ޔޫއޭއީގެ ދުބާއީން އިޒްރޭލުގެ ތެލްއެވީވަށް ދަތުރުކުރި ފްލައިދުބާއީގެ ފްލައިޓުގެ ކެޕްޓަން ސްމިތު މައްޗާރަށް ހަމަލާ ދީ ބޯޓު ވައްޓައިލަން މަސައްކަތް ކުރި ކަމަށް ތުހުމަތު ކުރަމުންދާ ކޯ ޕައިލެޓަކީ ދީނީ ހަރުކަށި ފިކުރުގެ މީހެއް ކަމަށް ސިފަކޮށް އެ އެއާލައިނުގެ ޕައިލެޓަކު މީޑިއާގައި ވާހަކަ ދައްކައިފި އެވެ.

މީޑިއާއަށް ދިން އިންޓަވިއުއެއްގައި އެ ޕައިލެޓް ބުނެފައިވަނީ ކޯ ޕައިލެޓުގެ ފަރާތުން އާދަޔާ ޚިލާފު އަދި ހައްދުފަހަނައެޅި ދީނީ އުޅުމެއް ފެނުނު ކަމަށެވެ. ހައްދު ފަހަނަ އެޅި އިސްލާމް ދީނުގެ އުޅުން ކަމަށް ބުނެފައިވަނީ މާ ގިނައިން ނަމާދު ކުރުމާއި އަންހެނުންނާ ސަލާމް ކުރަން ކޯޕައިލެޓު ދެކޮޅު ހެދުން ކަމަށް އެ ޕައިލެޓު ބުނެފައިވެ އެވެ.

Advertisement

ދެން ބުނެފައިވަނީ އޮމާންގެ ކޯޕައިލެޓު އެ ކުންފުންޏާއި ގުޅުނުތާ އަދިވީ ނުވަ މަސް ކަމަށެވެ.

ކޯޕައިލެޓު ބޯޓު ހައިޖެކްކޮށް ވައްޓާލަން މަސައްކަތް ކުރީކަމަށް ތުހުމަތު ކުރާއިރު އެންމެ ބޮޑަށް އެވާހަކަ ފަތުރަމުންދަނީ އިޒްރޭލާއި އެ ގައުމުގެ ހަރުކަށި ބޮޑުވަޒީރު ބެންޖަމިން ނަތަންޔާހޫ އެވެ. ނަތަންޔާހޫވެސް ވަނީ އެ ކޯޕައިލެޓަކީ އިސްލާމީ ހަރުކަށި މީހެއް ކަމަށް ސިފަކޮށް އިރާނާއި އެމީހާ އާއި ގުޅުމެތް އޮކަން ނުވަތަ ނެތްކަން ދެތިން ދުވަސް ތެރޭގައި އެނގޭނެ ކަމަށް ބުނެފައި އެވެ.

ނަމަވެސް ފްލައިޓު ތެރޭގައި ދެ ޕައިލެޓުންގެ މެދުގައި ހިނގި ހަމަނުޖެހުމުގެ އަސްލު އަދި ދެނެގަނެފައި ނުވާއިރު ފްލައިދުބާއީންވެސް ރަސްމީކޮށް މި މައްސަލައިގެ ތަފްސީލް ހާމައެއް ނުކުރެ އެވެ.

އެ ކުންފުނިން ބުނީ މައްސަލަ ތަހުގީގު ކުރަމުންދާ ކަމަށެވެ. އަދި ފްލައިދުބާއީން ވަނީ އެ އެއާލައިނުގެ އަމިއްލަ ތަޙުޤީޤު ނިމެންދެން އިސްރާއީލަށް ކުރާ ހުރިހާ ދަތުރެއް ހުއްޓައިލައިފައެވެ. ބޯޓުގައި ހިނގި ހަމަނުޖެހުމާއި ގުޅިގެން އެމަޖެންސީގައި ބޯޓު ޖެއްސި ސައުދީން ވަނީ ކޯޕައިލެޓު ހައްޔަރުކޮށް ތަހުގީގު ފަށާފައި އެވެ.

މި ހާދިސާގައި އެންމެ ބޮޑު ސުވާލު އުފެދިގެން އުޅެނީ ކުއްލިގޮތަކަށް އެއީ ޓެރަރިޒަމްގެ އަމަލެއް ކަމަށްބުނެ ކޯޕައިލެޓް މަސައްކަތް ކުރީ އިޒްރޭލު ރައްޔިތުންނާއި އެކު ބޯޓު ވައްޓާލަން ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނުމުންނެވެ. އަދި އެ ފްލައިޓުގެ ކޮންޓްރޯލް ނަގައި ސައުދީއަށް ފްލައިޓު ޖައްސަން އެމަޖެންސީ އެލާޓު ފޮނުވައި ފްލައިޓު ޖެއްސީ އެހީތެރިންގެ ގޮތުގައި އިތުރަށް ފްލައިޓުގައި ތިބި ޕައިލެޓެއްކަން އެނގުމުންނެވެ.

މި މައްސަލައިގަ ފްލައިޑުބާއީން ވަނީ މެދުއިރުމަތީގެ ހަމަނުޖެހުންތައް އިތުރުވެފައިވާތީ ފްލައިޓެއްގެ ދަތުރު ރޫޓު ބަދަލު ކުރަން ޖެހިދާނެ ކަމަށް ބަލައި، މިހާރު އެ ސަރަހައްދުގައި ކުރާ ދަތުރުތަކުގައި އިތުރު ޕައިލެޓަކު ފްލައިޓުތަކުގައި އިންނާނެ ބުނެފައި އެވެ.

މި ހާދިސާގެ ފުރިހަމަ ތަޙުޤީޤު ޔޫއޭއީ އާއި ފްލައިދުބާއީން ވެސް ކުރިއަށް ގެންދާއިރު ކޯ ޕައިލެޓުގެ ހަޤީޤީ ބޭނުމާ ގުޅޭ ގޮތުން ސީދާ ނިންމުމެއް އަދި ކަމާ ބެހޭ ފަރާތްތަކުން ނެރެފައެއް ނުވެއެވެ.