މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑިރެކްޓަރުންގެ ބޯޑުގައި ހިމެނިވަޑައިގެންނެވި އެގްޒެކެޓިވް ޑިރެކްޓަރު މުޙައްމަދު މިހާދާއި ބޯޑު މެންބަރު ސަޙަރު ވަޙީދު މިއަދު އެ ބޯޑުން ވަކިކޮށްފިއެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މި ނިންމުން ޢާންމުކޮށްފައިވާ އިރު ދެ ބޭފުޅުން ވަކިކުރެއްވި ސަބަބެއް ހާމަކޮށްފައެއް ނުވެއެވެ.

Advertisement

މިހާދު އެމްއޭސީއެލް ބޯޑަށް ޢައްޔަންކުރެއްވީ 2025 ވަނަ އަހަރުގެ އެޕްރީލް މަހުގެ 26 ވަނަ ދުވަހުއެވެ. އިނގިރޭސިވިލާތުގެ ސީމާ (ސީއައިއެމްއޭ) ކޮލިފައިޑް ޗާޓަޑް މެނޭޖްމެންޓް އެކައުންޓެންޓެއްގެ ގޮތުގައި މާލީ އަދި ވިޔަފާރީގެ ހިންގުމުގެ ދާއިރާއިން ފުޅާ ތަޖުރިބާއެއް ހޯއްދަވާފައިވާ މިހާދު ވަނީ ކުރިން އެސްޓީއޯގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަގާމާއި އެ ކުންފުނީގެ ބޯޑު މެންބަރުކަން ފުރުއްވައިފައެވެ. އޭގެ އިތުރުން މިފްކޯ މޯލްޑިވްސް ސްޓޭޓް ޝިޕިން (އެމްއެސްއެސް)ގެ ބޯޑު މެންބަރުކަމާއި ފިއުލް ސަޕްލައިސް މޯލްޑިވްސް (އެފްއެސްއެމް)ގެ ޗެއާމަންކަމާއި އޮޑިޓް ފާމް ކޭޕީއެމްޖީ މޯލްޑިވްސްގެ ޕާޓްނަރެއްގެ ގޮތުގައި ވެސް އޭނާ ވަނީ ޚިދުމަތް ކުރައްވައިފައެވެ.

ސަޙަރު ވަޙީދު އެމްއޭސީއެލް ބޯޑާ ގުޅިވަޑައިގެންނެވީ 2023 ވަނަ އަހަރުގެ ޑިސެމްބަރު މަހުގެ 24 ވަނަ ދުވަހުއެވެ. މާލީ ދާއިރާގެ އެކި މަގާމުތަކުގައި 17 އަހަރަށް ވުރެ ދިގު މުއްދަތެއްގައި ޚިދުމަތް ކުރައްވާފައިވާ ސަޙަރަކީ ޕްރޮފެޝަނަލް ޗާޓަޑް ބޭންކަރެކެވެ. ސަޙަރު ވަނީ އިނގިރޭސިވިލާތުގެ ލަންޑަން ސްކޫލް އޮފް އިކޮނޮމިކްސް (އެލްއެސްއީ) އިން އިކޮނޮމިކްސްގެ ފުރަތަމަ ޑިގްރީ އަދި ޔުނިވާސިޓީ އޮފް ވެސްޓް އިންގްލެންޑުން ކޮމާޝަލް ލޯ ދާއިރާއިން މާސްޓާސް ޙާޞިލުކުރައްވައިފައެވެ.

ދެ ބޭފުޅުން ވަކިކުރެއްވި ސަބަބާ ގުޅޭ ގޮތުން ޕީސީބީން އިތުރު ތަފްސީލެއް ދީފައެއް ނުވެއެވެ.