އެމެރިކާ އާއި އީރާނާ ދެމެދު ހަމަލާ ބަދަލުކުރުން އިތުރުވެ، ހޮރުމޫޒް ކަނޑުއޮޅީގެ މައްސަލައިގައި ދެ ފަރާތުގެ ކުރިމަތިލުން ވަރުގަދަވެފައި ވީ ނަމަވެސް، ޤަޠަރާއި ޕާކިސްތާނު އިސްވެ ހަރަކާތްތެރިވާ މީޑިއޭޓަރުން، ދެ ފަރާތް އަލުން މަޝްވަރާގެ މޭޒު ދޮށަށް ގެނައުމަށް ބާރު ސްޕީޑުގައި މަސައްކަތް ފަށައިފިއެވެ.

އެމެރިކާ ސިފައިން ބުރާސްފަތި ދުވަހު ބުނީ، ފާއިތުވި 48 ގަޑިއިރު ތެރޭ އީރާނުގެ 170 އަށް ވުރެ ގިނަ އަސްކަރީ އަމާޒަށް ހަމަލާ ދީފައިވާ ކަމަށެވެ. އެ ހަމަލާތައް އަމާޒުކުރީ އީރާނުގެ އައްސޭރީ ސިފައިންގެ ތަންތަނަށް ކަމަށާއި، ބޭނުމަކީ ހޮރުމޫޒް ކަނޑުއޮޅީގައި ވިޔަފާރި ބޯޓުފަހަރަށް ނުރައްކާކުރުމުގެ ޤާބިލުކަން ނައްތައިލުން ކަމަށް އެމެރިކާ ސިފައިން ބުންޏެވެ.

Advertisement

މި ދެ ދުވަހުގެ ހަމަލާތައް ދެވުނީ، ފެބްރުއަރީ 28 ގައި އެމެރިކާ-އިސްރާއީލު ހަމަލާތަކުގައި މަރައިލެވުނު އީރާނުގެ ރޫޙީ ލީޑަރު އާޔަތުﷲ ޢަލީ ޚާމަނާއީގެ ޖަނާޒާ ކުރިއަށް ދިޔަ ދަނޑިވަޅުގައެވެ. އީރާނުގެ ޞިއްޙަތާ ބެހޭ ވުޒާރާއިން ބުނީ މި ހަމަލާތަކުގައި 14 މީހުން މަރުވެ 78 މީހުން ޒަޚަމްވި ކަމަށެވެ.

ހަމަލާ ބަދަލުކުރުން ވަރުގަދަވި ނަމަވެސް، ޓްރަމްޕް ސަރުކާރުން ބޭނުންވަނީ ފުޅާ ހަނގުރާމައަކަށް ނުގޮސް ހޮރުމޫޒް ކަނޑުއޮޅި ހުޅުވައިލުން ކަމަށް ރިޕޯޓުތައް ބުނެއެވެ. އެ ގޮތުން، ޤަޠަރު، ޕާކިސްތާނު، ތުރުކީ، މިޞްރު އަދި ސަޢޫދީ ޢަރަބިއްޔާގެ އޮފިޝަލުން ބުދަ ދުވަހު ދެ ފަރާތާ ފޯނުން މަޝްވަރާކޮށް، ފުރަތަމަ ހަމަޖެހުމެއް ގެނެސް، ދެން ޓެކްނިކަލް ޓީމުތަކުގެ އިތުރު ބުރެއް ބޭއްވުމަށް ތާރީޚެއް ކަނޑައެޅުމަށް މަސައްކަތް ކުރަމުންދާ ކަމަށް މީޑިއޭޝަންގައި ބައިވެރިވާ މަސްދަރަކާ ހަވާލާދީ ރިޕޯޓުތައް ބުނެއެވެ.

މި ކުރިމަތިލުންތަކާ އެކު، އިސްރާއީލުގެ ދިފާޢީ ވަޒީރު އިސްރާއީލް ކެޓްޒް ބުރާސްފަތި ދުވަހު ވައިގެ ސިފައިންގެ ދަސްވެނިވުމުގެ ރަސްމިއްޔާތެއްގައި ބުނީ، އީރާނާ ދެކޮޅަށް ތިންވަނަ ފަހަރަށް ވެސް އެކަނި ހަމަލާ ދެވޭ ވަރަށް އިސްރާއީލު ސިފައިން ތައްޔާރަށް ތިބި ކަމަށެވެ. ނަމަވެސް އިސްރާއީލުގެ ދެ މަސްދަރަކާ ހަވާލާދީ ސީއެންއެންއިން ރިޕޯޓުކޮށްފައިވާ ގޮތުގައި، ޓްރަމްޕް ސަރުކާރުން ބޭނުންވަނީ ހާލަތު ކޮންޓްރޯލުން ނެއްޓިދާނެތީ އިސްރާއީލު ހަނގުރާމައިގައި ބައިވެރި ނުކުރުމެވެ.

މި ދެ ފަރާތުގެ ކުރިމަތިލުން ހޫނުވެފައިވާ މައިގަނޑު ސަބަބަކީ ހޮރުމޫޒް ކަނޑުއޮޅީގެ ކޮންޓްރޯލާ މެދު އޮތް ޚިޔާލު ތަފާތުވުމެވެ. ދުނިޔޭގެ ތެލުގެ ވިޔަފާރީގެ ފަސް ބައިކުޅަ އެއް ބައި ދައުރުކުރާ މި މުހިންމު ކަނޑުމަގުގައި ވިޔަފާރި ބޯޓުފަހަރަށް ހަމަލާ ދެމުންދާ ކަމަށް އެމެރިކާއިން ތުހުމަތުކުރާ އިރު، އީރާނުން ބުނަނީ އެ ޤައުމުގެ ސަރަޙައްދީ ކަނޑުގެ ތެރެއިން ކަނޑައެޅިފައިވާ ވަކި މަގަކުން ދަތުރުކުރަން ޖެހޭ ކަމަށެވެ.