ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އަލަށް ޤާއިމުކުރި ފެކަލްޓީ އޮފް އެގްރިކަލްޗަރ އެންޑް ފުޑް ސައެންސަސްގެ ޑީންގެ މަޤާމަށް އިބްރާހީމް ޝަބައު ރަސްމީކޮށް ޢައްޔަންކޮށް، އެ ކަމުގެ ރަސްމިއްޔާތު ބާއްވައިފިއެވެ.

މި ރަސްމިއްޔާތުގައި ވާހަކަދައްކަވަމުން ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް ވިދާޅުވީ، މި ފެކަލްޓީ ޤާއިމުކުރުމަކީ ޔުނިވަރސިޓީގައި ދަނޑުވެރިކަމުގެ ފެކަލްޓީއެއް އުފެއްދެވުމަށް ރައީސް ވެވަޑައިގެންނެވި ވަޢުދު ފުއްދުން ކަމަށެވެ. އަދި މި ފެކަލްޓީގެ މައި ހަބް ހުންނާނީ ތޮއްޑޫގައި ކަމަށާއި، އެއީ ދަރިވަރުންނަށް ޢަމަލީ ތަޖުރިބާ އާއި ތައުލީމު އެއްކޮށް ލިބޭނެ ގޮތް ހެދުމަށް ކަމަށް ވެސް ވައިސް ޗާންސެލަރ ވިދާޅުވިއެވެ. މިހާރު ވެސް ޔުނިވަރސިޓީ އިން އެޑްވާންސްޑް ސެޓިފިކެޓް ޕްރޮގްރާމްތަކާއި ޑިޕްލޮމާ އިން އެގްރިކަލްޗަރ އަދި ބެޗެލާ އޮފް ފުޑް ސައެންސް ހިންގަމުން އަންނައިރު، އާ ފެކަލްޓީގެ ސަބަބުން މި ދާއިރާގެ ތައުލީމީ ފުރުޞަތުތައް އިތުރަށް ފުޅާވެގެންދާނެ ކަމަށް ވިދާޅުވިއެވެ.

Advertisement

ޑީން ޝަބައު ވިދާޅުވީ، އެ ބޭފުޅާގެ ތަޞައްވުރަކީ ރާއްޖޭގެ ރަށްތަކުގެ ތިމާވެށްޓާ ގުޅޭ ގޮތަށް "އެޓޯލް އެގްރިކަލްޗަރ" ގެ ނަމުގައި ދަނޑުވެރިކަމުގެ އުސޫލުތައް ތަރައްޤީކުރުން ކަމަށެވެ. މީގެ އިތުރުން މޫސުމީ ބަދަލުތަކަށް ހޭނުމާއި، ދެމެހެއްޓެނިވި ގޮތްތައް ހޯދުމާއި، ތައުލީމީ ދާއިރާ އާއި ސިނާޢަތާ ދެމެދު ގުޅުން ބަދަހިކުރުމުގެ މުހިންމުކަން ޝަބައު ފާހަގަކުރެއްވިއެވެ. އެގްރޯ-ޓޫރިޒަމް އާއި އެގްރޯ-އިކޮލޮޖީ ފަދަ އިންޓަޑިސިޕްލިނަރީ ޕްރޮގްރާމްތައް ކުރިމަގުގައި ތަޢާރަފުކުރެވިދާނެ ކަމަށް ވެސް ޑީން ވިދާޅުވިއެވެ.