ދިވެހިރާއްޖޭގައި ހުންނަ ޖަޕާނު އެމްބަސީ އާއި ޖަޕާން ފައުންޑޭޝަންގެ އެހީތެރިކަމާ އެކު، ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އާރޓްސް އިން "ޖަޕަނީސް ލޭންގުއޭޖް އެލެމެންޓްރީ 1" ގެ ނަމުގައި ކޯހެއް ފަށައިފިއެވެ.

މި ކޯހަކީ ޖަޕާނު ބަސް ދަސްކުރުމަށް ޝައުޤުވެރިވާ ފަރާތްތަކަށް އަމާޒުކޮށް، ބަހުގެ ހުނަރުތައް ތަރައްޤީކުރުމަށް ހިންގާ 15 ހަފުތާގެ ޕްރޮގްރާމެކެވެ. ކޯސް ފެށީ މި ހިނގާ މޭ މަހުގެ 31 ވަނަ ދުވަހުއެވެ. ކިޔަވައިދެނީ ފެކަލްޓީއަށް ހާޒިރުވެގެން، ކޮންމެ އާދިއްތަ، އަންގާރަ އަދި ބުރާސްފަތި ދުވަހެއްގެ ރޭގަނޑު 19:00 އިން 21:00 އަށެވެ.

Advertisement

މި ކޯހުގައި ބައިވެރިވެވެނީ 12 އަހަރުން މަތީގެ ފަރާތްތަކަށެވެ. ޖާގައިގެ ޢަދަދަކީ 30 އެވެ. ކޯސް ފީ އަކީ 2,250 ރުފިޔާއެވެ. ކޯހުގައި ބައިވެރިވުމުގެ ޝަރުތަކީ ޖަޕާނު ބަހުގެ ބޭސިކް ކޯހެއް ނިންމާފައިވުން ނުވަތަ އެ ފެންވަރުގެ ހުނަރު ހުރިކަމުގެ ލިޔެކިޔުން ހުށަހެޅުމެވެ.