މަގު ކޮނުމުގެ މަސައްކަތްތަކުގެ ތެރެއިން ކަރަންޓު ކޭބަލްތަކަށް ލިބޭ ގެއްލުންތައް އިތުރުވަމުންދާތީ އެފަދަ ހާދިސާތަކުގެ ޒިންމާ އުފުލަންޖެހޭ ފަރާތްތަކުގެ އަތުން މަރާމާތުގެ ޚަރަދު ހޯދުމަށް ސްޓެލްކޯއިން ނިންމައިފިއެވެ.

އެ ކުންފުނީގެ ކަރަންޓު ވިއުގައިގައި ހިމެނޭ ކޭބަލްތަކަށް އެކި ފަރާތްތަކުން ހިންގާ މަގު ކޮނުމުގެ މަޝްރޫޢުތަކުގެ ތެރެއިން ގެއްލުންވެ ކަރަންޓު ކެނޑުމުގެ ހާދިސާތައް ދުވަހެއް ދުވަހަކަށް ގިނަވަމުންދާ ކަމަށް ސްޓެލްކޯއިން ބުނެފައިވެއެވެ. މި ހާދިސާތަކާ ގުޅިގެން ރައްޔިތުންނަށް ބޮޑެތި ދަތިތަކާ ކުރިމަތިލާން ޖެހެމުންދާ ކަމަށް ވެސް އެ ކުންފުނިން ފާހަގަކޮށްފައިވެއެވެ.

Advertisement

ސްޓެލްކޯގެ މި ނިންމުމުގެ ދަށުން މަގު ކޮނުމުގެ ތެރެއިން އިހުމާލުވެގެން ކޭބަލަކަށް ގެއްލުމެއް ލިބިއްޖެ ނަމަ ޚިދުމަތް އަލުން ދިނުމަށް ހިނގާ ހުރިހާ ޚަރަދެއް އެ ފަރާތަކުން ހޯދާނެއެވެ. މިއީ ކަރަންޓު ކެނޑުމުގެ ސަބަބުން ރައްޔިތުންނަށް ދިމާވާ ދަތިތައް މަދުކޮށް ދެމެހެއްޓެނިވި ގޮތެއްގައި ޚިދުމަތް ފޯރުކޮށްދިނުމަށް ނިންމި ނިންމުމެއް ކަމަށް އެ ކުންފުނިން ބުނެފައިވެއެވެ.

މީގެ އިތުރުން މަގު ކޮނެގެން މަސައްކަތް ކުރާ އެންމެހައި ފަރާތްތަކުން ކަރަންޓު ވިއުގައަށް ގެއްލުން ނުލިބޭނެ ގޮތަށް ޒިންމާދާރުކަމާ އެކު މަސައްކަތް ރާވައި ކުރިއަށް ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.

މިދިޔަ ހަފްތާގައި މިފަދަ ދެ ހާދިސާއެއް ހުޅުމާލޭ ފޭސް އެކެއްގައި ހިނގާފައިވެ އެވެ.