެނެރަލް ތުރުކީ އަލް މާލިކީ ބުނީ އަންގާރަ ދުވަހު ޙޫޘީން ހަމަލާ ދިނީ ޠައިބާ ކަރަންޓު ޑިސްޓްރިބިއުޝަން ސްޓޭޝަނަށް ކަމަށެވެ. އެ ހަމަލާގައި ޓްރާންސްފޯމަރަކަށް ގެއްލުންވެ ޚިދުމަތް މެދުކެނޑުނު ކަމަށެވެ.

Advertisement

ނަމަވެސް ކަރަންޓު ވިއުގައިގެ ޖުމުލަ ޚިދުމަތަށް ބުރޫ ނާރާ ކަމަށް އޭނާ ބުންޏެވެ. ޑްރޯންގެ ބައިތައް ތަޙުޤީޤުކޮށް ބެލުމުން މި ހަމަލާގެ ފަހަތުގައި ތިބީ ޙޫޘީން ކަން ކަށަވަރުވެފައިވާ ކަމަށް ވެސް ކޯލިޝަނުން ބުންޏެވެ.

ހަމަލާ އެރި ސްޓޭޝަނަކީ މަސްޖިދުއް ނަބަވީއަށް ކަރަންޓު ފޯރުކޮށްދޭ ވަސީލަތްތަކުގެ ތެރޭގައި ހިމެނޭ ސްޓޭޝަނެއް ކަމަށް ކޯލިޝަނުން ފާހަގަކޮށްފައިވެއެވެ. އިސްލާމް ދީނުގެ އެންމެ މުޤައްދަސް ދެ މިސްކިތާ ގުޅިފައިވާ ތަންތަނަށް ގަސްދުގައި ހަމަލާ ދީ ދުނިޔޭގެ އެތައް މިލިއަން މުސްލިމުންގެ ޝުޢޫރުތައް ގޯނާކުރުމަށް ޙޫޘީން މަސައްކަތްކުރާ ކަމުގެ ތުހުމަތު ކޯލިޝަނުން ކޮށްފައިވެއެވެ.

އަދި މުޤައްދަސް ބިންތައް ޙިމާޔަތްކޮށް ޙޫޘީންގެ ބާރު ކެނޑުވުމަށް ފިޔަވަޅު އެޅުން ކުރިއަށް ގެންދާނެ ކަމަށް ވެސް ކޯލިޝަނުން ބުންޏެވެ.

ސައޫދީ ރަސްގެފާނު ސަލްމާން ވަނީ މި މަހު ކުރީކޮޅު މައްކާއަށް ހަމަލާ ދިނުމަށް ޙޫޘީން ކުރި މަސައްކަތް ކުށްވެރި ކުރައްވައި އިސްލާމީ މުޤައްދަސް ތަންތަނުގެ ޙުރުމަތް ކެނޑުމަށް އެ ޖަމާޢަތުން ތަކުރާރުކޮށް ކުރާ މަސައްކަތް ފާހަގަކުރައްވައިފައެވެ. ވަލީ ޢަހުދު މުޙައްމަދު ބިން ސަލްމާން ވެސް ބުދަ ދުވަހު ޝޫރާ ކައުންސިލްގައި ވިދާޅުވީ ސައޫދީ ޢަރަބިއްޔާގެ ސަލާމަތަށް ނުރައްކާވާ ޙާލަތްތަކުގައި "ޙާޒިމް" ރައްދެއް ދިނުމަށް ފަސްނުޖެހޭނެ ކަމަށެވެ. އެ ބަޔާނުގައި ސަރަޙައްދީ ނުތަނަވަސްކަން ކުޑަކޮށް ޑިޕްލޮމެޓިކް ޙައްލުތައް ހޯދުމަށް ސައޫދީން ކުރަމުންދާ މަސައްކަތް ވެސް ފާހަގަކުރައްވައިފައިވެއެވެ.

ފަހަކަށް އައިސް ޙޫޘީން ވަނީ ސައޫދީ ޢަރަބިއްޔާއަށް ހަމަލާތައް އިތުރުކޮށް ދެ ފަރާތުގެ ނުތަނަވަސްކަން އިތުރަށް ބޮޑުވެފައެވެ.