ވޯލްޑް ކަޕް 2026 ގައި 52 އަހަރަށް ފަހު ވާދަކުރާ ހައިޓީގެ ޖާޒީ ޑިޒައިން ބަދަލުކުރަން ފީފާއިން އަންގައިފިއެވެ. ޖާޒީގައި ހިމެނި ތާރީޚީ ހަނގުރާމައެއްގެ ތަސްވީރު ފީފާގެ އިކުއިޕްމަންޓް ގަވާއިދާ ޚިލާފު ކަމަށް ކަނޑައެޅީއެވެ.

ހައިޓީގެ ޖާޒީ ތައްޔާރުކުރި ކޮލަމްބިއާގެ ކުންފުނި ސައެޓާ އިން ޑިޒައިންކުރި ޖާޒީގައި ހިމެނީ 1803 ވަނަ އަހަރުގެ "ބެޓަލް އޮފް ވެރްޓީއެރެ" ގެ ކުރެހުމެކެވެ. އެ ހަނގުރާމައަކީ ފަރަންސޭސި ސިފައިން ބަލިކޮށް ހައިޓީގެ މިނިވަންކަން ކަށަވަރުކުރި ނިންމާ ހަނގުރާމައެވެ. ހައިޓީ ދިދައާ އެކު އެ ތަސްވީރު ޖެހި ޖާޒީ ލައިގެން ކުޅުންތެރިން ފްލޮރިޑާގައި ބޭއްވި ދެ ރަހުމަތްތެރިކަމުގެ މެޗެއް ކުޅެފައިވެއެވެ. ނަމަވެސް ފީފާއިން ނިންމީ އެ ތަސްވީރަކީ "ސިޔާސީ، ދީނީ ނުވަތަ ޒާތީ މެސެޖެއް" ކަމަށް ތަރުޖަމާ ކުރެވިދާނެ އެއްޗެއް ކަމަށެވެ.

Advertisement

ސައެޓާ އިން އިންސްޓަގްރާމްގައި ނެރުނު ބަޔާނެއްގައި ބުނީ "ޑިޒައިން ކުރީ ހައިޓީގެ މުސްތަޤުބަލަށް ކޮންމެ ދުވަހަކު މަސައްކަތްކުރާ ފިރިހެނުންނާއި އަންހެނުންނަށް ޚާއްސަ ޓްރިބިއުޓެއްގެ ގޮތުގައި" ކަމަށާއި "ސިޔާސީ ބަޔާނެއް ދިނުމުގެ ނިޔަތެއް ނެތް" ކަމަށެވެ. އެހެން ނަމަވެސް ފީފާގެ ގަވާއިދަށް ފެތޭ ގޮތަށް ޖާޒީ ބަދަލުކޮށްފައިވާ ކަމަށް ވެސް ކުންފުނިން ބުންޏެވެ.

ހައިޓީ އެންމެ ފަހުން ވޯލްޑް ކަޕެއްގައި ކުޅުނީ 1974 ވަނަ އަހަރު ހުޅަނގު ޖަރުމަނުގައި ބޭއްވި މުބާރާތުގައެވެ. 52 އަހަރަށް ފަހު ކޮލިފައިވީ 2025 ވަނަ އަހަރުގެ ނޮވެންބަރު 18 ވަނަ ދުވަހު — އެއީ ބެޓަލް އޮފް ވެރްޓީއެރެގެ 222 ވަނަ އަހަރީ ދުވަހެވެ. ހައިޓީ ވޯލްޑް ކަޕް ފަށާނީ ޖޫން 13 ވަނަ ދުވަހު ބޮސްޓަންގައި ސްކޮޓްލެންޑާ ދެކޮޅަށެވެ. ހައިޓީ ހިމެނެނީ ސްކޮޓްލެންޑް، ބްރެޒިލް އަދި މޮރޮކޯ އާ އެކު ގްރޫޕް އީ ގައެވެ. ގޭންގު ހަމަނުޖެހުމުގެ ސަބަބުން ހައިޓީ ކޮލިފައިންގައި ވެސް އަމިއްލަ ޤައުމުގައި ހޯމް މެޗެއް ކުޅެވިފައެއް ނުވެއެވެ.