ސްޓްރެޓެޖިކް ގޮތުން މުހިންމު ހޮރްމޫޒް ކަނޑުއޮޅީގެ މައްޗަށް އެމެރިކާއިން ގާތްގަނޑަކަށް ފުރިހަމަ ބާރު ހޯދާފައިވާ ކަމަށާއި ތެޔޮ ސަޕްލައި ރެކޯޑް މިންވަރަކަށް އިތުރުވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

ހިސްޕެނިކް ހެރިޓޭޖް މަހުގެ މުނާސަބަތުގައި ބޭއްވި ހަރަކާތެއްގައި ވާހަކަ ދައްކަމުން ޓްރަމްޕް ބުނީ ފާއިތުވި ތިން ދުވަހުގެ ތެރޭގައި ހޮރްމޫޒް ކަނޑުއޮޅިން ތާރީޚުގައިވެސް ދެކެފައި ނުވާ މިންވަރަކަށް ތެޔޮ ބޭރުކޮށްފައިވާ ކަމަށެވެ.

Advertisement

އޭނާ ބުނީ ހޮރްމޫޒް ކަނޑުއޮޅީގެ ގާތްގަނޑަކަށް ފުރިހަމަ ކޮންޓްރޯލް އޮތީ އެެމެރިކާގެ އަތުގައި ކަމަށެވެ. އަދި ހޮރްމޫޒް ކަނޑުއޮޅީގެ ތާރީޚުގައި ފާއިތުވި ތިން ދުވަހު ތެޔޮ ދަުއުރު ކުރެވުނު ވަރަށް ކުރެވިފައި ނުވާކަމަށެވެ.

މީގެ އިތުރުން އީރާނުގެ ސިފައިން "ހުރިހާ ގޮތަކުން ނެތިކޮށްލެވިފައިވާ" ކަމަށް ޓްރަމްޕް ތަކުރާރުކޮށް ބުނެ ހަނގުރާމަ ވަރަށް އަވަހަށް ކާމިޔާބު ކުރެވޭނެ ކަމަށް ބުންޏެވެ.

"ކޮންމެވެސް ގޮތަކުން ވަރަށް އަވަހަށް އެ ހަނގުރާމަ ކާމިޔާބު ކުރާނަން" ކަމަށް ޓްރަމްޕް ބުންޏެވެ.

މި އަހަރުގެ ފެބްރުއަރީ މަހު އެމެރިކާއާއި އިސްތިއުމާރީ އިސްރާއީލު ގުޅިގެން އީރާނާ ދެކޮޅަށް ހަނގުރާމަ ފެށީ ކަމަށް އެނާދޯލޫ އެޖެންސީން ރިޕޯޓުކޮށްފައިވެއެވެ. އެ ހަމަލާތަކަށް ރައްދުގައި ތެހެރާނުން ވަނީ އިސްރާއީލާއި ސަރަޙައްދުގައި ހުރި އެމެރިކާގެ އަމާޒުތަކަށް ހަމަލާ ދީފައެވެ. އެޕްރީލް މަހު ދެ ފަރާތުން ހަނގުރާމަ ހުއްޓައިލުމުގެ އެއްބަސްވުމަކަށް އައިސްފައިވެއެވެ.

ޖޫން މަހު ވޮޝިންގޓަނާއި ތެހެރާނުން ހޮރްމޫޒް ކަނޑުއޮޅީގައި ދަތުރުފަތުރުގެ މިނިވަންކަމާ ގުޅޭ އެއްބަސްވުމެއްގައި ސޮއިކުރި ނަމަވެސް އެ ކަނޑުއޮޅީގެ ސެކިއުރިޓީއާ ގުޅޭ ޚިޔާލުތަފާތުވުންތަކުގެ ސަބަބުން އެ އެއްބަސްވުން ތަންފީޒުކުރުން ވަނީ ހުއްޓިފައެވެ.