ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ 2025 ވަނަ އަހަރުގެ އަހަރީ އާންމު ޖަލްސާގައި، ހިއްސާއަކަށް 85 ރުފިޔާ ބެހުމަށް ފާސްކޮށްފިއެވެ.

މިއީ އެސްޓީއޯގެ ތާރީޚުގައި ވެސް ހިއްސާދާރުންނަށް ބެހި އެންމެ ބޮޑު ޑިވިޑެންޑެވެ. މީގެ ކުރިން 2024 އަދި 2023 ވަނަ އަހަރު ބެހީ ހިއްސާއަކަށް 80 ރުފިޔާ އެވެ. އޭގެ ކުރިން 2022 ގައި 77 ރުފިޔާ، 2021 ގައި 65 ރުފިޔާ ބެހިއެވެ. ކުންފުނީގެ ހިއްސާދާރުންގެ އަދަދު 4,318 އަށް އެރި އިރު، ހިއްސާއެއްގެ ނެޓް އެސެޓް ވެލިއު ހުރީ 4,991 ރުފިޔާގައެވެ.

Advertisement

އެސްޓީއޯ އިން 2025 ވަނަ އަހަރު 15.5 ބިލިއަން ރުފިޔާގެ އާމްދަނީއެއް ހޯދައި، ޖުމުލަ ފައިދާގެ ގޮތުގައި 2.4 ބިލިއަން ރުފިޔާ، ސާފު ފައިދާގެ ގޮތުގައި 763 މިލިއަން ރުފިޔާ ވަނީ ލިބިފައެވެ. މިއީ ކުރީ އަހަރާ އަޅައިބަލާއިރު ތިނެއް އިންސައްތައިގެ ކުރިއެރުމެކެވެ. ކުންފުނީގެ ޖުމުލަ އެސެޓް 14.3 ބިލިއަން ރުފިޔާ އަށް، އިކުއިޓީ 5.6 ބިލިއަން ރުފިޔާ އަށް އިތުރުވި އިރު، ވާކިން ކެޕިޓަލް ވަނީ 1.3 ބިލިއަން ރުފިޔާ އިން 3.2 ބިލިއަން ރުފިޔާ އަށް ބޮޑު ތަނުން ރަނގަޅުވެފައެވެ.

ފާހަގަކޮށްލެވޭ ކާމިޔާބީތަކުގެ ތެރޭގައި ބަންކަރިން ވިޔަފާރީގެ އާމްދަނީ އެއް ބިލިއަން ރުފިޔާ ފަހަނައެޅުމާއި، ފެނަކައިން ނުލިބި ހުރި ކުރީގެ ދެއްކުންތަކުގެ ތެރެއިން އެއް ބިލިއަން ރުފިޔާ ހޯދުމާއި، ހުޅުމާލެ ހޮޓެލް ޕްރޮޖެކްޓް ބިމާ ބަދަލުކުރުން ހިމެނެއެވެ. ކުރިއަށް އޮތް ފަސް އަހަރަށް އެސްޓީއޯ އިން ވަނީ "އިވޯލްވް 2026-2030" ގެ ނަމުގައި ސްޓްރެޓެޖީއެއް އިއުލާންކޮށް، 2030 ގެ ނިޔަލަށް އާމްދަނީ 20 ބިލިއަން ރުފިޔާ އަށް، ސާފު ފައިދާ އެއް ބިލިއަން ރުފިޔާ އަށް ގެންދިއުމުގެ ލަނޑުދަނޑި ކަނޑައަޅައިފައެވެ.

މިރޭ ދުސިޓް ޑީ2 ފޭދޫގައި ބޭއްވި ޖަލްސާގައި 2025 ގެ ޑިރެކްޓަރުންގެ ރިޕޯޓާއި މާލީ ބަޔާން ފާސްކޮށް، އާންމު ހިއްސާދާރުންގެ ބޯޑު ޑިރެކްޓަރެއް ގޮތުގައި މުޙައްމަދު އަޙްސަން ސަލީމް އިންތިޚާބުކޮށް، 2026 ވަނަ އަހަރަށް އެކްސްޓާނަލް އޮޑިޓަރުންގެ ގޮތުގައި އާންސްޓް އެންޑް ޔަންގް ވަނީ ހަމަޖައްސައިފައެވެ. ރާއްޖޭގެ ހިއްސާގެ ބާޒާރުގައި ލިސްޓެޑް ކުންފުންޏެއް ގޮތުގައި އެސްޓީއޯ އަށް 25 އަހަރު ފުރޭ މުނާސަބާ ވެސް މި ޖަލްސާގައި ފާހަގަކޮށްފައިވެއެވެ.