ލޭ ހަދިޔާކުރުމަށް ހޭލުންތެރިކުރުމުގެ މަޤުޞަދުގައި "ލޭ އެޕް" އިން އިސްނަގައިގެން އުފެއްދި "ލޭގެ ޞަދަޤާތް" ލަވަ މިއަދު ރިލީޒްކޮށްފިއެވެ.

މިއީ ލޭ އެޕް އިން އިސްނަގައިގެން އެހީ ޖަމިއްޔާއާ ގުޅިގެން ނެރޭ "އިސްލާމިކް ރިދަމް"ގެ އުފެއްދުމެކެވެ. ލަވައިގެ މީޑިއާ ޕާޓްނަރަކީ "ވޮއިސް" އެވެ. މި ލަވަ ރިލީޒް ކުރީ ޓީވީއެމްގެ "ހޭޔަންބޯ" ޕްރޮގްރާމްގެ ތެރެއިންނެވެ.

Advertisement

ލަވައިގެ ވާހަކަ ފެށިގެން އަންނަނީ ބައްޕައަކު އޭނާގެ ބަލި ދަރިފުޅު ކައިރީގައި އިށީދެލައިގެން އިންނަ މަންޒަރުންނެވެ. ދަރިފުޅަށް ބޭނުންވާ އޭ ނެގެޓިވް ލޭ ހޯދުމަށް ބައްޕަ ވައިބާ ގުރޫޕްތަކަށް މެސެޖުކޮށް މަސައްކަތް ކުރި ނަމަވެސް ލޭ ލިބޭ ގޮތެއް ނުވެއެވެ. އެންމެ ފަހުން "ލޭ އެޕް" މެދުވެރިކޮށް ލޭ ހޯދުމަށް އެދުނުތާ މާ ގިނައިރެއް ނުވެ ލޭ ހަދިޔާކުރާނެ މީހަކު ލިބި ދަރިފުޅުގެ ޙާލު ރަނގަޅުވާން ފަށައެވެ.

ލަވައިގައި ބައްޕަގެ ރޯލު އަދާކޮށްފައިވަނީ ދިލްޝާން (ދިލް) އެވެ. ދަރިފުޅުގެ ބައި އައިނީ ކުޅެދީފައިވާއިރު ލޭ ހަދިޔާކުރަން އަންނަ މީހާގެ ރޯލު އަދާކޮށްފައިވަނީ ޢުމަރު (ޓީޑީސީ އުމަރު) އެވެ. ލަވައިގެ ޅެން ހަދައިދީފައިވަނީ އީސާ ޝަރީފެވެ. ޝިފާއުގެ އަޑުން ލަވައިގެ ޅެމާއި ރާގަށް އިންސާފުކޮށްދީފައިވާއިރު އޯޑިއޯ ރެކޯޑިންގ ހެދީ ހުސައިން ތަޢުފީޤެވެ. ލަވައިގެ ވީޑިއޯ ގެނެސްދީފައިވަނީ "އޯކޭޒް އިންކް"ގެ ޓީމުންނެވެ.

ލަވަ އުފެއްދި ފަރާތުން ބުނާ ގޮތުގައި މިއީ ލޭ ހަދިޔާކުރުމަށް ހިތްވަރުދީ އެކަމަށް ބާރު އެޅުމުގެ މަޤުޞަދުގައި ނެރޭ ލަވައެކެވެ. ލޭ ނުލިބުމުގެ މައްސަލައަކީ ރާއްޖޭގައި ވަރަށް ބޮޑު މައްސަލައެކެވެ.

ތެލެސީމިއާ ހުންނަ ފަރާތްތަކާއި އެ ނޫން ވެސް ޙާލަތްތަކުގައި ލޭ ބޭނުންވާ ދަނޑިވަޅުތަކުގައި ލޭ ހޯދުމަށް ބުރަ މަސައްކަތްތަކެއް ކުރަންޖެހޭ ކަމަށާއި އަމިއްލައަށް އިސްނަގައިގެން ގަވާއިދުން ބްލަޑް ބޭންކަށް ލޭ ހަދިޔާކުރާ މީހުން އަދިވެސް މަދު ކަމަށް އެ ފަރާތުން ފާހަގަކޮށްފައިވެއެވެ.

އިސްލާމިކް ރިދަމް އަކީ މީގެ ކުރިން ވެސް "ރޮއްވާފަ ލޯތައް" "އުޖާލާވެ އުދަރެސް" "އޮއްސުމުން" އަދި "ކަރުނަ" ފަދަ މަޤުބޫލު ލަވަތައް ނެރެފައިވާ ބައެކެވެ.