ފްލައިޑުބާއީ ފަސެންޖަރު ބޯޓުގެ ހާދިސާއާ ގުޅިގެން ބޮޑުވަޒީރު ބެންޖަމިން ނަތަންޔާހޫ ޤައުމީ ސަލާމަތާ ކުޅެ "އަގުދަށް ސިޔާސީ ކުޅިގަނޑެއް" ކުޅޭ ކަމުގެ ތުހުމަތު އިސްތިއުމާރީ އިޒްރޭލުގެ އިދިކޮޅު ލީޑަރު ޔައިރް ލަޕީދު މިއަދު ކޮށްފިއެވެ.

ނަތަންޔާހޫ އެއް ދުވަސް ކުރިން ލަޕީދަށް ދިން ސަލާމަތީ ބްރީފިންގެއް މި ހާދިސާއާ ގުޅުވައި ދައްކާ ވާހަކަތައް ލަޕީދު ދޮގުކޮށްފައިވެއެވެ. އެމެރިކާގެ ސޯޝަލް މީޑިއާ ޕްލެޓްފޯމް އެކްސްގައި ލިޔެފައިވާ ޕޯސްޓެއްގައި ލަޕީދު ބުނީ އެރޭގެ ބްރީފިންގައި އިއްޔެ ހެނދުނުގެ ބޯޓު ހާދިސާއާ ވައްތަރު ނުވަތަ އެ ހަނދާންކޮށްދޭ ނުވަތަ އޭގެ ކުޑަ އިޝާރާތެއްކޮށްފައި ނުވާކަމަށެވެ.

Advertisement

ހާދިސާ ސިޔާސީ ބޭނުމަކަށް ބޭނުންކުރާ ކަމުގެ ތުހުމަތުވެސް ލަޕީދު ކޮށްފައިވެއެވެ. އޭނާ ބުނީ ތަރުޖަމާނު މެދުވެރިކޮށް ނަތަންޔާހޫ ދައްކާ ވާހަކައިން ހެކިކޮށްދެނީ އަދި ކުރިންވެސް ސާފުވި ކަމަކީ ޒިންމާދާރުކަމެއް ނެތް ބައެއް އިޒްރޭލުގެ ސަލާމަތީ ކަންކަމުގެ ޚަރަދުގައި ދެރަވަރު ސިޔާސީ ކުޅިގަނޑު ކުޅެނީ ކަމަށެވެ.

އެރޭގެ ބައްދަލުވުމަށްފަހު ލަޕީދު ބުނީ "ރައްޔިތުން ބިރުގަންނުވަންޖެހޭ ސަބަބެއް ނެތް" ކަމަށާއި ސަލާމަތީ ނުރައްކާތަކާ "ޕްރޮފެޝަނަލްކޮށް އަދި ޒިންމާދާރުކޮށް" ކުރިމަތިލާންޖެހޭ ކަމަށެވެ.

އިއްޔެގެ ހާދިސާ ހިނގީ ދުބާއީން ޓެލް އަވީވަށް ދަތުރުކުރި ފްލައިޑުބާއީގެ ފްލައިޓް އެމެޖެންސީ ކޯޑާއި ޣައިރު ޤާނޫނީ ހެއިޖެކިން ކޯޑު ފޮނުވައި މިސްރާބު ބަދަލުކޮށް ސައޫދީ ޢަރަބިއްޔާގެ ތަބޫކަށް ރައްކާތެރިކަމާ އެކު ޖެއްސުމުންނެވެ. އެ ވަގުތު އިޒްރޭލުގެ ހަނގުރާމަ މަތީ ޖެޓުތައް ވައިގެ ސަރަޙައްދަށް ނެރެފައިވެއެވެ. ފުރަތަމަ ހައިޖެކް ނުވަތަ ސެކިއުރިޓީ ހާދިސާއެއް ކަމަށް ތަހުގީގުކުރި ނަމަވެސް ފަހުގެ ރިޕޯޓުތައް ބުނާ ގޮތުން ކޮކްޕިޓް ތެރޭގައި ހިންގީ މާރާމާރީއެކެވެ.

ތަބޫކުގެ ޕްރިންސް ސުލްތާން ބިން ޢަބްދުލްޢަޒީޒް އިންޓަނެޝަނަލް އެއާޕޯޓުން ނެރުނު ބަޔާނެއްގައި ބުނެފައިވާ ގޮތުގައި ބޯޓުގެ ކެޕްޓަނާއި ފަސްޓް އޮފިސަރަށް އަނިޔާވެ ފަރުވާ ދިނުމަށް ހޮސްޕިޓަލަށް ބަދަލުކޮށްފައިވެއެވެ. މި ހާދިސާ ހިނގީ އިޒްރޭލުގެ ދާޚިލީ ސިޔާސީ ވާދަވެރިކަން ވަރުގަދަވެފައިވާ ދަނޑިވަޅެއްގައެވެ.