ހަންޓަ ވައިރަސް ފެތުރުނު ކްރޫޒް ޝިޕް އެމްވީ ހޮންޑިއުސް ގައި ބަލި މީހުންނަށް ފަރުވާ ދިން ދެވަނަ ޑޮކްޓަރު ވެސް ހަންޓަ ވައިރަހަށް ޕޮޒިޓިވް ވެއްޖެއެވެ.

ބޯޓުގެ އަސްލު ޑޮކްޓަރު ބަލިވީމާ ވޮލެންޓިއާކޮށް ޝިޕް ޑޮކްޓަރުގެ ރޯލް ނެގީ އެމެރިކާ ގެ ފިޒިޝަން ޑރ. ސްޓީފަން ކޯންފެލްޑް އެވެ.

Advertisement

އޮރެގަން އަށް ނިސްބަތްވާ ކޯންފެލްޑް ސީއެންއެން އަށް ދިން އިންޓަވިއުގައި ބުނީ "ރޭގަނޑު ދާ ހިއްލުން، ފިނި ވުން، ލުއި ނޭވާލާ ނިޒާމުގެ އަލާމާތް، އަދި ދެ ހަފުތާ އަށް ވުރެ ދިގު ވަރުބަލިކަމެއް" ހުރީ ކަމަށެވެ. ނަމަވެސް މިހާރު އެއްވެސް އަލާމާތެއް ނެތް ކަމަށާއި ހާލު ރަނގަޅު ކަމަށެވެ. ކޯންފެލްޑް ހުރީ ނެބްރާސްކާ ޔުނިވާސިޓީ މެޑިކަލް ސެންޓަރުގެ ބަޔޯކޮންޓެއިންމެންޓް ޔުނިޓުގައެވެ.

ކޯންފެލްޑް ބޯޓުގައި ހުރީ ޗުއްޓީ ހަދާށެވެ. ނަމަވެސް ބޯޓުގެ ޑޮކްޓަރު (ނެދަލެންޑްސް ގެ ރައްޔިތެއް) ގެ ހާލު އެޕްރީލް ފަހުކޮޅު ސީރިއަސް ވީމާ، މެއި އެކެއް ގައި ކޯންފެލްޑް ވޮލެންޓިއާކޮށް ޝިޕް ޑޮކްޓަރުގެ ޒިންމާ ނެގީއެވެ. 

ބައެއް ތަޖުރިބާކާރުން ކަންބޮޑުވާ ގޮތުގައި ދެ ޑޮކްޓަރުންނަށް ވެސް ބަލި ޖެހުމަކީ ވައިރަސް ހީކުރި ވަރަށް ވުރެ ފަސޭހައިން ފެތުރިދާނެ ކަމުގެ ނިޝާނެކެވެ. ހާވާޑް ގެ ޑރ. އާޝިޝް ޖާ ބުނީ "ބޯޓުގެ ޑޮކްޓަރުން ބުނާ ގޮތުގައި ބައެއް ކޭސް ޖެހިފައި ހުރީ ދިގު ގާތް ކޮންޓެކްޓް ނެތި ވެސް، ކުރިން ހީކުރި ގޮތާ ތަފާތު" ކަމަށެވެ. ނަމަވެސް ވައިރޮލޮޖިސްޓް ޖެކްސަން ބުނީ ވައިރަސް ބަދަލުވެ އިތުރަށް ފެތުރޭ ގޮތް ވީ ކަމުގެ ހެއްކެއް ނެތް ކަމަށެވެ. ހަންޓަ ވައިރަހުގެ ހުރިހާ ކޭސް ގެ ތެރެއިން އިންސާނުންގެ ދެމެދުގައި ފެތުރެނީ ދެ އިންސައްތަ އާއި ފަސް އިންސައްތައާ ދެމެދުގެ ކޭސް ކަމަށެވެ.

ފްރާންސް ގައި ހާލު ސީރިއަސް ވެފައިވާ ފަސެންޖަރެއްގެ ވާހަކަ ވެސް ފާހަގަ ކޮށްލެވެއެވެ. ޕެރިހުގެ ބިޝާ ހޮސްޕިޓަލުގައި ފަރުވާ ހޯދަމުންދާ ފްރާންސް އަންހެން ފަސެންޖަރު މިހާރު ހުރީ ލައިފް ސަޕޯޓުގައެވެ. އާޓިފިޝަލް ފުއްޕާމެ (އެކްމޯ މެޝިން) ބޭނުންކޮށް ފަރުވާ ދެމުންދެއެވެ. ފްރާންސް އިދާރާތަކުން ބުނީ "މީ ސަޕޯޓިވް ކެއާ ގެ ފައިނަލް ސްޓޭޖް" ކަމަށެވެ. އޭނާ ބަލިވީ ޓެނެރީފެ އިން ފައިބައިގެން ފްރާންސް އަށް ދިޔަ ރީޕެޓްރިއޭޝަން ފްލައިޓުގައެވެ.

ޔޫރަޕިއަން ސެންޓާ ފޯ ޑިޒީޒް ޕްރިވެންޝަން (އީސީޑީސީ) ގެ މެއި 12 ގެ ރެކޯޑުން ދައްކާ ގޮތުގައި ކޮންފާމް ނުވަ ކޭހާއި ޕްރޮބެބަލް ދެ ކޭހާއެކު މިހާރު ކޭސްތަކުގެ ޖުމުލަ އަދަދަކީ 11 އެވެ.

ތިން މީހުން މަރުވެފައިވާ އިރު ދެ މަރު ހަންޓަ ވައިރަހުން ކަމަށް ކޮންފާމް ވެފައިވެއެވެ. ހުރިހާ ކޭހަކީ ވެސް ބޯޓުގެ ފަސެންޖަރުން ނުވަތަ ކުރޫއިންނެވެ. ބޯޓުގައި ނެތް މީހެއްގެ ކޮންފާމް ކޭހެއް އަދި ފެނިފައެއް ނުވެއެވެ. ޑަބްލިއުއެޗްއޯ ޑިރެކްޓަރ ޖެނެރަލް ޓެޑްރޮސް ބުނީ "ބޮޑު އައުޓްބްރޭކެއް ފެށޭ ކަމުގެ ނިޝާނެއް ނެތް" ކަމަށެވެ. ނަމަވެސް ވައިރަހުގެ އިންކިއުބޭޝަން ހައެއް ހަފުތާ އާ ހަމައަށް ދެމިގެން ހިނގައިދާނެތީ ކުރިއަށް އޮތް ހަފުތާ ތަކުގައި އިތުރު ކޭސް ފެނުން އެކަށީގެންވާ ކަމަށެވެ.