ދެމެހެއްޓެނިވި ތަރައްގީއާ ބެހޭ އިލްމު ފެތުރުމާއި ތައުލީމީ މުޖުތަމައު ބާރުވެރިކުރުވުމުގެ މަގުސަދުގައި ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އިން ސުލިޓެސްޓް ޗޭންޖް ލީޑާ ކޮމިއުނިޓީއާ މިއަދު ގުޅިއްޖެއެވެ.

ސުލިޓެސްޓަކީ ތައުލީމުގެ ޒަރީއާއިން ދެމެހެއްޓެނިވި ތަރައްގީއާއި ދުނިޔެވީ ޒިންމާ ކުރިއެރުވުމަށް މަސައްކަތްކުރާ ނޮން-ޕްރޮފިޓް ޖަމިއްޔާއެކެވެ. މި ޖަމިއްޔާއިން ދުނިޔޭގެ މަތީ ތައުލީމީ މުއައްސަސާތަކާ ގުޅިގެން ދެމެހެއްޓެނިވިކަމާ ބެހޭ ލިޓެރެސީ ހަރުދަނާކޮށް އުނގެނުމުގެ ނަތީޖާތައް ވަޒަންކޮށް ކިޔަވައިދިނުމުގެ ތެރެއަށް ދެމެހެއްޓެނިވި ތަރައްގީގެ އުސޫލުތައް ވެއްދުމަށް އެހީތެރިވެދެއެވެ.

Advertisement

މި ކޮމިއުނިޓީގައި ބައިވެރިވުމުގެ ތެރެއިން އެމްއެންޔޫ އިން ސުލިޓެސްޓުގެ ޓާސްކް (ދެމެހެއްޓެނިވިކަމާ ބެހޭ އިލްމު ވަޒަންކުރާ ނިޒާމު) ބޭނުންކުރާނެއެވެ. ދަރިވަރުންނާއި މުވައްޒަފުންގެ މެދުގައި ދެމެހެއްޓެނިވިކަމާ ގުޅޭ މިހާރު ހުރި އިލްމީ ފެންވަރާއި އިތުރަށް ތަރައްގީކުރަންޖެހޭ ދާއިރާތައް ދެނެގަތުމަށް މި ވަޒަންކުރުން މަގުފަހިކޮށްދޭނެ ކަމަށް އެ ޔުނިވަރސިޓީން ނެރުނު ބަޔާނުގައި ބުނެފައިވެއެވެ.

މީގެ އިތުރުން ބައިނަލްއަގުވާމީ ތައުލީމީ މުއައްސަސާތަކުގެ ތަޖުރިބާއިން ފިލާވަޅު ލިބިގަތުމާއި ދެމެހެއްޓެނިވި ތަރައްގީގެ ރޮނގުން ހިންގާ ބައިނަލްއަގުވާމީ ނެޓްވޯކެއްގައި ތަޖުރިބާ ހިއްސާކުރުމުގެ ފުރުސަތު ވެސް މި ބައިވެރިވުމުން ހުޅުވިގެންދާނެ ކަމަށް އެ ޔުނިވަރސިޓީން ފާހަގަކޮށްފައިވެއެވެ. ތިމާވެށީގެ އިޖުތިމާއީ އަދި އިގުތިސާދީ ދެމެހެއްޓެނިވިކަމަކީ ރާއްޖޭގެ ގައުމީ ތަރައްގީއާ ގާތް ގުޅުމެއް އޮންނަ ކަންކަމަށް ވާތީ ދަރިވަރުންނާއި މުވައްޒަފުންގެ މެދުގައި މި ރޮނގުން އިލްމު ވަރުގަދަކުރުމަކީ ކުރިމަގުގެ ލީޑަރުންނާއި ފަންނީ ބޭފުޅުންނަށް ކޮންމެހެން ބޭނުންތެރި ކަމެއް ކަމަށް ވެސް ބަޔާނުގައި ބުނެފައިވެއެވެ.

2011 ވަނަ އަހަރު އުފެއްދި އެމްއެންޔޫ އަކީ 1973 ވަނަ އަހަރުން ފެށިގެން ހިނގަމުން އައި މަތީ ތައުލީމީ ތާރީހެއްގެ މައްޗަށް ބިނާވެފައިވާ ޔުނިވަރސިޓީއެކެވެ. ރާއްޖޭގެ އެކި ކަންކޮޅުތަކުގައި ކެމްޕަސްތައް ހިންގައި 260 އަށް ވުރެ ގިނަ ތައުލީމީ ޕްރޮގްރާމް ހިންގާ މި ޔުނިވަރސިޓީން ސިއްހީ އިލްމު އިންޖިނިއަރިން ޓެކްނޮލޮޖީ ވިޔަފާރި ތައުލީމު ހޮސްޕިޓާލިޓީ އަދި ކަނޑުގެ ދިރާސާ ހިމެނޭ ގޮތަށް ތަފާތު ދާއިރާތަކުން ދަރިވަރުންނަށް ހިދުމަތް ފޯރުކޮށްދެއެވެ.