ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ތެލުގެ ވިޔަފާރި ފުޅާކުރުމަށް ބޮޑެތި އިންވެސްޓްމަންޓްތަކެއް ކުރަމުންދާ ކަމަށް އެ ކުންފުނީގެ އެމްޑީ ޝިމާދު އިބްރާހީމް މިރޭ ބޭއްވި އަހަރީ އާންމު ޖަލްސާގައި ވިދާޅުވެއްޖެއެވެ.

އެ ގޮތުން 25,000 މެޓްރިކް ޓަނުގެ ތެޔޮ ޓޭންކަރު "ނިއޮން" މި އަހަރު ގެނެސް ތެޔޮ އެތެރެކުރުމުގެ ގާބިލުކަން ވަރުގަދަކޮށްފައިވާ އިރު، ރާއްޖޭގެ އެކި ހިސާބުތަކުގައި މޮޑިއުލާ ފިއުލް ސްޓޭޝަންތައް ގާއިމުކުރުމުގެ މަސައްކަތް ދަނީ ކުރަމުންނެވެ. މީގެ އިތުރުން ފުނަދޫގައި ތެޔޮ ރައްކާކުރާ ޓޭންކްތައް އިތުރުކުރުމުގެ މަޝްރޫއު ވެސް ކުރިއަށް ދެއެވެ.

Advertisement

ތެލުގެ ވިޔަފާރި ފުޅާކުރުމުގެ އެންމެ ބޮޑު ކާމިޔާބީއެއް ގޮތުގައި ފާހަގަކުރެވެނީ ބައިނަލްއަގުވާމީ ބަންކަރިން ޚިދުމަތެވެ. 2024 ވަނަ އަހަރު ފެށި މި ޚިދުމަތުން މިހާރު އެއް ބިލިއަން ރުފިޔާ އަށް ވުރެ ބޮޑު އާމްދަނީއެއް ލިބިފައިވާ ކަމަށް ޝިމާދު ވިދާޅުވިއެވެ.

މި ފިޔަވަޅުތައް އަޅާފައި ވަނީ ދުނިޔޭގެ ތެލުގެ ބާޒާރަށް ބޮޑެތި ލޮޅުންތަކެއް އައިސްފައިވާ ދަނޑިވަޅެއްގައެވެ.

އެސްޓީއޯގެ ޕްރެޒެންޓޭޝަނުގައި ދައްކާ ގޮތުން މި އަހަރުގެ ފެބްރުއަރީ އާއި އެޕްރީލާ ދެމެދު ޑީސެލް ފީފާއެއްގެ އަގު 270 ޑޮލަރާ ގާތަށް އުފުލުނެވެ. 2025 ވަނަ އަހަރު ތެލުގެ ސެގްމަންޓުގެ އާމްދަނީ ތިނެއް އިންސައްތަ ދަށަށް ގޮސް 11.7 ބިލިއަން ރުފިޔާ އަށް ތިރިވި ނަމަވެސް، ޓްރޭޑިން އަދި އިންޝުއަރެންސް ފަދަ ދާއިރާތަކުން ލިބުނު ކުރިއެރުމާ އެކު ކުންފުނީގެ ޖުމުލަ ސާފު ފައިދާ ތިނެއް އިންސައްތަ އިތުރުވެ 763 މިލިއަން ރުފިޔާ އަށް އެރިއެވެ.