ފެބްރުއަރީ 28 ގައި ފެށުނު ހަނގުރާމައިގެ 100 ވަނަ ދުވަހު އިސްރާއީލާއި އީރާނާ ދެމެދު ވައިގެ ހަމަލާ ބަދަލުކުރުމަށް ފަހު، އެމެރިކާގެ ރައީސް ޑޮނަލްޑް ޓްރަމްޕުގެ ބާރުއެޅުމާ އެކު އިސްރާއީލުން އީރާނަށް ދޭ ހަމަލާތައް ހުއްޓައިލައިފިއެވެ. ނަމަވެސް އީރާނުން މިސައިލް ހަމަލާ ހުއްޓައިލާނެ ކަމެއް އަދި ސާފެއް ނޫނެވެ.

ހޯމަ ދުވަހުގެ ދަންވަރު އިސްރާއީލުގެ ގިނަ އަދަދެއްގެ ހަނގުރާމަ މަތީންދާ ބޯޓުތަކުން އީރާނުގެ ވައިގެ ދިފާއީ ނިޒާމުތަކަށާއި ހުޅަނގު ދެކުނުގެ މާޝަހާރުގައި ހުރި ޕެޓްރޯކެމިކަލް ކޮމްޕްލެކްސެއް އަމާޒުކޮށް ހަމަލާ ދީފައިވެއެވެ. ވެރިރަށް ތެހެރާނާއި އިސްފަހާނާއި ތަބްރީޒުން ގޮވުންތައް އިވުނު ކަމަށް ރިޕޯޓުތައް ބުނެއެވެ. ހަމަލާތައް ފެށުމާ އެކު އީރާނުގެ ހުރިހާ އެއާޕޯޓެއް ބަންދުކުރިއެވެ. އީރާނުގެ ނޭޝަނަލް އެމަޖެންސީ މެޑިކަލް ޖަމިއްޔާ އިން ބުނީ މި ހަމަލާތަކުގައި 15 މީހަކު ޒަޚަމްވި ކަމަށާއި، މީހަކު މަރުވި ކަމުގެ ރިޕޯޓެއް ނެތް ކަމަށެވެ.

Advertisement

ރައްދުގައި އީރާނުން ގާތްގަނޑަކަށް 30 ބެލިސްޓިކް މިސައިލް އިސްރާއީލަށް ފޮނުވި ކަމަށް އިސްރާއީލުގެ އަސްކަރިއްޔާ ބުނެއެވެ. ގިނަ މިސައިލް އިންޓަސެޕްޓް ކުރެވުނު ކަމަށާއި، ބިމަށް ވެއްޓުނު ބައިތަކުން ކުދި އަލިފާންތައް ރޯވި ނަމަވެސް ސީރިއަސް ގެއްލުމެއް ނުލިބޭ ކަމަށް ބުންޏެވެ. ހުޅަނގު އައްސޭރީގެ ޖެރީކޯ ކައިރިން ވެސް އީރާނުގެ މިސައިލެއްގެ ބައިތައް ފެނިފައިވެއެވެ. މީގެ އިތުރުން ޔަމަނުގެ ޙޫޘީ ޖަމާޢަތުން ވެސް އިސްރާއީލަށް މިސައިލް ފޮނުވައި، ޓެލް އަވީވް ސަރަޙައްދުގައި ސައިރެން ޖެއްސިއެވެ. ޙޫޘީން ވަނީ ރެޑް ސީ ގައި އިސްރާއީލުގެ ޝިޕިން މަނާކުރާނެ ކަމަށް ވެސް އިޢުލާނުކޮށްފައެވެ.

ހަމަލާ ބަދަލުކުރުން ހުއްޓައިލުމާ ގުޅޭ ގޮތުން އިސްރާއީލުގެ އޮފިޝަލެއް ބުނީ، ޓްރަމްޕުގެ އެދުމަށް އީރާނަށް ދޭ ހަމަލާ ހުއްޓައިލަން ނިންމީ ކަމަށެވެ. އެމެރިކާ އިން އީރާނަށް އަންގާފައިވަނީ ތެހެރާނުން މިސައިލް ހުއްޓައިލައިފި ނަމަ އިސްރާއީލުން ދެން ހަމަލާ ނުދޭނެ ކަމަށެވެ. ނަމަވެސް ލުބުނާނުގައި ޙިޒްބުﷲ އާ ދެކޮޅު ޢަސްކަރީ ޙަރަކާތް ހުއްޓައި ނުލާނެ ކަމަށް ދިފާޢީ ވަޒީރު އިސްރާއީލް ކެޓްޒް ބުންޏެވެ. ޙިޒްބުﷲ އިން އިސްރާއީލަށް ހަމަލާ ދީފި ނަމަ ބެއިރޫތަށް ވައިގެ ހަމަލާ ދޭނެ ކަމުގެ އިންޒާރު ވެސް ކެޓްޒް ދިނެވެ.

މިއީ އެޕްރީލް މަހު ޤާއިމުކުރި ސީޒްފަޔާ އަށް ފަހު ދެ ޤައުމުގެ ދެމެދުގައި ހިނގި އެންމެ ބޮޑު ކުރިމަތިލުމެވެ. ފެބްރުއަރީ 28 ގައި އެމެރިކާ އާއި އިސްރާއީލު ގުޅިގެން އީރާނަށް ދިން ވައިގެ ހަމަލާތަކާ އެކު ފެށުނު މި ހަނގުރާމައިގައި، އީރާނުގެ ސުޕްރީމް ލީޑަރު ޢަލީ ޚާމަނާއީ ވަނީ މަރާލައިފައެވެ. އޭގެ ފަހުން ދެ ފަރާތުން ހަމަލާ ބަދަލުކުރުން ހުއްޓައިލުމުގެ އެތައް މަސައްކަތެއް ހިނގައި، ތަފާތު ސީޒްފަޔާ ތައް ރޫޅެމުން އައިސްފައިވެއެވެ.