ދިފާޢީ ޚިދުމަތްތައް ހަރުދަނާކޮށް ވަރުގަދަކުރުމަކީ ޤައުމީ ޚިދުމަތެއްގެ ގޮތުގައި އިޚްލާސްތެރިކަމާއެކު ސަރުކާރުން ފުރިހަމަކޮށްދެއްވަމުން ގެންދަވާނެ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ރޭ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ދިވެހި ފުލުހުންގެ ޚިދުމަތަށް 93 އަހަރު ފުރުމުގެ މުނާސަބަތުގައި ޒުވާނުންގެ މަރުކަޒު ހޯލުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

Advertisement

ރައީސް ވިދާޅުވީ ކޮންމެ ދުވަހަކު ޤައުމުގެ ހަމަޖެހުން ދަމަހައްޓައި ތަންފީޒީ ބާރުގެ ގޮތުގައި ފުލުހުން ދެއްވާ ޚިދުމަތަކީ ވަރަށް ވަރުގަދަ ޤައުމީ ޚިދުމަތެއް ކަމަށާއި ފުލުހުންނާއި ފުލުހުންގެ ޢާއިލާތަކުން ވެވަޑައިގަންނަވަނީ ވަރުގަދަ ޤުރުބާނީއެއް ކަމަށެވެ.

ރައީސުލްޖުމްހޫރިއްޔާ ވަނީ ފުލުހުންގެ ޚިދުމަތް ފޯރުކޮށްދިނުމުގައި ހުރަސްތަކެއް ހުރިކަން ފާހަގަކުރައްވައި މާލޭ ސަރަޙައްދުގައި ފުލުހުންގެ އިތުރު މަރުކަޒަކާއި ޒަމާނީ ފެންވަރުގެ ހެޑްކުއާޓަރެއް ޤާއިމުކޮށްދެއްވާނެ ކަމަށް ވިދާޅުވެފައެވެ. އޭގެ އިތުރުން ދ.ވާނީގައި ހިންގާ ފުލުހުންގެ ތަމްރީނު މަރުކަޒު އެންމެ ޒަމާނީ ފެންވަރަށް ތަރައްޤީކުރައްވާނެ ކަމަށާއި ފުލުހުންގެ އަމިއްލަ އިމާރާތްތަކުގައި ޚިދުމަތް ދެވޭނެ އުމްރާނީ ވަސީލަތްތައް ބިނާކުރުމަށް މިހާރު ކުރިއަށްދާ މަޝްރޫޢުތައް އަންނަ އަހަރުގެ ތެރޭގައި ނިންމާލެއްވުމަކީ އަމާޒެއް ކަމުގައިވެސް ވިދާޅުވެފައެވެ. ހަމައެއާއެކު ޤާނޫނީ ބަދަލުތައް ގެނައުމާއި އިންސާނީ ވަސީލަތުގެ ތަރައްޤީ ފަދަ ދާއިރާތަކުން ކަންކަން ފުރިހަމަކޮށްދެއްވާނެ ކަމުގައި ވިދާޅުވިއެވެ. އެމަނިކުފާނުގެ ވާހަކަފުޅު ނިންމަވައިލެއްވީ ބޯހިޔާވަހިކަމުގައި ފުލުހުންނާއި ފުލުހުންގެ ޢާއިލާތަކަށް އިތުރު ފަހި ފުރުޞަތުތައް ހޯއްދަވައިދެއްވާނެ ކަމުގެ ޔަޤީންކަން ދެއްވަމުންނެވެ.

މި ރަސްމިއްޔާތުގައި ރައީސުލްޖުމްހޫރިއްޔާ ވަނީ ރައީސުލްޖުމްހޫރިއްޔާގެ ކުލައާއި މެޑަލް ހާސިލުކުރެއްވި ފުލުހުންނަށް އެ ތަކެތި ހަވާލުކޮށްދެއްވައި ދިގު މުއްދަތަކަށް ޚިދުމަތްކޮށްދެއްވާފައިވާ މުވައްޒަފުންގެ އަގުވަޒަންކުރުމުގެ ގޮތުން ހަނދާނީ ފިލާ ހަވާލުކޮށްދެއްވައިފައެވެ. ރައީސުލްޖުމްހޫރިއްޔާގެ ދެކަނބަލުންނަށް މަރުޙަބާ ވިދާޅުވީ މިނިސްޓަރ އޮފް ހޯމްލޭންޑް ސެކިއުރިޓީ ޢަލީ އިޙްސާނާއި ކޮމިޝަނަރ އޮފް ޕޮލިސް އަޙްމަދު މުޙައްމަދެވެ. މި ރަސްމިއްޔާތުގައި ދައުލަތުގެ އިސްވެރިންނާއި މުއައްސަސާތަކުގެ އިސްވެރިންގެ އިތުރުން ބޭރު ޤައުމުތަކުގެ ޑިޕްލޮމެޓިކް މަންދޫބުން ބައިވެރިވެވަޑައިގެންނެވިއެވެ.