މެލޭޝިއާގެ ކުރީގެ ބޮޑުވަޒީރު މަހާތީރު މުޙައްމަދުގެ އަނބިކަނބަލުން އަވަހާރަވުމާ ގުޅިގެން ވަރުބަލިފުޅުވެ ކުއާލަ ލަމްޕޫރުގެ ނޭޝަނަލް ހާޓް އިންސްޓިޓިއުޓުގައި ރޭ އެޑްމިޓްކޮށްފިއެވެ.

ޢުމުރުން 101 އަހަރުގެ މަހާތީރު ހޮސްޕިޓަލަށް ގެންދެވީ އަންގާރަ ދުވަހުގެ ރޭ ކަމަށް އެ ބޭފުޅާގެ އެހީތެރިޔާ ސޫފީ ޔޫސުފް ބުނެފައިވެއެވެ. ހޮސްޕިޓަލުގައި ބާއްވައިގެން ފަރުވާ ދެމުންދާ ސީދާ ސަބަބު ރަސްމީ ޑައެގްނޯސިސް ލިބެންދެން ކަށަވަރުވެފައެއް ނުވެއެވެ.

Advertisement

ނަމަވެސް ސޫފީ ބުނި ގޮތުގައި ހޯމަ ދުވަހު އަނބިކަނބަލުން ސީތީ ހަސްމާ މުޙައްމަދު ޢަލީ އަވަހާރަވުމަށް ފަހު މަހާތީރަށް އެކަށީގެންވާ އަރާމު ލިބިވަޑައިނުގެން ވަރުބަލިފުޅުވެފައިވެއެވެ. އަދި އަނބިކަނބަލުން ނެތުމުގެ ދެރަ ވަރަށް ބޮޑަށް އިހުސާސް ކުރައްވަމުންދާ ކަމަށް ބުނެފައިވެ އެވެ.

ޢުމުރުން 100 އަހަރުގައި އަވަހާރަވި ސީތީ ހަސްމާއަކީ ޑޮކްޓަރެއްގެ އިތުރުން ޢާންމު ޞިއްޙަތަށް ވަކާލާތު ކުރެއްވި ބޭކަނބަލެކެވެ. އެ ދެ ބޭފުޅުންގެ ހަތް ދަރިން ތިއްބަވައެވެ.

އަނބިކަނބަލުންގެ ވަކިވެވަޑައިގަތުމާ މެދު ފުން ހިތާމައެއްގައި ހުންނެވި މަހާތީރު ޖަނާޒާގެ ތެރޭގައި ކުރީގެ ރަސްގެފާނު އަރިހު ކީރިތި ކުރައްވަމުން މިއަދު އެކަމަނާ އަވަހާރަވެދާނެ ކަމަށް ހީވެސް ނުކުރަން ބުނި މަންޒަރު އެ ބޭފުޅާގެ ރަސްމީ އިންސްޓަގްރާމް އެކައުންޓުގައި ޢާންމުކޮށްފައިވެއެވެ.

ދެ ފަހަރެއްގެ މަތިން ބޮޑުވަޒީރުކަން ކުރައްވައި ދުނިޔޭގައި އެންމެ ދޮށީ ޢުމުރުގައި ވެރިކަން ކުރެއްވި ލީޑަރުގެ ލަގަބު ހޯއްދެވި މަހާތީރު ފުރަތަމަ 1981 އިން 2003 އަށް އަދި ދެވަނަ ފަހަރަށް 92 އަހަރުގައި 2018 އިން 2020 އަށް ބޮޑުވަޒީރުކަން ކުރެއްވިއެވެ.

ފަހުގެ އަހަރުތަކުގައި ހިތުގެ ބައިޕާސް ސާޖަރީތައް ހައްދަވާފައިވާ އިރު މި އަހަރު ޖެނުއަރީ މަހު ވެއްޓިވަޑައިގެން އުނަގަނޑުފުޅު ބިންދައިގެން ގޮސް ވެސް ހޮސްޕިޓަލުގައި ފަރުވާ ހޯއްދެވިއެވެ.