އިންޑިއާގެ މަހާރާޝްތުރާ ސްޓޭޓުގެ ރައިގަޅް ޑިސްޓްރިކްޓުގެ ގޮނޑުދޮށަކަށް ދަތުރު ދިޔަ ދަރިވަރުންގެ ގުރޫޕެއްގެ ތެރެއިން އަށް ކުއްޖަކު ގެނބިގެން މަރުވެއްޖެއެވެ.

މަރުވީ ޕޫނޭ ޑިސްޓްރިކްޓުގެ އަލަންދީގައި ހިންގާ ވިނާޒް އެކެޑެމީ ނަމަކަށް ކިޔާ އަމިއްލަ ކޯޗިން އިންސްޓިޓިއުޓެއްގައި ކިޔަވަމުންދިޔަ 11 އަދި 12ގެ ގްރޭޑުގެ ދަރިވަރުންނެވެ. ފުލުހުން ބުނި ގޮތުގައި 25 ފިރިހެން ކުދިންނާއި 17 އަންހެން ކުދިންނާއި ހަ ޓީޗަރުން ހިމެނޭ ގޮތަށް ޖުމްލަ 48 މީހުންގެ ގުރޫޕެއް އެ ގޮނޑުދޮށަށް ދަތުރު ދިޔަ ކަމަށެވެ.

Advertisement

ގެނބުނު އަށް ދަރިވަރުން ކަނޑަށް ފައިބައި ފެންގަނޑުގެ ފުންމިނާއި އޮއެވަރު ރަނގަޅަށް ނޭނގި ކުރިއަށް ދިޔުމުގެ ސަބަބުން އޮޔާ ދަމައިގެން ދިޔައީ ކަމަށް ފުލުހުން ބުނެއެވެ. އެ ސަރަޙައްދަށް ސާޗް އެންޑް ރެސްކިއު ޓީމުތައް ވަގުތުން ފޮނުވައި ހުރިހާ ހަށިގަނޑެއް ހޯދައިފައިވެއެވެ.

ފުލުހުން ބުނީ މިއަދު ހަވީރު ވިއިރު ގެއްލުނު ހުރިހާ ދަރިވަރުންގެ ހަށިތައް ފެނިފައިވާ ކަމަށެވެ. އެ ސަރަޙައްދުގެ ރައްޔިތުންނާއި ރެސްކިއު ޓީމުތަކުން އަށް ފިރިހެން ކުދިން ނަގައި ފަރުވާ ދިނުމަށް ބޯލީގެ ޕްރައިމަރީ ހެލްތު ސެންޓަރަށް ގެންދިޔައިރު އެ ކުދިން ވަނީ މަރުވެފައި ކަމަށް ސެންޓަރުން ވަނީ ކަނޑައަޅާފައި އެވެ.

މީގެ ދެ ހަފުތާ ކުރިން ހަމަ މަހާރާޝްތުރާގެ ޕަލްގާރް ޑިސްޓްރިކްޓުގައިވެސް އެފަދަ ހާދިސާއެއް ހިނގައިފައިވެއެވެ.

ގަނޭޝޯތްސަވް ބަންދުގެ ތެރޭގައި ވައިތަރްނާ ކޯރުގެ ކައިރީގައި ރީލް ހެދުމަށް ގޮސް އުޅުނު ސްކޫލް އެކުވެރިންގެ ތެރެއިން ގީތެޝް ޕާޓިލް އާއި މާނަވް ރާތޯޅް ނަމަކަށް ކިޔާ ދެ ފުރާވަރުގެ ކުދިން ފެންގަނޑުގެ ފުންމިން ނޭނގި ކޯރަށް ފުންމައިލުމުން ގެނބިގެން މަރުވެފައިވެއެވެ. އެ ދެ ކުދިން ކޯރަށް ފައިބައިގެން ދިޔައިރު ތިންވަނަ ކުއްޖެއް ކަމަށްވާ އަމޭ ޖާދަވް ފޯނުން ވީޑިއޯ ކުރަމުންދިޔަ ކަމަށް ފުލުހުން ބުނެއެވެ.

މަހާރާޝްތުރާގައި ފެންގަނޑުތަކުގެ ފުންމިން ރަނގަޅަށް ދެނެނުގަނެ އެރުމުގެ ސަބަބުން ގެނބިގެން މަރުވުމުގެ ހާދިސާތައް ތަކުރާރުވަމުންދާ ކަމަށް ފުލުހުންނާއި ހަވާލާދީ ރިޕޯޓުތައް ބުނެ އެވެ.