ވޯލްޑް ކަޕް 2026 ގައި އޮފިޝިއޭޓް ކުރަން ހޮވުނު ސޯމާލިޔާގެ ފުރަތަމަ ރެފްރީ ޢުމަރު ޢަބްދުލްޤާދިރް އަރުތާން އެމެރިކާއަށް އެތެރެވިޔަ ނުދީ ފޮނުވައިލުމުން، އެނބުރި ޤައުމަށް ދިޔައިރު ބަތަލެއްގެ ގޮތުގައި ހޫނު މަރުހަބާއެއް ކިޔައިފިއެވެ.

އުމުރުން 34 އަހަރުގެ އަރުތާން މިދިޔަ ހޮނިހިރު ދުވަހު އިސްތަންބޫލުން ފުރައިގެން މިއާމީ އިންޓަނެޝަނަލް އެއާޕޯޓަށް ދިޔައީ ޑިޕްލޮމެޓިކް ޕާސްޕޯޓާއި ވީސާ ހިފައިގެންނެވެ. ނަމަވެސް ބޯޑަރު އޮފިޝަލުން 11 ގަޑިއިރު ވަންދެން ސުވާލުކޮށް، ސޯމާލިޔާގެ ސިޔާސީ މަސްރަހާއި އަލް-ޝަބާބް ޖަމާޢަތާ ބެހޭ ގޮތުން ސުވާލުކުރި ކަމަށް ނިއު ޔޯކް ޓައިމްސް އަށް އަރުތާން ކިޔައިދީފައިވެއެވެ. އޭނާ ފީފާގެ ލިޔެކިޔުންތަކާއި ރެފްރީކަމުގެ ތަޖުރިބާ ދައްކައިދިން ނަމަވެސް، ހޯލްޑިން ސެލެއްގައި ބެހެއްޓުމަށް ފަހު އެނބުރި އިސްތަންބޫލަށް ފޮނުވައިލީއެވެ.

Advertisement

ޓްރަމްޕް ސަރުކާރުގެ ވައިޓް ހައުސް ވޯލްޑް ކަޕް ޓާސްކް ފޯސްގެ ވެރިޔާ އެންޑްރޫ ޖޫލިއާނީ ބުނީ "އެމެރިކާއަށް ގެއްލުންދޭން ރާވާ ނުބައި ބަޔަކާ މުޢާމަލާތް ކުރާ މީހުންނަށް އެތެރެވުމުގެ ހުއްދައެއް ނުދޭނެ" ކަމަށެވެ. ޓްރަމްޕް ސަރުކާރުގެ އޮފިޝަލަކު ނަން ހާމަނުކުރާ ގޮތަށް ބުނީ އަރުތާނާ "ޓެރަރިޒަމް ޖަމާޢަތްތަކެއް ކަމަށް ޝައްކުކުރެވޭ ބަޔަކާ ގުޅުން" ހުރި ކަމަށެވެ. ފީފާއިން ވަނީ އަރުތާން ވޯލްޑް ކަޕް ރެފްރީންގެ ރޮސްޓަރުން ބޭރުކޮށްފައެވެ.

އެކަމަކު ބުދަ ދުވަހު މޮގަދިޝޫ އެއާޕޯޓުން ފެނުނީ ތަފާތު މަންޒަރެކެވެ. ސަރުކާރުގެ އިސް ބޭފުޅުން މާ ބޮނޑިތަކާ އެކީ މަރުހަބާ ކިޔައި، ސޯމާލިޔާ ދިދަ ހިފައިގެން ތިބި އެތައް ސަތޭކަ ސަޕޯޓަރުން ސަލާމްކުރި ވަގުތު، ސްޓޭޑިއަމަށް ގެންގޮސް އެތައް ހާސް ބަޔަކު ކޮނޑަށް ލައިގެން އުފުލިއެވެ. "ވީ ކަމެއް ވީ، އެއީ ތަޤުދީރު. ކުރިއަށް އޮތް ވޯލްޑް ކަޕަށް ދާނަން" ކަމަށް އަރުތާން ސަޕޯޓަރުންނާ ވާހަކަ ދައްކަމުން ބުންޏެވެ.

އަރުތާން އެކަންޏެއް ނޫނެވެ. އީރާނުގެ 15 އޮފިޝަލަކާއި ޢިރާޤު ޓީމުގެ ރަސްމީ ފޮޓޯގްރާފަރަށް ވެސް އެމެރިކާއަށް އެތެރެވިޔަ ނުދީ ހުއްޓުވާފައިވެއެވެ. އެމެރިކާ ސަރުކާރުން ފީފާއަށް ކުރީން ޔަޤީންކަން ދީފައި އޮތީ "ހުރިހާ ޤައުމެއްގެ ކުޅުންތެރިންނާއި އޮފިޝަލުންނާއި ސަޕޯޓަރުންނަށް" ވޯލްޑް ކަޕަށް ދެވޭނެ ކަމުގެ ޔަޤީންކަމެވެ. ނަމަވެސް ޓްރަމްޕް ސަރުކާރުގެ ހަރުކަށި އިމިގްރޭޝަން ސިޔާސަތާ ހެދި ސޯމާލިޔާ، ހައިޓީ، އީރާން އަދި ނައިޖާ ފަދަ ޤައުމުތަކުގެ ރައްޔިތުންނަށް ވަނީ ފުރިހަމަ ދަތުރު ފަތުރުގެ ހުރަސްތަކެއް ކުރިމަތިވެފައެވެ.