ދައުލަތުގެ ފައިސާ ބޭނުންކޮށް ރާއްޖެ ފަދަ ރިޒޯޓު މަންޒިލްތަކަށް ދަތުރުކޮށް ޚިޔާނާތްވި ކަމަށް ތުހުމަތުކޮށް، ދެކުނު ކޮރެއާގެ ވެރިކަން ކުރާ ޕީޕަލް ޕަވާ ޕާޓީ (ޕީޕީޕީ) އިން، ޤައުމީ އިންތިޚާބު ކޮމިޝަން (އެންއީސީ) ގެ ވެރީންނާ ދެކޮޅަށް ޝަކުވާ ހުށަހަޅައިފިއެވެ.

ޕީޕީޕީ ގެ މީޑިއާ ޚާއްސަ ކޮމިޓީ އާއި ލީގަލް ޓީމު ގުޅިގެން، ޕްރޮސިކިއުޝަނާއި ފުލުހުންގެ ޖޮއިންޓް ތަޙުޤީޤު ހެޑްކުއާޓަރަށް ހުށަހެޅި ޝަކުވާގައި ބުނެފައިވަނީ، 2022 ވަނަ އަހަރުން ފެށިގެން މި އަހަރުގެ ޖޫން މަހާ ހަމައަށް އެންއީސީގެ 461 މުވައްޒަފަކު 100 އަށްވުރެ ގިނަ ބޭރު ދަތުރު ކޮށްފައިވާ ކަމަށެވެ. އިންތިޚާބު ބެލެހެއްޓުމާއި މުވައްޒަފުންގެ ޤާބިލްކަން އިތުރުކުރުމުގެ ނަމުގައި ހިންގި މި ދަތުރުތަކުގެ މަންޒިލްތަކުގެ ތެރޭގައި ރާއްޖެ އާއި މެލޭޝިއާގެ ކޮޓާ ކިނަބާލޫ ހިމެނެއެވެ. ދަތުރުތަކުގެ ޖުމްލަ ޚަރަދު 2.4 ބިލިއަން ކޮރެއަން ވޮން އަށްވުރެ މައްޗަށް އަރާފައިވާއިރު، ދަތުރުތަކަށް ފަހު ހުށަހަޅަންޖެހޭ ރިޕޯޓުތައް ފުރިހަމަ ނުކޮށް ހުރި ކަމުގެ ތުހުމަތުވެސް ވަނީ ކޮށްފައެވެ.

Advertisement

ޝަކުވާ ހުށަހެޅުމަށް ފަހު ވާހަކަދެއްކި ކޮމިޓީ ޗެއާ ލީ ސަންގ-ހްވީ ބުނީ "ތަޙުޤީޤު ހެޑްކުއާޓަރުން ރައްޔިތުން ޤަބޫލުކުރާ ފެންވަރުގެ ނަތީޖާ ނެރެންޖެހޭ" ކަމަށެވެ. އަދި އިންތިޚާބު ބެލެހެއްޓުމަށް ދައުލަތުން ދިން ފައިސާ އަމިއްލަ ބޭނުމަށް ހޭދަކޮށް ރައްޔިތުންނަށް އޮޅުވައިލި ނަމަ، ދަށް ފަންތީގެ މުވައްޒަފުން ޤުރުބާންކޮށް މައްސަލަ ފޮރުވަން ފުރުޞަތު ދީގެން ނުވާނެ ކަމަށްވެސް ބުންޏެވެ.

ސޯލްގެ ސެންޓްރަލް ޑިސްޓްރިކްޓް ޕްރޮސިކިއުޓާޒް އޮފީހުގައި މި މައްސަލައަށް ޚާއްސަ ޖޮއިންޓް ތަޙުޤީޤު ޓީމެއް ވަނީ އެކުލަވައިލައިފައެވެ. 12 ޕްރޮސިކިއުޓަރުންނާއި 15 ފުލުހުން ހިމެނޭ 27 މެންބަރުންގެ މި ޓީމުން، އަތުލައިގެންފައިވާ ތަކެތި ތަޙުލީލުކޮށް ކަމާ ގުޅޭ ފަރާތްތަކާ ސުވާލުކުރުމަށް ފަހު، ކޮމިޝަނުގެ މަތީ ފެންވަރުގެ ވެރީންނާ ހަމައަށް ތަޙުޤީޤު ފުޅާކުރާނެ ކަމަށް ހެޑްކުއާޓަރުން ބުނެއެވެ.