ޗައިނާގެ ރައްޔިތުންގެ ޖުމްހޫރިއްޔާ އުފެދުނުތާ 77 އަހަރު ފުރުމާ ގުޅިގެން ރައީސުލްޖުމްހޫރިއްޔާ ޗައިނާގެ ރައީސް ޝީ ޖިންޕިންގއަށާއި ޗައިނާ ސަރުކާރަށާއި އެ ޤައުމުގެ ރައްޔިތުންނަށް ތަހުނިޔާ ފޮނުއްވައިފިއެވެ.

ރައީސް ފޮނުއްވި ތަހުނިޔާ މެސެޖުގައި ދެ ޤައުމުގެ ދެމެދުގައި އޮތް ގުޅުމަކީ އިތުބާރާއި އިޙްތިރާމާއި ތަރައްޤީގެ މައްޗަށް ބިނާވެފައިވާ ޒަމާންވީ ރަޙްމަތްތެރިކަމެއް ކަމުގައި ފާހަގަކުރައްވާފައިވެއެވެ.

Advertisement

ރާއްޖޭގެ ތަރައްޤީގެ ދަތުރުގައި ޗައިނާއަކީ ދެގޮތެއް ނުވެ ހުރި ބައިވެރިއެއް ކަމަށާއި ދެ ޤައުމުގެ ގުޅިގެން ކުރެވޭ މަސައްކަތްތަކުން ރައްޔިތުންނަށް ފައިދާހުރި ފުރުޞަތުތައް ލިބެމުންދާ ކަމުގައި ވެސް އެ މެސެޖުގައި ވިދާޅުވެފައިވެއެވެ.

ކުރިއަށް އޮތް ތަނުގައި ދެ ޤައުމުގެ ދެމެދުގައި އޮތް ކޮމްޕްރިހެންސިވް ސްޓްރެޓީޖިކް ކޯޕަރެޓިވް ޕާޓްނާޝިޕް އިތުރަށް ހަރުދަނާ ކުރުމަށާއި ގުޅުންތައް އާ ހަރުފަތަކަށް ގެންދިޔުމަށް ސާބިތުވެ ތިއްބެވި ކަމުގައި ރައީސް ވިދާޅުވެފައިވެއެވެ.

ދެ ޤައުމުގެ ރައްޔިތުންގެ މެދުގައި އޮތް ރަޙްމަތްތެރިކަން އިތުރަށް ވަރުގަދަވެގެން ދިޔުމަށާއި ޗައިނާއަށް ކާމިޔާބީއާއި ކުރިއެރުން ލިބިގެން ދިޔުމަށް ރައީސް ވަނީ އެ ތަހުނިޔާ މެސެޖުގައި އެދިވަޑައިގެންފައެވެ.