ވޯލްޑް ކަޕް ފުޓުބޯޅަ މުބާރާތް ބާއްވާ ތިން ޤައުމުގެ ތެރޭގައި ހިމެނޭ އެމެރިކާއިން، އެ ޤައުމުގެ ފުރަތަމަ މެޗުގައި ޕަރަގުއޭ 4-1 އިން ބަލިކޮށްފިއެވެ.

ލޮސް އެންޖެލިސް ސްޓޭޑިއަމުގައި ކުޅުނު ގްރޫޕް ޑީގެ މި މެޗަކީ 30 އަހަރަށްވުރެ ގިނަ ދުވަސް ފަހުން އެމެރިކާގެ ފަސްގަނޑުގައި ކުޅުނު ފުރަތަމަ ވޯލްޑް ކަޕް މެޗެވެ. މިއީ ވޯލްޑް ކަޕެއްގައި އެމެރިކާއިން ނެރުނު އެންމެ ރަނގަޅު ނަތީޖާއެވެ. މީގެ ކުރިން އެ ޤައުމުން މުބާރާތެއްގެ އެއް މެޗުގައި ތިން ގޯލަށްވުރެ ގިނައިން ޖަހާފައެއް ނުވެއެވެ.

Advertisement

މެޗުގެ ވަރަށް ކުރީކޮޅު، ޕަރަގުއޭގެ ޑިފެންޑަރު ބޮބަޑިލާ އަތުން ބައިކޮޅަށް ވަން ގޯލަކުން އެމެރިކާއަށް ލީޑު ލިބުނެވެ. ފުރަތަމަ ހާފުގައި އެ ޓީމުން ވަނީ ތިން ލަނޑުގެ ލީޑެއް ނަގާފައެވެ. މައުރީސިއޯ ޕޮޗެޓީނޯގެ އިރުޝާދުގެ ދަށުން ކުޅެމުންދިޔަ އެމެރިކާގެ ދެވަނަ ލަނޑު 31 ވަނަ މިނެޓުގައި ކާމިޔާބުކޮށްދިނީ ފޮލަރިން ބަލޮގުންއެވެ. އަދި ފުރަތަމަ ހާފުގެ އިތުރު ވަގުތުގެ ތެރޭގައި ބަލޮގުން ވަނީ އިތުރު ލަނޑެއް ޖަހާފައެވެ.

ދެވަނަ ހާފުގެ ކުޅުން ފަށައި، 73 ވަނަ މިނެޓުގައި ޕަރަގުއޭގެ މައުރީސިއޯ ލަނޑެއް ޖަހައި އުއްމީދު އާކޮށްދިނެވެ. ނަމަވެސް ޕަރަގުއޭއަށް އިތުރު ލަނޑެއް ކާމިޔާބު ނުކުރެވި އުޅެނިކޮށް، މެޗުގެ އިތުރު ވަގުތުގެ ތެރޭގައި އެމެރިކާއިން ވަނީ ހަތަރުވަނަ ލަނޑު ޖަހައި ނަތީޖާ 4-1 އަށް ބަދަލުކޮށްފައެވެ.

މި މެޗުގައި ޕްލިސިޗްގެ ފަރާތުން މޮޅު ކުޅުމެއް ފެނިގެންދިޔައެވެ. ލަނޑެއް ނުޖެހުނު ނަމަވެސް އޭނާ ވަނީ ލަނޑު ޖަހަން ފުރުސަތު ތަނަވަސްކޮށްދީފައެވެ.