ވެނެޒުއެލާއަށް އައި ބާރުގަދަ ބިންހެލުމުގައި ވެއްޓުނު ޢިމާރާތެއްގެ ކުނިގަނޑު ދަށުން މަންމައަކާއި އެ މީހާގެ ނުވަ މަހުގެ ތުއްތު ދަރިފުޅު ދިރިހުއްޓައި ސަލާމަތްކޮށްފިއެވެ.

މި ރެސްކިއު އޮޕަރޭޝަން ކުރިއަށް ގެންދިޔައީ އެމެރިކާގެ ވާޖީނިއާގެ ފެއާފެކްސް ކައުންޓީ އާބަން ސާޗް އެންޑް ރެސްކިއު ޓީމާއި ފްރާންސްގެ ސިވިލް ސެކިއުރިޓީ ޓީމު ގުޅިގެންނެވެ.

Advertisement

ރެސްކިއު ޓީމުން ވަނީ ތާށިވެފައި ތިބި ދެ މީހުންނާ ހަމައަށް ވާޞިލުވުމުގެ ކުރިން އިންޓްރަވީނަސް ޑްރިޕް ތައްޔާރުކޮށް ގެއްލުން ލިބިފައިވާ ކޮންކްރީޓް ނެގުމުގެ މަސައްކަތް ވަރަށް ފަރުވާތެރިކަމާ އެކު ކޮށްފައެވެ. މި ހެޔޮ ޚަބަރާ އެކު ލާ ގުއައިރާ ސްޓޭޓުގައި ވެއްޓުނު ޢިމާރާތެއްގެ ދަށުގައި ހަތަރު ދުވަސް ވަންދެން ތާށިވެފައި ތިބި ބައްޕައަކާއި ފިރިހެން ދަރިފުޅު ވެސް ވަނީ ދިރިހުއްޓައި ސަލާމަތްކޮށްފައެވެ.

އެ ރެސްކިއު އޮޕަރޭޝަނަށް ގާތްގަނޑަކަށް 12 ގަޑިއިރު ހޭދަވި ކަމަށް ރިޕޯޓުތައް ބުނެއެވެ.

"ކުނިގަނޑު ދަށުގައި ހަތަރު ދުވަސް ވަންދެން ތާށިވެފައި ތިބި ކޮންމެ ބަޔަކު ވެސް ތިބޭނެ ފަދައިން އެ މީހުން ތިބީ ވަރަށް ބޮޑަށް ބަލިކަށިވެފައި" ކަމަށް ފްރާންސްގެ ސިވިލް ސެކިއުރިޓީ ޓީމުގެ މެންބަރަކު ރޮއިޓާޒް އަށް ބުނެފައިވެއެވެ. އޭނާ ބުނީ ލަސް ރެސްކިއު ޕްރޮސެސް ކުރިއަށް ދިޔައިރު މެޑިކަލް ޓީމުތަކުން ދިޔައީ އެ މީހުންނަށް ފެނާއި ބޭސް ދެމުން ކަމަށެވެ.

ވެނެޒުއެލާގެ ނެޝަނަލް އެސެމްބްލީގެ ރައީސް ހޯރެ ރޮޑްރީގެޒް ޓީވީ މެދުވެރިކޮށް ވިދާޅުވި ގޮތުގައި މި ބިންހެލުމުގައި މަރުވި މީހުންގެ ޢަދަދު 1450 އަށް އަރާފައިވާ ކަމަށެވެ. އަދި 3150 މީހުންނަށް އެކިވަރުގެ އަނިޔާ ލިބިފައިވާ ކަމަށާއި ރެސްކިއު ޓީމުތަކުން ކުނިގަނޑު ދަށުގައި ތާށިވެފައި ތިބެދާނެ މީހުން ހޯދުމުގެ މަސައްކަތް ކެނޑިނޭޅި ކުރަމުންދާ ކަމަށް ވެސް އޭނާ ވިދާޅުވިއެވެ.

މިއަދަދުތައް އަދިވެސް އިތުރުވުމަކީ އެކަށީގެންވާ ކަމެއް ކަމަށް ރިޕޯޓުތައް ބުނެ އެވެ.