އީރާނުގެ އަސްކަރީ ތަންތަނަށް އެމެރިކާއިން ހަމަލާ ދިނުމާ ގުޅިގެން، ކުވެއިތުގައި ތިބި އެމެރިކާ ސިފައިންނަށް އީރާނުން ބެލެސްޓިކް މިސައިލުން ހަމަލާ ދީފިއެވެ.

ދެ ޤައުމުގެ ދެމެދުގައި ސީޒްފަޔާ މަޝްވަރާތައް ކުރިއަށް ދިޔަ ނަމަވެސް، ހަމަލާ ބަދަލުކުރުން ހުއްޓުމެއް ނެތި ވަރުގަދަވަމުން ދާއިރު، ހޮރްމުޒް ކަނޑުއޮޅި ބަންދުކޮށްފައި އޮތުމުން ދުނިޔޭގެ ހަކަތައިގެ ބާޒާރަށް ބޮޑެތި ލޮޅުންތައް އަރަމުންދެއެވެ.

Advertisement

އެމެރިކާގެ ސެންޓްރަލް ކޮމާންޑުން ބުނީ ހޮނިހިރު އަދި އާދީއްތަ ދުވަހު އީރާނުގެ ގެރޫކް ސިޓީ ކައިރިއާއި ޤެޝްމް ޖަޒީރާގައި ހުރި ވައިގެ ދިފާޢީ ނިޒާމުތަކާއި ޑްރޯން ކޮންޓްރޯލް ސްޓޭޝަނަކަށް ހަމަލާ ދީފައިވާ ކަމަށެވެ. ބައިނަލްއަޤުވާމީ ސަރަޙައްދުގެ މަތީގައި އުދުހެމުން ދިޔަ އެމެރިކާގެ ޑްރޯނެއް އީރާނުން ވައްޓައިލުމުގެ ރައްދެއްގެ ގޮތުގައި ދިން މި ހަމަލާތަކާ ގުޅިގެން، އީރާނުގެ ރެވޮލިއުޝަނަރީ ގާޑުން ވަނީ ކުވެއިތުގައި ހުރި އެމެރިކާ އަސްކަރީ މަރުކަޒުތަކަށް ދެ ބެލެސްޓިކް މިސައިލް ފޮނުވައިފައެވެ. ސެންޓްރަލް ކޮމާންޑުން ބުނި ގޮތުގައި ދެ މިސައިލް ވެސް ވައްޓައިލީ ކަމަށާއި އެއްވެސް އެމެރިކާ ސިފައިންނަށް ގެއްލުމެއް ނުލިބޭ ކަމަށެވެ.

ހޮރްމުޒް ކަނޑުއޮޅީގެ ދަތުރުފަތުރު ވަނީ ހަނގުރާމައިގެ ކުރިއާ އަޅައިބަލާއިރު އިންތިހާއަށް ދަށްވެފައެވެ. ލޮއިޑްސް ލިސްޓް އިންޓެލިޖެންސްގެ ތަފާސް ހިސާބުތައް ދައްކާ ގޮތުން، ހުކުރު ދުވަހާ ހަމައަށް ހަތް ދުވަހުގެ ތެރޭގައި އެ ކަނޑުއޮޅިން ދަތުރުކުރީ އެންމެ 36 ބޯޓެވެ. ހަނގުރާމައިގެ ކުރިން ދުވާލަކު 130 އަށް ވުރެ ގިނަ ބޯޓު އެ ކަނޑުއޮޅިން ދަތުރުކުރިއެވެ. ދުނިޔޭގައި ވިޔަފާރިކުރާ ތެލާއި ގޭހުގެ ފަސް ބައިކުޅަ އެއް ބައި ކުރިން ދަތުރުކުރީ މި ކަނޑުއޮޅިންނެވެ. ކަނޑުއޮޅި ބަންދުވެފައި އޮތުމުން ހަކަތައިގެ ސަޕްލައިގެ އިތުރުން ކެމިކަލް ފާޓިލައިޒާ ސަޕްލައިއަށް ވެސް ބޮޑެތި ދަތިތައް ކުރިމަތިވެ، ކާބޯތަކެތީގެ ދަތިކަމެއް އައިސްދާނެ ކަމުގެ ބިރު ވަނީ ބޮޑުވެފައެވެ.

ހަމައެއާ އެކު ލުބުނާނުގައި އިސްރާއީލާއި ހިޒްބުﷲ ހަމަލާ ބަދަލުކުރުން ވަރުގަދަވަމުން ދިއުމަކީ ސީޒްފަޔާ އެއްބަސްވުމަށް ބޮޑު ގޮންޖެހުމެކެވެ. ޓްރަމްޕް ބުނީ ދެ ފަރާތުން ހަމަލާ މަޑުޖައްސައިލަން އެއްބަސްވީ ކަމަށެވެ. ނަމަވެސް އެ ވާހަކަ ބުނިތާ ކުޑައިރުކޮޅެއްގެ ތެރޭގައި ލުބުނާނުން އިސްރާއީލަށް މިސައިލް ފޮނުވައިފައިވެއެވެ. އީރާނުގެ ޚާރިޖީ ވުޒާރާއިން ވަނީ ލުބުނާނުގެ މަސްރަޙު ގޯސްވުމުގެ ޒިންމާ އެމެރިކާގެ ބޮލުގައި އަޅުވައިފައެވެ.

އީރާނުގެ ޚާރިޖީ ވުޒާރާގެ ތަރުޖަމާން އިސްމާޢީލް ބަޣާއީ ހޯމަ ދުވަހު ބުނީ އެމެރިކާއިން "އެކި ފަހަރު" ޕޮޒިޝަންތައް ބަދަލުކުރާ ކަމަށާއި، "މަޝްވަރާ ކުރިއަށް ދަނީ އިތުބާރު ގެއްލިފައިވާ މާހައުލެއްގައި" ކަމަށެވެ. އެމެރިކާއާއި އިސްރާއީލުން ފެބްރުއަރީ 28 ގައި އީރާނަށް ހަމަލާ ދީ ހަނގުރާމަ ފެށި ފަހުން، ހަމަލާ ބަދަލުކުރުން ހުއްޓައިލުމުގެ އެއްބަސްވުމެއް ހެދި ނަމަވެސް ދެ ފަރާތުން ވެސް ތަކުރާރުކޮށް އެ އެއްބަސްވުމާ ޚިލާފުވަމުންދެއެވެ.