ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާތަކަށް ފުލުހުންގެ ޚިދުމަތުން ބޭސްފަރުވާ ކޮށްދޭން ޖެހޭ ގޮތަށް ފުލުހުންގެ ވަޒީފާގެ ޤަވާއިދު އިސްލާހުކޮށްފިއެވެ.

އެ ޤަވާއިދަށް ގެނައި އިސްލާހުގައިވާ ގޮތުން، ޚިދުމަތުގައި ތިބި ފުލުހުންގެ އާއިލާތަކަށް ބޭސްފަރުވާ ކޮށްދޭ އުސޫލުން، ވާޖިބު އަދާކުރަމުން ދަނިކޮށް ނިޔާވި ފުލުހުންގެ އާއިލާތަކަށް ވެސް ބޭސްފަރުވާ ކޮށްދޭން ޖެހޭނެއެވެ. އޭގެ އިތުރުން، ވާޖިބު އަދާކުރަމުން ދަނިކޮށް ނިޔާވާ ފުލުހުންގެ ޖަނާޒާ ވަކި ރަސްމިއްޔާތެއްގެ ގޮތުގައި ބޭއްވުމަށް ނިންމިދާނެ ކަމަށް ވެސް އެ ޤަވާއިދުގައިވެއެވެ.

Advertisement

ނަމަވެސް އެ ގޮތަށް ނިންމަންވާނީ، ފުލުސް އޮފިސަރު ނިޔާވި ހާލަތާއި ހާދިސާ ހިނގި ގޮތާއި އެ މުވައްޒަފު އަދާކުރި ދައުރަށް ބެލުމަށް ފަހު އެގްޒެކެޓިވް މެނޭޖްމަންޓު ބޯޑަށް ހުށަހަޅައި، އެ ބޯޑުން ނިންމާ ގޮތެއްގެ މަތިން ކަމަށް އެ އިސްލާހުގައިވެއެވެ.

ފުލުހުންގެ 93 ވަނަ އަހަރީ ދުވަހުގެ މުނާސަބަތުގައި ބޭއްވި ހަފުލާގައި ކޮމިޝަނަރ އޮފް ޕޮލިސް އަހުމަދު މުޙައްމަދު ވިދާޅުވެފައިވަނީ، ޝަރަފުވެރިކަމާ އެކު ރިޓަޔާކުރާ ފުލުހުންނަށް ދޭ އިނާޔަތްތައް ހިސާބުކުރުމުގައި އޮތް ލިމިޓު ބަދަލުކުރަން ނިންމާފައިވާ ކަމަށެވެ. އެ ގޮތުން އެ ފުލުހަކު ޚިދުމަތްކޮށްފައިވާ މުއްދަތަށް ބަލައި ލިބޭ އިނާޔަތް ހަމަޖައްސައިދެއްވާނެ ކަމަށް ވިދާޅުވެފައިވެއެވެ.

25 އަހަރަށް ފަހު ރިޓަޔާކުރާ ފުލުހުންނަށް، ޚިދުމަތުގައި ދެމިތިބި ފުލުހުންނެކޭ އެއްފަދައިން ބޭސްފަރުވާގެ ކަންކަން ހަމަޖައްސައިދިނުމަށް ނިންމާފައިވާ ކަމަށް ވެސް ސީޕީ ވަނީ އިޢުލާންކުރައްވައިފައެވެ.