ބަންގްލަދޭޝްގެ ދެކުނު-އިރުމައްޗަށް ޖުލައި ހަތަރު ވަނަ ދުވަހުން ފެށިގެން ބޯކޮށް ވެހެމުންދާ މޫސުމީ ވާރެއާއި ފަރުބަދައިން ފައިބާ ފެނުގެ ސަބަބުން ބޮޑު ފެންބޮޑުވުގެ ބޮޑު ކާރިސާއެއް ހިނގައި، ބިންގަނޑު ކެނޑުމުގެ ހާދިސާތައް ހިނގައި، 54 އަށް ވުރެ ގިނަ މީހުން މަރުވެއްޖެއެވެ.

ކާރިސާތައް ބެލެހެއްޓުމާ ބެހޭ ވުޒާރާއިން ބުނީ ހަތް ޑިސްޓްރިކްޓެއްގައި 1.1 މިލިއަނަށް ވުރެ ގިނަ މީހުންނަށް އަސަރުކޮށް، 267,918 ގޭބިސީ ހާލުގައި ޖެހިފައިވާ ކަމަށެވެ.

Advertisement

އެންމެ ބޮޑަށް އަސަރުކުރީ ޗިޓަގޮން، ކޮކްސް ބާޒާރު، ބަންދަރުބާން، ރަންގަމާޓީ، ކާގްރާޗާރީ، މައުލޫވީ ބާޒާރު އަދި ހަބީގަންޖް ޑިސްޓްރިކްޓަށެވެ. ފެންބޮޑުވުމުގެ އިންޒާރު ދޭ ސެންޓަރުން ބުނީ ތިން ދުވަހުގެ ތެރޭ ޗިޓަގޮންގައި 815 މިލިމީޓަރު، ލާމާގައި 518 މިލިމީޓަރު، ކޮކްސް ބާޒާރުގައި 330 މިލިމީޓަރު ވާރޭ ރެކޯޑް ކުރެވުނު ކަމަށެވެ. ކޮކްސް ބާޒާރުގެ ރޮހިންގާ ރެފިއުޖީ ކޭމްޕްތަކުގައި ބިންގަނޑު ކެނޑި، އަންހެނުންނާއި ކުޑަކުދިން ހިމެނޭ ގޮތަށް 16 ރެފިއުޖީން މަރުވެފައި ވެއެވެ.

ބޮޑުވަޒީރު ޠާރިޤް ރަޙުމާން ވަނީ ސަރުކާރުގެ ހުރިހާ އިދާރާއެއް މެކްސިމަމް އެލާޓަށް ގެނެސްފައެވެ. ކާރިސާއާ ގުޅިގެން 1,727 ޝެލްޓަރު ހުޅުވައި 37,000 އަށް ވުރެ ގިނަ މީހުންނަށް އެ ޝެލްޓަރުތަކުން އެހީތެރިކަން ފޯރުކޮށްދީފައިވެއެވެ. 1,091 ޓަނުގެ ހަނޑޫ، 34,470 ޕެކް ޑްރައި ފުޑް އަދި ނަގުދު ފައިސާގެ އެހީ ބަހަމުން އަންނަ ކަމަށް ބުނެފައިވެއެވެ. 

ޗިޓަގޮން، ކޮކްސް ބާޒާރު އަދި ބަންދަރުބާންގެ ފެންބޮޑުވުމުގެ ހާލަތު މަޑުމަޑުން ރަނގަޅުވާނެ ކަމަށް ބެލެވުނު ނަމަވެސް، 10 ޑިސްޓްރިކްޓެއްގައި ކުރިއަށް އޮތް ތިން ދުވަހުގެ ތެރޭ ކުރު މުއްދަތުގެ ފެންބޮޑުވުން ހިނގައިފާނެ ކަމުގެ އިންޒާރު ފެންބޮޑުވުމުގެ އިންޒާރު ދޭ ސެންޓަރުން ދީފައި ވެއެވެ. ފެންބޮޑުވުމާ އެކު ރޯގާ ފެތުރުމުގެ ނުރައްކާ ވެސް ބޮޑުވެފައި ވެއެވެ. ހިމަބިއްސާއި ރޯގާގައި މާޗް މަހުން ފެށިގެން 750 އެއްހާ ކުޑަކުދިން މަރުވެ، ޑެންގީ ހުމުގައި ޖުލައި 16 ގެ ނިޔަލަށް 32 މީހުން މަރުވެ 9,676 މީހުންނަށް ބަލި ޖެހިފައި ވެއެވެ.