އެމެރިކާގެ ޓެނެސީ ސްޓޭޓްގައި ގައިދީއެއްގެ މައްޗަށް މަރުގެ ހުކުމް ތަންފީޒުކުރުމުގެ ގޮތުން ދެ އިންޖެކްޝަން ދިނުމުންވެސް އެ މީހާ މަރުނުވެ ނޭވާލަމުން ދިޔުމާ ގުޅިގެން އެ މީހާ އިމަޖެންސީގައި ހޮސްޕިޓަލަކަށް ބަދަލުކޮށްފިއެވެ.

މި ހާދިސާގައި ސަލާމަތްވެފައިވަނީ އުމުރުން 50 އަހަރުގެ ކްރިސްޓާ ޕައިކް ނަމަކަށް ކިޔާ އަންހެނެކެވެ. ކްރިސްޓާގެ މައްޗަށް މަރުގެ ހުކުމް އިއްވީ 1995 ވަނަ އަހަރު އޭނާގެ އުމުރުން 18 އަހަރުގައި އުމުރުން 19 އަހަރުގެ ކްލާސްމޭޓެއް މެރުމުގެ ކުށް ސާބިތުވެގެންނެވެ.

Advertisement

ރިޕޯޓުތައް ބުނާ ގޮތުގައި ރިވަބެންޑް މެކްސިމަމް ސެކިއުރިޓީ އިންސްޓިޓިއުޝަންގައި ކްރިސްޓާއަށް ޕެންޓޯބާބިޓަލް މާއްދާ ހިމެނޭ ދެ އިންޖެކްޝަން ޖެހިއެވެ. އެހެންނަމަވެސް 40 މިނެޓު ފާއިތުވީ އިރުވެސް އޭނާ ނޭވާލައި ދިރިހުރި ކަމަށް މަންޒަރު ދުށް ފަރާތްތަކާއި ކްރިސްޓާގެ ޤާނޫނީ ވަކީލުން ބުނެފައިވެއެވެ.

އެ ހިސާބުން ހުކުމް ތަންފީޒުކުރުމުގެ މަސައްކަތް ވަގުތުން ހުއްޓައިލައި ކްރިސްޓާ ވަނީ އެމްބިއުލެންސެއްގައި ޖަލާ ވަކީން ހުރި ހޮސްޕިޓަލަކަށް ގެންގޮސްފައެވެ. ޓެނެސީގެ ކަރެކްޝަނަލް އިދާރާއިން ވަނީ ކްރިސްޓާ ހޮސްޕިޓަލަށް ބަދަލުކުރި ކަން ކަށަވަރުކޮށްދީފައެވެ.

ނަމަވެސް އޭނާގެ ޞިއްޙީ ހާލަތާ ގުޅޭ އެއްވެސް ތަފްޞީލެއް އެ އިދާރާއިން ހާމަކޮށްފައެއް ނުވެއެވެ.

މި ހުކުމް ތަންފީޒުވީ ނަމަ ފާއިތުވި 200 އަހަރުގެ ތެރޭގައި ޓެނެސީ ސްޓޭޓްގައި މަރުގެ އަދަބު ދެވޭ ފުރަތަމަ އަންހެނާއަށް ކްރިސްޓާ ވީހެވެ. އިންޖެކްޝަން ދިނުމުގެ ކުރީންވެސް ކްރިސްޓާގެ ވަކީލުން ވަނީ ބޭނުންކުރާ މާއްދާގެ ސަބަބުން ގައިދީއަށް ނުހަނު ވޭން އެޅޭނެ ކަމަށް ބުނެ ކޯޓަށް މައްސަލައެއް ހުށަހަޅައިފައެވެ.

އެމެރިކާގައި މަރުގެ އަދަބު ދިނުމަށް ބޭނުންކުރާ އިންޖެކްޝަން ނާކާމިޔާބުވާ ހާދިސާތައް ގިނަވަމުންދާތީ އިންސާނީ ޙައްޤުތަކާ ބެހޭ ޖަމާޢަތްތަކާއި ޞިއްޙީ ދާއިރާގެ ތަޖުރިބާކާރުން ދަނީ މި ވަސީލަތާ މެދު ކަންބޮޑުވުން ފާޅުކުރަމުންނެވެ.