ދުންފަތުގެ އިސްތިޢުމާލު ކުރުން މަޑުމަޑުން ނައްތައިލުމަށް ޓަކައި، ވަކި އަހަރެއްގެ ފަހުން އުފަންވާ މީހުންނަށް ދުންފަތުގެ ބާވަތްތައް ވިއްކުން ދާއިމީ ގޮތެއްގައި މަނާ ކުރުމުގެ "ޖެނެރޭޝަނަލް ޓޮބެކޯ ބޭން" އެއް ގެނައުމާ މެދު ސްރީ ލަންކާ އިން ވިސްނަމުންދާ ކަމަށް އެ ޤައުމުގެ ސަރުކާރާއި ޞިއްޙީ ދާއިރާގެ ފަރާތްތަކާ ހަވާލާ ދީ ޚަބަރުތައް ބުނެފިއެވެ.

މި މަޝްވަރާތައް ކުރެވެމުން ދަނީ، ދުނިޔޭގައި ފުރަތަމަ ފަހަރަށް ޖީލީ ދުންފަތް މަނާ ކުރުން ތަންފީޒު ކުރި ޤައުމުގެ ހައިސިއްޔަތުން ރާއްޖެ ދައްކައިދިން ނަމޫނާ އިން އިންސްޕަޔާ ވެގެން ކަމަށް ރިޕޯޓުތައް ބުނެއެވެ. ރާއްޖެ އިން ވަނީ 1 ޖެނުއަރީ 2007 ގެ ފަހުން އުފަންވި މީހުންނަށް ދުންފަތުގެ ބާވަތްތައް ވިއްކުން ދާއިމީ ގޮތެއްގައި މަނާ ކޮށްފައެވެ.

Advertisement

ލަންކާ އިން ބަލަމުންދާ ޕްރޮޕޯޒަލްތަކުގެ ތެރޭގައި 2000 ވަނަ އަހަރުގެ ފަހުން ނުވަތަ ފަހުގެ ކަޓް-އޮފް އިޔާ އަކަށް ފަހު އުފަންވި މީހުންނަށް ދުންފަތް ވިއްކުން މަނާ ކުރުން ހިމެނެއެވެ. ނަމަވެސް ސީދާ ބޭނުންކުރާނެ ފްރޭމްވޯކެއް އަދި ނިންމައިފައެއް ނުވެއެވެ.

މި ބަހުސް ވަރުގަދަ ވެފައި ވަނީ ކޮލޮމްބޯގައި ބޭއްވި ދުންފަތް ކޮންޓްރޯލާ ގުޅޭ މަތީ ފެންވަރުގެ ފޯރަމެއް ގައެވެ. ޞިއްޙީ ނައިބު ވަޒީރު ހަންސަކާ ވިޖެމުނީ މި ފޯރަމުގައި ވާހަކަ ދައްކަވަމުން ވިދާޅުވީ ދުންފަތުގެ އިސްތިޢުމާލު ކުރުމަކީ "ސައްތައިން ސައްތަ ރައްކާތެރިވެވޭ" ކަމެއް ކަމަށާއި، ސަރުކާރުގެ މައިގަނޑު އަމާޒަކީ ބަލިވީމާ ފަރުވާ ދިނުމުގެ ބަދަލުގައި ބަލި ޖެހުމުގެ ކުރިން ރައްޔިތުން ސަލާމަތް ކުރުން ކަމަށެވެ.

ނަމަވެސް މި ޕްރޮޕޯޒަލަށް ސަރުކާރުގެ ބައެއް ފަރާތްތަކުންނާއި މާލީ އިދާރާތަކުން ދެކޮޅު ހެދުން ކުރިމަތިވެފައި ވާ ކަމަށް ވެއެވެ. ދުންފަތުގެ ޓެކުހަކީ ސަރުކާރުގެ ބޮޑު އާމްދަނީ އެއް ކަމަށް ވާ އިރު، ޚާއްޞަކޮށް އިޤްތިޞާދީ ކާރިސާ އަކަށް ފަހު ލަންކާ ހަމައަކަށް އެޅެމުންދާ ދަނޑިވަޅެއްގައި، ދިގު ރާސްތާގައި ޓެކްސް ރެވެނިއު ދަށް ވެދާނެ ކަމުގެ ކަންބޮޑުވުން އެ ފަރާތްތައް ފާޅު ކުރެއެވެ. ހަރުކަށި ޖީލީ މަނާ ކުރުމެއް ގެނެސްފި ނަމަ ކަޅު ބާޒާރުގައި ސިނގިރޭޓު ވިއްކުން އިތުރުވެދާނެ ކަމުގެ ބިރު ވެސް ހުރި ކަމަށް ވެއެވެ.

ޞިއްޙީ ތަޖުރިބާކާރުން ބުނަނީ ދިގު ރާސްތާގެ ފައިދާ، ވަގުތީ މާލީ ކަންބޮޑުވުންތަކަށް ވުރެ ބޮޑު ކަމަށެވެ. ދުންފަތާ ގުޅޭ ބަލިތަކަށް ލަންކާ އިން ކޮންމެ އަހަރަކު ބިލިއަނުން ރުޕީސް ޚަރަދު ކުރާ ކަމަށާއި، ދުޅަހެޔޮ ރައްޔިތެއް ބިނާ ކުރެވިއްޖެ ނަމަ އިޤްތިޞާދު ވެސް ވަރުގަދަ ވާނެ ކަމަށް ފާހަގަ ކުރެއެވެ.

ނިއުޒީލެންޑް، އިނގިރޭސިވިލާތް އަދި މެލޭޝިއާ ފަދަ ޤައުމުތަކުގައި ވެސް މި ފަދަ ޕްރޮޕޯޒަލް ބަހުސް ކޮށްފައި ވާ އިރު، ރާއްޖެ ވެފައި ވަނީ މި ފަދަ ޤާނޫނެއް ފުރިހަމައަށް ތަންފީޒު ކުރި ދުނިޔޭގެ ފުރަތަމަ ޤައުމަށެވެ.