ޙައްޖު ވާޖިބުވެއްޖެ މީހާ ލަސްނުކޮށް ޙައްޖު އަދާކުރުމަށް އަވަސްވެގަތުމަށް މިއަދުގެ ހުކުރު ޚުޠުބާގައި ގޮވައިލައިފިއެވެ.

"ހެއު ގޮތުގައި ވެވޭ ޙައްޖު" މި މައުޟޫޢަށް ޚާއްޞަކޮށްގެން އިއްވި ޚުޠުބާގައި ބުނީ ޙައްޖު ވާޖިބުވުމަށް ފަހު، ކެރި ކުޅަދާނަވެއްޖެ މީހާ ޙައްޖު އަދާކުރުމަށް އަވަސްވެގަތުމަކީ ކީރިތި ރަސޫލާ ﷺ އިރުޝާދު ދެއްވައިފައިވާ ކަމެއް ކަމަށެވެ. އެއީ ތިމާއަށް ކަންތައް ދިމާވާނީ ކިހިނެއް ކަމެއް ނޭނގޭނެތީ ކަމަށް ވެސް ޚުޠުބާގައި ބުންޏެވެ.

Advertisement

ހެއު ގޮތުގައި ވެވޭ ޙައްޖަށް މާތް ﷲ ދެއްވާ ޘަވާބަކީ ސުވަރުގެ ކަމަށާއި، ފާފަތަކުން އެއްކިބާވެ ހެއު ގޮތުގައި ވެވޭ ޙައްޖަށް ސުވަރުގެ ފިޔަވައި އެހެން ޖަޒާއެއް ނުވާ ކަމަށް ޚުޠުބާގައި ފާހަގަކުރިއެވެ.

ޙައްޖަށް ދިއުމުގެ ކުރިން ކުރަން ޖެހޭ ކަންތައްތަކަށް ވެސް ޚުޠުބާގައި އަލިއަޅުވައިލިއެވެ. އެގޮތުން އިޚްލާޞްތެރި ތައުބާއަކުން ތައުބާވުމާއި، ދަރަންޏާއި ލިބެން ހުރި ތަކެތި ލިޔެ ބެހެއްޓުމާއި، ޙައްޖަށް ކުރާ ޚަރަދުތަކަކީ ޙަލާލު ގޮތުގައި ހޯދައިފައިވާ ފައިސާ އިން ކުރާ ޚަރަދަކަށް ވާން ޖެހޭނެ ކަމަށް ބުންޏެވެ. އެކަމާ ގުޅޭ ގޮތުން ޙަދީޘް ބަސްފުޅެއް ނަންގަނެ ބުނީ، މާތް ﷲ އީ ހުރިހައި ޢައިބަކުން ހުސްދުރުވެވޮޑިގެންވާ ރަސްކަލާނގެ ކަމަށާއި، ޠާހިރު އަދި ޙަލާލު ތަކެތި މެނުވީ އެކަލާނގެ ޤަބޫލު ނުކުރައްވާ ކަމަށެވެ.

ޚުޠުބާގައި އިތުރަށް ބުނީ ހެއު ގޮތުގައި ވެވުނު ޙައްޖެއް ކަމުގެ ޢަލާމާތަކީ ޙައްޖުވުމަށް ފަހު ތިމާގެ ދިރިއުޅުން ހެއު މަގަށް ބަދަލުވެ، މާތް ﷲ މަނާކުރެއްވި ކަންތައްތަކުން ދުރުވެ ރައްކާތެރިވެގެން ދިރިއުޅުން ވޭތުކުރުން ކަމަށެވެ.