އިސްތިއުމާރީ އިސްރާއީލުން ގައްޒާގެ އެކި ސަރަހައްދުތަކަށް ބުދަ ދުވަހު ދިން ވައިގެ ހަމަލާތަކާއި ޓޭންކު ބަޑީގެ ހަމަލާތަކުގައި ގިނަ ބަޔަކު ޝަހީދުވެ ޒަހަމްވެފައިވާ ކަމަށް ފަލަސްތީނުގެ އިދާރާތަކާއި ސިއްހީ މަސްދަރުތަކާ ހަވާލާދީ އަލް ޖަޒީރާއިން ރިޕޯޓުކޮށްފިއެވެ.

ގައްޒާ ސިޓީގެ ހުޅަނގު ދެކުނުގައި އޮންނަ ތާލް އަލް ހަވާ އަވަށުގައި ދަތުރުކުރަމުން ދިޔަ ވެހިކަލަކަށް ޑްރޯނެއް ބޭނުންކޮށް ދިން ހަމަލާގައި ހަ މީހަކު ޝަހީދުވެފައިވެއެވެ. ފަލަސްތީނުގެ ރެޑް ކްރެސެންޓު ޖަމިއްޔާއިން ބުނީ 13 ޒަހަމްވެރިޔަކު އެ ޖަމިއްޔާގެ ކްރޫތައް މެދުވެރިކޮށް އަލް ގުދުސް ހޮސްޕިޓަލަށް ގެންގޮސްފައިވާ ކަމަށެވެ. ޒަހަމްވެރީންގެ ހާލު ސީރިއަސް ކަމަށް ސިއްހީ މަސްދަރުތަކުން ހާމަކޮށްފައިވެއެވެ. ވަކީން ގައްޒާ ސިޓީގެ އައް ޝިފާ ހޮސްޕިޓަލް ކައިރީގައި ހުރި ގެއެއްގެ އެޕާޓްމެންޓަކަށް ދިން ހަމަލާގައި މަދުވެގެން އެއް އަންހެނަކު ޝަހީދުވެފައިވާ ކަމަށް ފަލަސްތީނުގެ ރަސްމީ ހަބަރު ފެތުރާ ވަފާ އެޖެންސީން ރިޕޯޓުކޮށްފައިވެއެވެ.

Advertisement

ހާން ޔޫނިސްގެ އުތުރުގައި ސަލާހުއްދީން މަގުގައި ތިބި ބަޔަކަށް އަމާޒުކޮށް ދިން ހަމަލާގައި 33 އަހަރުގެ ފަލަސްތީނު ރައްޔިތަކު ޝަހީދުވެ ކުޑަކުއްޖަކު ހިމެނޭ ގޮތަށް އިތުރު ބަޔަކު ޒަހަމްވެފައިވާ ކަމަށް ވަފާ އިން ބުނެފައިވެއެވެ. ގައްޒާގެ ދެކުނުގައި ރައްޔިތުން ހިޔާވަހިކަން ހޯދައިގެން ތިބި ތަނަކަށް ޑްރޯނުން ދިން ހަމަލާގައި ދެ ކުޑަކުދީން ހިމެނޭ ގޮތަށް ހަތަރު މީހަކު ޒަހަމްވެ ދައިރް އަލް ބަލަހް ސަރަހައްދުގެ ދެކުނު އިރުމަތީން ދެ މީހަކަށް ސީރިއަސް ޒަހަމްތައް ލިބި ހާން ޔޫނިސްގެ ދެކުނަށް ޓޭންކު ބަޑީގެ ހަމަލާ ދީފައިވާ ކަމަށްވެސް ރިޕޯޓުކޮށްފައިވެއެވެ.

ގައްޒާގެ ސިއްހީ ވުޒާރާއިން ބުދަ ދުވަހު ހެނދުނު ނެރުނު ތަފާސް ހިސާބުތައް ދައްކާ ގޮތުން ފާއިތުވި 24 ގަޑިއިރުގެ ތެރޭގައި ހޮސްޕިޓަލުތަކަށް ނުވަ މީހެއްގެ ހަށިގަނޑު ގެނެސްފައިވެއެވެ. އޮކްޓޫބަރު މަހު އެއްބަސްވެވުނު ހަމަލާ ބަދަލުކުރުން ހުއްޓައިލުމުގެ އެއްބަސްވުމަށް ފަހު މިހާތަނަށް މަދުވެގެން 1,431 ފަލަސްތީނު ރައްޔިތުން ޝަހީދުވެ 5,026 މީހުން ޒަހަމްވެފައިވާ ކަމަށް އެ ވުޒާރާއިން ހާމަކޮށްފައިވެއެވެ.

އަލް ޖަޒީރާގެ ނޫސްވެރިޔާ ހދއރ ބުނީ "ގައްޒާގައި ހަމަލާ ބަދަލުކުރުން ހުއްޓައިލުމުގެ އެއްބަސްވުމެއް އޮންނަން ޖެހޭ އެކަމަކު އިސްރާއީލު ސިފައިންގެ އަނިޔާވެރިކަމަށް ނިމުމެއް ނެތް. ކޮންމެ ދުވަހަކު ފަލަސްތީނު ރައްޔިތުން ޝަހީދުކޮށް ޒަހަމްކޮށް އިންސާނީ ހާލަތު ދަނީ ގޯސްވަމުން" ކަމަށެވެ. "ހުރިހާ އެންމެން ވެސް ސުޕާމާކެޓަށް ދާން ދަރީން ސްކޫލަށް ގެންދާން އާދައިގެ ދިރިއުޅުން ޖީއުޅެން ބިރުގަނޭ" ކަމަށް ވެސް ހދއރ ބުނެފައިވެއެވެ.

2023 ވަނަ އަހަރުގެ އޮކްޓޫބަރު މަހުން ފެށިގެން އިސްތިއުމާރީ އިސްރާއީލުން ގައްޒާގެ ފަލަސްތީނު ރައްޔިތުންނާ ދެކޮޅަށް ހިންގާ ގަތުލުއާންމުގައި މިހާތަނަށް 74,032 މީހުން ޝަހީދުވެ 175,142 މީހުން ޒަހަމްވެފައިވާ ކަމަށް ސިއްހީ އިދާރާތަކުން ހާމަކޮށްފައިވެއެވެ. އދ. ގެ ސެޓެލައިޓް ސެންޓަރުން އޮގަސްޓް މަހު ހެދި ދިރާސާއަކުން ދައްކާ ގޮތުގައި ހަމަލާ ބަދަލުކުރުން ހުއްޓައިލުމުގެ އެއްބަސްވުމަށް ފަހުވެސް ގައްޒާގައި ހަލާކުވެފައިވާ އިމާރާތްތަކުގެ އަދަދު ނުވަ އިންސައްތަ އިތުރުވެފައިވެއެވެ. ހަނގުރާމަ ފެށުނީއްސުރެ ގައްޒާގެ ގާތްގަނޑަކަށް 200,000 އިމާރާތުގެ 82 އިންސައްތަ އަށް ގެއްލުން ލިބި އެ ތަންތަނުގެ ތިން ބައިކުޅަ ދެ ބައި ބިމާ ހަމަވެފައިވާ ކަމަށް އދ. ގެ ތަފާސް ހިސާބުތަކުން ހާމަވެއެވެ.