ދުނިޔޭގެ މަޝްހޫރު ކްރެޑިޓް ރޭޓިންގ އެޖެންސީ، ފިޗް ރޭޓިންގްސްގެ އެންމެ ފަހުގެ ނިންމުންތަކާއެކު، ދިވެހިރާއްޖޭގެ އިޤްތިޞާދީ ކުރިއެރުމާއި ބޭންކް އޮފް މޯލްޑިވްސް (ބީ.އެމް.އެލް) ގެ މާލީ ދުޅަހެޔޮކަން ހާމަވެއެވެ.

އެގޮތުން، 2026 ވަނަ އަހަރު ދައްކަންޖެހޭ 500 މިލިއަން ޑޮލަރުގެ ސުކޫކްގެ ފައިސާ ކާމިޔާބުކަމާއެކު އަނބުރާ ދެއްކުމާ ގުޅިގެން، ފިޗުން ވަނީ ރާއްޖޭގެ 'ލޯންގް-ޓާމް ފޮރިން ކަރަންސީ އިޝުއަރ ޑިފޯލްޓް ރޭޓިންގ' 'ސީސީ' އިން 'ސީސީސީ-' އަށް މަތިކޮށްފައެވެ. އޭގެ ކުޑަ ދުވަސްކޮޅެއް ފަހުން، ފިޗް އިން ވަނީ ބީއެމްއެލްއަށް 'ސީސީސީ-' ރޭޓިންގއެއް 'ސްޓޭބަލް އައުޓްލުކް' އާއެކު ދީފައެވެ.

Advertisement

މީގެ އިތުރުން، ފިޗުން ވަނީ ބީއެމްއެލްގެ 'ލޯކަލް ކަރަންސީ ލޯންގް-ޓާމް' އަށް 'ސީސީސީ+' ގެ ރޭޓިންގއެއް ދީފައެވެ. މިއީ ދައުލަތުގެ ރޭޓިންގއަށްވުރެ ދެ ދަރަޖަ މަތީ ރޭޓިންގއެކެވެ.

ބީއެމްއެލްއަށް ލިބުނު މި ރޭޓިންގއަކީ އެ ބޭންކުގެ މާކެޓް ލީޑަޝިޕާއި، ރައުސްމާލުގެ ވަރުގަދަކަމާއި، ގޮންޖެހުންތަކުން އަރައިގަތުމުގެ ގާބިލުކަން މިނިވަން މުއައްސަސާއަކުން ބަލައިގަތުމެވެ. ރާއްޖޭގެ ބޭންކިންގ ދާއިރާގައި ބީއެމްއެލް އޮތް ވަރުގަދަ މަޤާމާއި އެ ބޭންކަށް އޮތް ވާދަވެރި ފުރުޞަތުތައް ފިޗުން ވަނީ ފާހަގަކޮށްފައެވެ.

ރާއްޖޭގެ އެންމެ ބޮޑު ބޭންކުގެ ހައިސިއްޔަތުން، ބީއެމްއެލް އަކީ އާންމު ފަރުދުންނާއި، ކުދި އަދި މެދު ފަންތީގެ ވިޔަފާރިތަކުގެ އިތުރުން ބޮޑެތި ކުންފުނިތަކަށް އެހީތެރިކަން ފޯރުކޮށްދިނުމުގައި މުހިންމު ދައުރެއް އަދާކުރާ ބޭންކެކެވެ. ބޭންކުގެ ފުޅާ ނެޓްވޯކާއި ޑިޖިޓަލް ބޭންކިންގ ޚިދުމަތްތަކުގެ އެހީގައި މުޅި ރާއްޖެއަށް މި ޚިދުމަތްތައް ފޯރުކޮށްދެއެވެ.

މީގެ އިތުރުން، ބޭންކުން އަމިއްލައަށް ރައުސްމާލު އުފެއްދުމާއި، ހަރުދަނާ ރިސްކް މެނޭޖްމަންޓާއި ޑިވިޑެންޑް ޕޮލިސީގެ ސަބަބުން ބޭންކުގެ ރައުސްމާލު ވަރުގަދަކަން ފިޗުން ފާހަގަކުރިއެވެ. މި ކަންކަމުގެ ސަބަބުން، ކަސްޓަމަރުންގެ މާލީ ބޭނުންތަކަށް ފުރުޞަތު ދެމުންވެސް، ބޭންކުގެ މާލީ ރައްކާތެރިކަން ދެމެހެއްޓުމަށް މަގުފަހިވެއެވެ.

ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ މުޙައްމަދު ޝަރީފް ވިދާޅުވީ، މި ރޭޓިންގއަކީ ބޭންކުގެ މާލީ ދުޅަހެޔޮކަމާއި، ހަރުދަނާ ކުރިއެރުމުގެ އިތުރުން ކުދި ޖަޒީރާ އިޤްތިޞާދެއްގައި ބޭންކުން ދައްކުވައިދޭ ސާބިތުކަން ހާމަކޮށްދޭ ކަމެއް ކަމަށެވެ.

ބޭރު ފައިސާގެ ދަތިކަމާއި ބައެއް ދާއިރާތަކަށް ބޭންކުގެ ލޯނުތައް އަމާޒުވެފައި ހުރުން ފަދަ ގޮންޖެހުންތައް ހުރިކަން ފިޗުން ފާހަގަކުރި ނަމަވެސް، ބީއެމްއެލްގެ ވަރުގަދަ މަޤާމާއި، އިތުބާރު ހިފޭ ޑިޕޮސިޓް ބޭސް އަދި ހަރުދަނާ ރިސްކް މެނޭޖްމަންޓްގެ ސަބަބުން، އިޤްތިޞާދީ އެކި ހާލަތްތަކުގައިވެސް ބޭންކަށް ކުރިއަށް ދެވޭނެ ކަމުގެ ޔަޤީންކަން އެ އެޖެންސީން ވަނީ ދީފައެވެ.