ބޯހިޔާވަހިކަމުގެ މަޝްރޫޢުތަކުގެ ދަށުން ފްލެޓަށް އެދި ފޯމު ހުށަހަޅާފައިވާ ފަރާތްތަކުގެ ތެރެއިން ފްލެޓް ލިބޭ މީހުން ކަނޑައަޅައި މި އަހަރުގެ ތެރޭގައި އިއުލާނު ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެ އެވެ.

މި ސަރުކާރުގެ ފުރަތަމަ ބޯކިޔާވަހި ކަމުގެ މަޝްރޫއުގެ ދަށުން ފްލެޓާއި ގޯއްޗަށް ފޯމް ހުށަހެޅުމުގެ މުއްދަތު ހަމަވީ މިމަހުގެ 15 ވަނަ ދުވަހު އެވެ. މި މަޝްރޫއުގެ ދަށުން 15،000 ގޯއްޗާއި 7000 ފްލެޓު ދިނުމަށް ހަމަޖެހިފައިވެ އެވެ.

Advertisement

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް ވިދާޅުވީ ބޯހިޔާވަހިކަމަކީ ސަރުކާރުގެ އެންމެ ބޮޑު ވަޢުދު ކަމަށްވާތީ އެ މަސައްކަތް ކުރިއަށް ގެންދަނީ ވަރަށް ބޮޑު ސަމާލުކަމެއް ދީގެން ކަމަށެވެ. އެމަނިކުފާނު ވިދާޅުވީ މި ސަރުކާރުން ދޭ އެއްވެސް ބޯހިޔާވަހިކަމަކީ ވަކި މީހެއްގެ މީހަކަށް ވީތީ ލިބޭ އެއްޗަކަށް ނުވާނެ ކަން ޔަގީން ކުރައްވާނެ ކަމަށެވެ.

ފްލެޓަށް ކުރިމަތިލާފައިވާ ފަރާތްތަކުގެ ތަފްސީލްތައް ރަނގަޅަށް ވެރިފައިކޮށް ކަނޑައަޅާފައިވާ އުސޫލުތަކާ އެއްގޮތަށް ޕޮއިންޓް ހަމަވާ ތަރުތީބުން ފްލެޓް ލިބޭނެ ކަމަށާއި ކޮންމެ މީހަކަށް ލިބެނީ ކޮން މަޝްރޫޢެއްގެ ދަށުން ކޮން ފްލެޓެއްކަން އެނގޭނެހެން ތަފްސީލުތައް ހާމަކުރައްވާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ ޖުލައި މަހުގެ ތެރޭގައި ގިނަ އިމާރާތްތަކުގެ ކޮންކްރީޓް ފައުންޑޭޝަންގެ މަސައްކަތް ފެށޭނެ ކަމަށެވެ. އަދި 2028 ވަނަ އަހަރުގެ މެދު ތެރޭގައި މާލޭ ސަރަހައްދުގެ ހުރިހާ ފްލެޓެއް ނިމޭނެ ކަމުގެ ފުރިހަމަ ޔަޤީންކަން އެމަނިކުފާނު ދެއްވިއެވެ.

ގޯތި ދިނުމުގެ މަޝްރޫޢާ ގުޅޭ ގޮތުން ރައީސް ވިދާޅުވީ ތެލުގެ އަގު ބޮޑުވުމާ ގުޅިގެން މަސައްކަތަށް ކުޑަ މަޑުޖެހުމެއް އައި ނަމަވެސް މިހާރު އަލުން މަސައްކަތް ކުރިއަށްދާ ކަމަށާއި އަމާޒަކީ މި އަހަރު ނިމުމުގެ ކުރިން އެ މަސައްކަތްތައް ވެސް ނިންމާލުން ކަމަށެވެ.

ގޯތި ދޫކުރުމަށް ހަމަޖެހިފައިވަނީ ރަސްމާލެއިންނާއި ހުޅުމާލޭ ފޭސް ތިނަކުންނެވެ. ފްލެޓު ދިނުމަށް ހަމަޖެހިފައިވަނީ ވިލިމާލެ، ހުޅުމާލެ ފޭސް އެކެއް އަދި ތިނަކުން 4000 ފްލެޓެވެ. ބާކީ ހުރި ފްލެޓުތައް އަޅަން ހަމަޖައްސާފައިވާ ތަންތަން އަދި ހާމައެއް ނުކުރެ އެވެ.

ހައުސިން މިނިސްޓްރީން ހާމަކޮށްފައިވާ ގޮތުގައި ބޯހިޔާވަހިކަމުގެ ތިން ސްކީމަކަށް ޖުމްލަ 58505 ފޯމު ހުށަހަޅާފައިވެއެވެ. އޭގެ ތެރެއިން އާއިލީ ބޯހިޔާވަހިކަމުގެ ސްކީމަށް 45644 ފޯމު ހުށަހެޅި އިރު ގޯތިގެދޮރު ސްކީމަށް 12861 އެޕްލިކޭޝަން ލިބިފައިވެއެވެ.