ދުޅަހެޔޮ ސިއްޙަތެއްގައި ހުންނަން ދުވާލަކު އަށް ތަށި ފެން ބޯން ޖެހޭ ކަމަށް ބުނާ ވާހަކައަކީ ގާތްގަނޑަކަށް ކޮންމެ މީހަކު ވެސް އަޑު އެހި ވާހަކައެކެވެ. ފެން ފުޅި ކައިރީގައި ބެހެއްޓުމަށް ހަނދާންކޮށްދޭ އެޕްތަކާއި، ސޯޝަލް މީޑިއާ އިންފްލުއެންސަރުން ބޮޑެތި ފެން ފުޅި ހިފައިގެން އުޅޭ ތަން ފެންނާނެއެވެ. އެކަމަކު މި ވާހަކައިގެ ފެށުމަށް ބަލައިލީމާ ފެންނަނީ ތަފާތު މަންޒަރެކެވެ.

މި ވާހަކައިގެ އަސްލު ގޮސް ހުއްޓެނީ 1945 ވަނަ އަހަރު އެމެރިކާގެ ފުޑް އެންޑް ނިއުޓްރިޝަން ބޯޑުން ނެރުނު ލަފައަކަށެވެ. އެ ލަފާގައި ބުނީ ދުވާލަކު ގާތްގަނޑަކަށް 2.5 ލީޓަރުގެ ފެން ހަށިގަނޑަށް ބޭނުންވާ ކަމަށެވެ. ނަމަވެސް އެ ޢަދަދުގެ ތެރޭގައި ހިމެނެނީ ހަމައެކަނި ބޯ ފެނެއް ނޫނެވެ. ކާ ތަކެތީގައި ހިމެނޭ ފެނާއި، ސައި، ކޮފީ، ޖޫސް ފަދަ ހުރިހާ ދިޔާ އެއްޗެއް ވެސް އެ ޢަދަދުގެ ތެރެއަށް ވަދެއެވެ. ޒަމާންތައް ފާއިތުވެ ދިޔައިރު މި މުހިންމު ތަފުސީލު ގެއްލި، "ދުވާލަކު އަށް ތަށި ސާފު ފެން ބޯންވާނެ" ކަމަށް ބަދަލުވީއެވެ.

މި މައުޟޫޢުގައި ކޮށްފައިވާ ދިރާސާތަކަށް ބަލާއިރު، ދުވާލަކު ސީދާ އަށް ތަށި ފެން ބޯން ޖެހޭ ކަމަށް ސާބިތުކޮށްދޭ އެއްވެސް ސައިންޓިފިކް ހެއްކެއް ނެތެވެ. ޑާޓްމައުތު ޔުނިވާސިޓީގެ ޑޮކްޓަރެއް ކަމުގައިވާ ހައިންޒް ވެލްޓިން 2002 ވަނަ އަހަރު ކުރި ދިރާސާގައި ވެސް މި "އަށް ތަށީ"ގެ ލަފައަށް ބާރުދޭ ހެއްކެއް ހޯދިފައި ނުވާ ކަމަށް ފާހަގަކޮށްފައިވެއެވެ.

ޙަޤީޤަތުގައި ކޮންމެ މީހަކަށް ބޭނުންވާ ފެނުގެ މިންވަރު ތަފާތެވެ. ހޫނު މޫސުމުގައި ގިނައިން ދާ ހިއްލާ މީހަކަށް ބޭނުންވާ ވަރާއި، އެއާ ކޮންޑިޝަނެއްގެ ތެރޭގައި ގިނަ ވަގުތު ހޭދަކުރާ މީހަކަށް ބޭނުންވާ ވަރު އެއް ވަރެއް ނުވާނެއެވެ. ހަށިގަނޑުގެ ބޮޑުމިނާއި، ކަސްރަތުކުރާ މިންވަރާއި، ދިރިއުޅޭ ތަނުގެ މޫސުމާއި، ސިއްޙީ ޙާލަތު, މި ހުރިހާ ކަމަކުން ވެސް ފެނުގެ ބޭނުންތެރިކަމުގެ މިންވަރު ބަދަލުވެއެވެ.

އެމެރިކާގެ ނެޝަނަލް އެކެޑެމީ އޮފް ސައިންސެސް އިން ލަފާ ދެނީ ދުވާލެއްގެ ޖުމްލަ ދިޔާ ތަކެތީގެ މިންވަރު ފިރިހެނުންނަށް ގާތްގަނޑަކަށް 3.7 ލީޓަރު، އަންހެނުންނަށް ގާތްގަނޑަކަށް 2.7 ލީޓަރު ކަމަށެވެ. ނަމަވެސް ހަނދާނުގައި ބަހައްޓަންވީ ކެއުމުގައި ހިމެނޭ ފެނުގެ ބައި ވެސް މީގެ ތެރެއަށް ވަންނަ ކަމެވެ. ކެއުމުން ގާތްގަނޑަކަށް %20 ފެން ހަށިގަނޑަށް ލިބެއެވެ.

ރާއްޖެ ކަހަލަ ހޫނު ޤައުމެއްގައި ދިރިއުޅޭ ނަމަ، ދާ ހިއްލާ މިންވަރު ގިނަވާތީ ފެން ބޯ މިންވަރު އިތުރުކުރާން ޖެހިދާނެއެވެ. ޚާއްޞަކޮށް ބޭރުގައި ހޫނުގައި ގިނަ ވަގުތު ހޭދަކުރާ ނަމައެވެ.

އެންމެ ފަސޭހަ ގޮތަކީ ހަށިގަނޑުގެ ނިޝާންތަކަށް ސަމާލުކަން ދިނުމެވެ. ކަރު ހިއްކާ ނަމަ ފެން ބޯށެވެ. ކުޑަކަމުދާ ތަކެތީގެ ކުލައަށް ބެލުމަކީ ވެސް ފައިދާ ހުރި ގޮތެކެވެ. މަޑު ރީނދޫ ކުލައެއް ހުރި ނަމަ ފެން ބޯ މިންވަރު ރަނގަޅެވެ. ގަދަ ރީނދޫ ކުލައެއް ނުވަތަ މާ އަނދިރި ކުލައެއް ހުރި ނަމަ ފެން ބޯ މިންވަރު އިތުރުކުރާންވީއެވެ.

ދެން ފަހަރަކުން ފެން ފުޅީގެ އެޕުން ނޮޓިފިކޭޝަނެއް އައީމާ، ހަނދާން ބަހައްޓާށެވެ، ދުވާލަކު ވަކި ޢަދަދެއް ހަމަކުރާކަށް ނުޖެހެއެވެ. ހަށިގަނޑު ބުނާ އެއްޗަކަށް ކަންފަތް ދިނީމާ ނިމުނީއެވެ.