އެކި ކުޅިވަރުތަކަށް ޚާއްޞަ ދަނޑުތައް ހިމެނޭ ގޮތަށް ހުޅުމާލޭ ފޭސް 1 ގައި ޤާއިމް ކުރި "އެން1 ސްޕޯޓްސް ޕާކު" ރޭ ރަސްމީކޮށް ހުޅުވައިފިއެވެ.

މި ޕާކު ތަރައްޤީ ކޮށްފައި ވަނީ ހުޅުމާލޭ ފޭސް 1 ގައި ހުންނަ ފިޔަވައްޗާ އިންވެގެން އޮންނަ ބިމުގައެވެ. ރޭ ބޭއްވި ޚާއްޞަ ރަސްމިއްޔާތެއްގައި ކިކް-އޮފް މެޗުތަކާ އެކު ޕާކު ހުޅުއްވައި ދެއްވީ އެޗްޑީސީގެ މެނޭޖިން ޑިރެކްޓަރ ބްރިގޭޑިއަރ ޖެނެރަލް (ރިޓަޔާޑް) ޢަލީ ޒުހައިރު އަދި ހުޅުމާލެ ކޮމިއުނިޓީ ރެޕްރެޒެންޓެޓިވް އިބްރާހީމް ނަޢީމެވެ.

Advertisement

ޕާކުގައި ހިމެނެނީ ފުޓްސަލް ދަނޑަކާއި ވޮލީ ކޯޓެއްގެ އިތުރުން ހާފް ބާސްކެޓް ކޯޓެއް އަދި ޕާކިން ޒޯނެކެވެ. މިހާރު ވަނީ ޢާންމުންނަށް ހުޅުވައިލައިފައެވެ.

މިއީ ހުޅުމާލޭގައި ދިރިއުޅޭ ރައްޔިތުންގެ އިޖުތިމާޢީ ދުޅަހެޔޮ ކަމާއި ކުޅިވަރު ކުޅެވޭނެ ވަސީލަތްތައް އިތުރު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ޤާއިމް ކުރި ޕާކެކެވެ. މީގެ އިތުރުން ހުޅުމާލޭ ދެ ވަނަ ފިޔަވަހީގައި އެޗްޑީސީން ޤާއިމް ކުރި ކުޅިވަރު އެކުވެނި ވެސް މިހާރު ވަނީ ޢާންމުންނަށް ހުޅުވައިލައިފައެވެ.