ބަރުދަން ލުއިކުރަން މަސައްކަތްކުރާ މީހުން ރޭގަނޑުގެ ކެއުމުން ބަތް އެއްކޮށް އުނިކުރާކަށް ނުޖެހޭ ކަމަށާއި މުހިންމީ ކާ މިންވަރާއި ކެއުން ހަމަހަމަކުރުން ކަމަށް ކާނާގެ ތަޖުރިބާކާރުން ބުނެފިއެވެ.

ބަރުދަން ލުއިކުރުމުގެ ވާހަކައިގައި ބަތަކީ ޒަމާނުއްސުރެ ބަހުސެއް އުފެދިފައި އޮންނަ ކާނާއެކެވެ. ބައެއް މީހުން ރޭގަނޑު ބަތް ކެއުން މުޅިން ހުއްޓައިލައެވެ. އަނެއް ބަޔަކު ބަތުގެ ބަދަލުގައި އެހެން ކާނާ ބޭނުންކުރެއެވެ.

Advertisement

ނަމަވެސް މި ދާއިރާގެ ތަޖުރިބާކާރުން ފާހަގަކުރާ ގޮތުގައި ރޭގަނޑު ބަތް ކާތީ ބަރުދަން އިތުރުވާ ކަމަށް ބުނެ ދެކެވޭ ވާހަކައަކީ ބޮޑު ކުށް ހީއެކެވެ.

މަޝްހޫރު ނިއުޓްރިޝަނިސްޓް ރުޕާލީ ދައްތާ ބުނާ ގޮތުގައި ބަރުދަނަށް ބަދަލު އަންނާނީ ކޮންމެ ދުވަހަކު ހަށިގަނޑަށް ލިބޭ ކެލޮރީސްއާއި ކެލޮރީސް ނެޓް ކާނާ ކާމިންވަރުގެ ނަތީޖާގެ މައްޗަށް ކަމަށެވެ. ކާން ޖެހޭ މިންވަރަށް ވުރެ ގިނައިން ނުކާނަމަ ރޭގަނޑު ބަތް ކެޔަސް ބަރުދަން އިތުރު ނުވާނެ ކަމަށް އޭނާ ބުނެފައިވެއެވެ.

ދައްތާ ލަފާ ދީފައިވަނީ ކެއުމެއްގައި ބައި ޖޯޑާއި އެއް ޖޯޑާ ދެމެދުގެ މިންވަރަކަށް ކައްކާފައި ހުންނަ ބަތް ބޭނުންކުރުމަށެވެ. އެއާ އެކު ޕްރޮޓީން ގިނަ ކާނާ ކަމަށްވާ ކުކުޅާއި ތަރުކާރީ ހިމެނުމުން ކެއުން ހަމަހަމަ ވާނެ ކަމަށް އޭނާ ބުނެފައިވެއެވެ.

މަޝްހޫރު ނިއުޓްރިޝަނިސްޓް ރުޖޫތާ ދިވޭކަރު ވެސް ރޭގަނޑު އަދި އެހެން ގަޑިތަކުގައިވެސް ބަތް ކެއުން ދޫކޮށްލަން ޖެހޭ ކަމުގެ ވިސްނުމާ ދެކޮޅު ހަދައެވެ. ބަރުދަން ލުއިކުރާ ނަމަ ބަތް ކެއުން ހުއްޓައިލާކަށް ނުޖެހޭ ކަމަށް އޭނާ ބުނެފައިވެއެވެ.

ރޭގަނޑު ބަތް ކާ ނަމަ ކެއުމާއި ނިދުމާ ދެމެދު ގާތްގަނޑަކަށް ދެ ގަޑިއިރުގެ ދޭތެރެއެއް ބެހެއްޓުން އޭނާ ލަފާ ދެއެވެ. އަދި މާ ގިނައިން ނުކެއުން މުހިންމު ކަމަށް ބުންޏެވެ. ދިވޭކަރު ބުނާ ގޮތުގައި އެންމެ ރަނގަޅު ބާވަތެއްގެ ބަތެއް ކޮންމެ މީހަކަށް ކަނޑަނޭޅިދާނެ އެވެ. އެހެންވެ އެ ބަދަލުގައި ލަފާ ދެނީ އެ މީހެއްގެ ސަރަހައްދެއްގައި ލިބެން ހުރި ބާވަތެއް ޚިޔާރުކޮށް ހެޔޮވަރު ކެއުމެއްގެ ބައެއްގެ ގޮތުގައި ބަތް ބޭނުންކުރުމަށެވެ.

ބަތް ނޫނީ ރޮށީގެ ބަހުސާ ގުޅޭ ގޮތުން ނިއުޓްރިޝަނިސްޓް ކަވީތާ ދެވްގަން ބުނެފައި ވަނީ ރޭގަނޑުގެ ކެއުމުގައި ދެ ބާވަތް ވެސް ހިމެނިދާނެ ކަމަށެވެ. ނަމަވެސް ކޮންމެ މީހަކަށް ވެސް ރަނގަޅު ވާނީ އެ މީހެއްގެ ހަޖަމުކުރުމުގެ ނިޒާމާއި ކެއުމުގެ ޢާންމު ބައްޓަމާ ގުޅޭ ގޮތެވެ. އެއް ބާވަތެއް ޚިޔާރުކުރުމުގެ ބަދަލުގައި ކާ މިންވަރަށް ބަލައި ކެއުން ހަމަހަމަކުރުމަށް އޭނާ ބާރު އަޅައެވެ.

އެހެންކަމުން ތަޖުރިބާކާރުންގެ ނަޒަރުގައި ރޭގަނޑު ބަތް ކެއުމުން ބަރުދަން ލުއިކުރުމަށް ހުރަހެއް ނާޅައެވެ. ކާ މިންވަރު ހެޔޮވަރުކޮށް ޕްރޮޓީނާއި ތަރުކާރީ އެކުލެވޭ ހަމަހަމަ ކެއުމެއް ބައްޓަންކުރުމަކީ ވަކި ކާނާއެއް މުޅިން ހުއްޓައިލުމަށް ވުރެ މާ ބޮޑަށް ނަތީޖާ ނެރެދޭ ގޮތެކެވެ.